Mwakoro 97
Kaotioti ae kaotaki rinanon Iotebwa Timiti te Burabeti, i Kirtland, Ohio, n Aokati 2, 1833. Te kaotioti aei e tabe raoi ma aroia Aomata aika Itiaki i Tion, Aono ae Jackson, Missouri, ni kaekaan ana titiraki te Burabeti nakon te Uea ibukin rongorongona. Kaain te Ekaretia i Missouri n te tai aei a kairoroaki bwa a na rinanon te bwainikirinaki ae korakora ao, n Turai 23, 1833, n tia ni kairoroaki bwa a na korea araia n te booraraoi bwa a na kitana te Aono ae Jackson.
1–2, A mwaiti Aomata aika Itiaki i Tion (Aono ae Jackson, Missouri) aika a kakabwaiaaki ibukin aia kakaonimaki; 3–5, Parley P. Pratt e kamoamoaaki ibukin ana mwakuri n reirein Tion; 6–9, Naake a kaawakin aia berita aika tabu a butimwaeaki iroun te Uea; 10–17, Te auti e na kateaki i Tion are naake a itiaki nanoia a na nora iai te Atua; 18–21, Tion bon te itiaki n nano; 22–28, Tion e na aki rotaki n ana katuaa te Uea ngkana e kakaonimaki.
1 E koaua ae I tuangkami raraou, I taetae nakoimi ma bwanaau, are bwanaan Tamneiu, bwa I aonga ni kaota nakoimi au kantaninga ni kaineti ma tarimi ake i aban Tion, a mwaiti mai i buakoia aika a nanorinano ni koaua ao n teimatoa ni ukoukora reiakinan te wanawana ao ni kakaea te koaua.
2 E koaua, e koaua ae I tuangkami, a na kakabwaiaaki naakai, bwa a na karekea; bwa Ngai, te Uea, I kaota te nanoanga nakoia ake a nimamannei ni kabane, ao i aoia ni kabane ake I taku, bwa I aonga n aki bukinaki ngkana N na uotiia nakon te motikitaeka.
3 Noria, I tuangkami, ni kaineti ma te reirei i Tion, Ngai, te Uea, I rang ni kukurei bwa e na riai n iai te reirei i Tion, ao iroun naba au tia mwakuri ae Parley P. Pratt, bwa e kakaonimaki nakoiu.
4 Ao ngkana e teimatoa n reitinako ni kakaonimaki nakoiu e na reitinako n tararua te reirei n aban Tion ni karokoa N na anganna tuua riki tabeua.
5 Ao N na kakabwaia n taian kakabwaia aika mwaiti, ni kabwarabwarai koroboki aika tabu ni kabane ao bwaai aika a raba nakon karikirakean te reirei, ao te ekaretia i Tion.
6 Ao nakoia nikiraia ake n te reirei, Ngai, te Uea, I rangi n tauraoi ni kaota te nanoanga; e ngae n anne, iai aika a riai ni katuaeaki, ao a na kaotaki aia mwakuri.
7 E kaweneaki te angara i wakaan taian kai; kai ni kabane ake a aki kariki uaa aika a raoiroi a na bon ereaki man teweaki nako nanon te ai. Ngai, te Uea, I a tia n taekinna.
8 E koaua ae I tuangkami, ni kabane i buakoia ake a ataa nanoia bwa e kokoaua, ao n uruaki, ao n raraoma tamneia, ao ni kukurei ni kawakini aia berita aika tabu man te karea—eng, ni kabane taian karea are Ngai, te Uea, N na tuangkami—a butimwaeaki irou.
9 Bwa Ngai, te Uea, N na katauia bwa a na kaoti mwakuri aika raoiroi n aron te aroka ae e rangi ni kariki ua are e unikaki n te aba ae raoiroi, i rarikin te karaanga are e itiaki, are e kariki uaa aika mwaiti aika a kakawaki.
10 E koaua ae I tuangkami, bwa bon au kantaninga bwa te auti e na kateaki nakoiu i aban Tion, n aekakin te banna are I a tia n angani ngkami.
