5 Ia oqo me baleti rau na luvemu tagane ko Ifireimi kei Manasa, ka rau a sucu ki vei iko mai na vanua ko Ijipita, ni se bera niu lako yani ki vei iko ena vanua ko Ijipita; raica era sa noqu, ka na vakalougatataki ira na nodra Kalou na noqu qase; io me vaka na nodrau na vakalougatataki ko Rupeni kei Simioni, ni ra sa noqu; o koya era na vakatokai kina ena yacaqu. (Era sa vakatokai kina me Isireli.)

6 Ia na luvemu kecega era na qai sucu e muri vei rau, era na nomu, ka ra na vakatokai ena yacadrau na tuakadra ena nodra ivotavota, ena nodra yavusa; o koya era na vakatokai kina me yavusa i Manasa kei Ifireimi.

7 Ka sa kaya kina ko Jekope vei Josefa, Ena gauna sa rairai kina ki vei au na nodra Kalou na noqu qase mai Lusa, ena vanua ko Kenani, sa yalataka kina, ni na solia vei au, kei ira na noqu kawa na vanua ko ya me keimami taukena ka tawamudu.

8 Ia, ko sa vakalougatataki au kina na luvequ ena noqu susugi iko mo dauveiqaravi vei au, ena kena vakabulai na noqu vuvale mai na mate;

9 Ena nodra sereki na noqu tamata, ko ira na wekamu, mai na dausiga ca sara ena vanua; ia ena vakalougatataki iko kina kei ira na vua ni tolomu na nodra Kalou na nomu qase, era na vakalougatataki vakalevu cake kina mai vei ira na wekamu, ka vakakina mai vei ira na kawa nei tamamu;

10 Ni ko sa qaqa, ka sa cuva vei iko na kawa nei tamamu, me vaka sa vakaraitaki vei iko, ni ko se bera ni volitaki yani ki Ijipita mai vei iratou na tuakamu; o koya eratou na cuva kina vei iko na tuakamu, mai na itabatamata ki na itabatamata, vei ira na vua ni tolomu, me sega ni mudu;

11 Ni ko na vu ni rarama vei ira na noqu tamata, mo vueti ira mai na siga ni nodra vesuki tu, mai na nodra vakabobulataki; ka kauta mai na veivakabulai vei ira, ni ra sa cuva taucoko tu ena nodra ivalavala ca.