5 Mo nao, long tufala boe blong yu, Efrem mo Manase, we oli bon oli kam pikinini blong yu long graon blong Ijip bifo mi bin kam long yu long Ijip; luk, tufala i blong mi, mo God blong ol papa blong mi bae i blesem tufala; semmak olsem Ruben mo Saemon, bae tufala i kasem blesing, from tufala i blong mi; taswe, bae mi singaotem tufala tru long nem blong mi. (From hemia, bae mi singaotem tufala Isrel.)

6 Mo ol pikinini blong yu we oli bon afta long tufala, bae oli blong yu, mo oli singaotem olgeta tru long nem blong ol brata blong olgeta long wanem samting we oli gat raet long hem, insaed long ol traeb blong olgeta; from hemia, oli singaotem olgeta ol traeb blong Manase mo blong Efrem.

7 Mo Jekob i bin talem long Josef: “Taem God blong ol papa blong mi i bin kamaot long mi long Lus, long graon blong Kenan, hem i bin mekem wan tabu promes long mi, se bae hem i givim long mi mo long laen blong mi, kantri ia, blong mi tekem blong taem we i no gat en.

8 From hemia, O boe blong mi, hem i bin blesem mi blong mi lukaotem mo tijim yu blong yu kam wan wokman blong mi, blong yu sevem haos blong mi long ded;

9 Blong yu sevem ol pipol blong mi, ol brata blong yu, long hadtaem blong kasem kaekae we i bin strong long kantri; taswe, God blong ol papa blong mi i bin blesem yu, mo ol pikinini blong laen blong yu, blong oli save gat blesing i bitim ol brata blong yu, mo i bitim haos blong papa blong yu;

10 From se yu yu bin win, mo haos blong papa blong yu i bin bodaon long fored blong yu, olsem we Lod i bin soemaot long yu bifo ol han blong ol brata blong yu oli bin salem yu i go long Ijip; taswe, ol brata blong yu bae oli bodaon long fored blong yu, stat long wan jeneresen i go long nara jeneresen, mo long fored blong ol pikinini blong laen blong yu blong oltaem;

11 From se bambae yu stap wan laet long ol pipol blong mi, blong yu sevem olgeta long taem we oli stap olsem prisena, long taem we oli stap slef; mo blong yu tekem fasin blong sevem man i go long olgeta, taem bae olgeta evriwan i bodaon from sin.”