11 Eng, e riai ni kateaki ni kataweaki, man aia kabwianibwai au aomata.
12 Nooria, aio te kabwianibwai ao te karea are Ngai, te Uea, I kainanoia mai irouia, bwa e aonga ni kateaki te auti nakoiu ibukin kamaiuan Tion—
13 Bwa te tabo ni kakaaitau ibukiia aomata aika itiaki ni kabane, ao ibukin te tabo n reirei ibukiia ni kabane ake a weteaki nakon te mwakuri ni ibuobuoki ni weteaia ao nakoaia ni kabane;
14 Bwa a aonga ni kakororaoaki n ataakin aia mwakuri ni ibuobuoki, n taekana, n tuana, ao n taian reirei, ni bwaai ni kabane ake a kaineti nakon uean te Atua n te aonaba, kiingin te abanuea anne kam a tia n anganaki.
15 Ao ngkana a teimatoa au aomata ni katea te auti nakoiu n aran te Uea, ao n aki kariaia bwaai aika aki itiaki n rin nako iai, bwa e na aki bareka, mimitongiu e na tiku i aona;
16 Eng, N na mena ikekei, bwa N na roko nako iai, ao ni kabane ake a itiaki nanoia ake a na roko nako iai a na noora te Atua.
17 Ma ngkana e kabarekaaki N na aki roko nako iai, ao mimitongiu e na aki mena ikekei; bwa N na aki roko nakon taian tembora aika aki tabu.
18 Ao, ngkai, nooria, ngkana Tion e karaoi bwaai aikai e na rikirake, ao ni bubura ao n riki n rangi ni mimitong, n rangi ni korakora, ao n rangi ni kakamaaku.
19 Ao aban te aonaba a na karinea, ao a na kangai: E koaua bwa Tion bon ana kaawa Atuara, ao e koaua bwa Tion e aki kona ni bwaka, ke ni kamwaingaki man ana tabo, bwa te Atua e mena ikekei, ao bain te Uea e mena ikekei;
20 Ao e a tia n tuea man mwaakan marurungina n riki bwa kamaiuakina ao ana taua ae rietata.
21 Ngaia are, e koaua, ae taku te Uea, e riai Tion ni kimwareirei, bwa aio Tion—Ake a Itiaki Nanoia; ngaia are, e riai Tion ni kimwareirei, ngkai ni kabane ake a buakaka a na tang.
22 Bwa nooria, ao taraia, te kabomwi e tawe n roko i aoia ake a buakaka n aron te ukeuke n anti; ao antai ae e kona ni birinako mai iai?
23 Unin te Uea e na roko i aomi n te bong ao n te ngaina, ao rongorongona e na karawawataia aomata ni kabane; eng, e na aki toki ni karokoa ae e roko te Uea;
24 Bwa e kauraki unin te Uea nakon aia mwakuri aika bati n ribaki ao aia mwakuri ni kabane aika buakaka.
25 E ngae n anne, Tion e na aki rootaki ngkana e teimatoa ni karaoi bwaai ni kabane ake I a tia n tuangnga.
26 Ma ngkana e aki teimatoa ni karaoi ake I a tia n tuangnga, N na kawaria ni kaineti ma ana mwakuri ni kabane, ma te karawawataaki ae korakora, ma te buti n aoraki ae kamamate, ma te aoraki ae eweewe, ma te kabaang, ma te kabomwi, ma te ai ae kamaunai bwaai.
27 E ngae n anne, e riai ni warekaki ti n te tai aio bwa e na ongo, bwa Ngai, te Uea, I a tia ni butimwaea ana anga karea; ao ngkana e aki manga bure akea bwaai aikai ake a na riki nakoina;
28 Ao N na kakabwaiaa ma taian kakabwaia, ao ni kamwaitii kakabwaia aika a mwaiti i aona, ao i aoia ana kariki n aki tootoki, e taku te Uea ae Atuami. Amen.