24 Na Joseph see no nuanom no dɛ, Muruwu, na makɔ m’egyanom hɔ; na medze enyigye rokɔ me nda mu. M’egya Jacob ne Nyankopɔn nye hom ntsena, na ɔngye hom mfi amandzehu mu wɔ hom nkowaasom nda mu; osiandɛ Ewuradze abɛsera me, na menya Ewuradze hɔ anohoba dɛ fi eduaba a ofi m’asen mu na Ewuradze Nyankopɔn beyi abaw tsenenee efi mu ama hom; nkɔnhyɛnyi no; (nnyɛ Messiah a wɔfrɛ no Shilo no;) hom a m’egya Jacob ato hom dzin Israel, na dɛm nkɔnhyɛnyi no na obeyi mo nkorɔfo efi Egypt wɔ hom nkowaasom ber mu.

25 Na ɔbɛba dɛ wɔbɔbɔ hɔn apetse bio; na wobobu abaw efi ho, na wɔdze hɔn akɔ ekyirekyir ɔman bi mu; naaso sɛ Messiah no ba a, wɔbɛkaa hɔn wɔ Ewuradze n’ahyɛmu no mu wɔ nda a odzi ekyir no mu, osiandɛ wɔbɛda no edzi, wɔ Sunsum no tum mu, akyerɛ hɔn; na obeyi hɔn efi sum mu aba kan mu; efi nsumaamu sum mu, na efi ndɔmmum mu aba fahodzi mu.

26 Adzehunyi bi na Ewuradze me Nyankopɔn beyi no, ɔno na ɔbɛyɛ adzehunyi a ɔasan mu eyi no ama m’asen mu eduaba.

27 Dɛm na m’egyanom hɔn Ewuradze Nyankopɔn kãe kyerɛɛ me; Adzehunyi bi a ɔasan mu na mibeyi no efi w’asen mu eduaba mu, na wɔbɔkrɔn no kɛse wɔ eduaba biara a ofi w’asen no mu; na ɔno na mebɛma no mbrasɛm ma ɔdze ayɛ edwuma ama no nuanom, w’asen mu eduaba.

28 Na ɔbɛma woenya nyimdzee wɔ ahyɛmu a menye hom egyanom edzi na ɔbɛyɛ edwuma biara a mebɛhyɛ no no.

29 Na mebɛyɛ no ɔkɛse wɔ m’enyi do, osiandɛ ɔbɛyɛ m’edwuma; na ɔbɛyɛ ɔkɛse tse dɛ nyia mekãa dɛ mibeyi no ama hom ma ɔabɛgye mo nkorɔfo, O Israel fifo no, efi Egypt asaase do no; na adzehunyi na mibeyi no ma ɔabɛgye mo nkorɔfo efi Egypt asaase do; na wɔbɛfrɛ no Moses. Na ɔnam dzin yi do na obohu dɛ ofi wo fi, osiandɛ ɔhen no ne babaa na ɔbɛtsetse no, na ɔbɛfrɛ no ne babanyin.

30 Na bio adzehunyi na mibeyi no efi eduaba a ofi w’asen mu, na ɔno na mebɛma no tum ma ɔdze m’asɛm abrɛ w’asefo; na nnyɛ m’asɛm nko na ɔdze bɛbrɛ hɔn, Ewuradze na ɔse, mbom ɔbɛdaan hɔn adwen akɔ m’asɛm a wɔaba hɔn mu dada no wɔ nda a odzi ewiei mu no;

31 Dɛm ntsi eduaba a ofi w’asen mu no bɛkyerɛw, na eduaba a ofi Judah n’asen mu no bɛkyerɛw; na dza eduaba a ofi w’asen mu bɛkyerɛw no, na dza eduaba a ofi Judah n’asen mu bɛkyerɛw no so; bɔbɔmu enyin dze ahyɛ ator nkyerɛkyerɛ fɛr, na wɔabrɛ wentwiwentwi adze, na ɔdze asomdwee aba eduaba a ofi w’asen mu, na ɔdze hɔn egyanom ho nyimdzee abrɛ hɔn wɔ nda a odzi ekyir no mu; na m’ahyɛmu ho nyimdzee so, Ewuradze na ɔse.

32 Na mberɛwyɛ mu na wɔbɛhyɛ no dzen, wɔ da no mu, ber a m’edwuma bɔkɔ mo nkorɔfo nyinara mu no, ɔno na wɔbɛma hɔn a wɔyɛ Israel fifo no asan ananmu aba wɔ nda a odzi ewiei no mu.

33 Na dɛm adzehunyi no na mibɛhyira no, na hɔn a wɔrohwehwɛ asɛɛ no no hɔn enyim bogu ase; osiandɛ anohoba yi na medze ma hom; na mebɛkaa wo efi mbusuasantsen kesi mbusuasantsen; na wɔbɛfrɛ ne dzin no Joseph, na ɔbɛfa n’egya ne dzin; na ɔbɛyɛ tse dɛ ɔwo; na dza Ewuradze dze bodua ne nsamu no dze nkwagye bɛbrɛ mo nkorɔfo.

34 Na Ewuradze kãa ntam kyerɛɛ Joseph dɛ ɔbɔkora n’asefo afebɔɔ, rese dɛ, Mibeyi Moses, na obokura poma wɔ ne nsamu, na ɔbɔboaboa mo nkorɔfo ano, na obedzi hɔn enyim dɛ nguankuw, na ɔdze no poma no abɔ po memen n’esu no.

35 Na obobu atsɛn, na ɔbɛkyerɛw Ewuradze n’asɛm. Na ɔrennkasa pii, osiandɛ mankasa me nsatseaba bɛkyerɛw mbra ama no. Na mebɛma no ɔkasamaafo, na wɔbɛfrɛ ne dzin Aaron.

36 Na ɔbɛyɛ hɔ ama hom wɔ nda a odzi ewiei no so mu, dɛ mbrɛ makã ntam no. Dɛm ntsi, Joseph see no nuanom dɛ, Ampaara Nyankopɔn bɛba abɛsera hom na obeyi hom efi asaase yi do, dze hom akɔ asaase a ɔkãa ho ntam kyerɛɛ Abraham, nye Isaac, nye Jacob no.

37 Na Joseph sii ndzɛmba piinara pi maa no nuanom, na ɔmaa Israel mba dzii nsew, rese hɔn dɛ, Ampaara Nyankopɔn bɛba abɛsera hom, na hom nsoa me mbiew mfi ha nkɔ.

38 Nna Joseph wui, nna oedzi mfe ɔha du; na wɔhyɛɛ no akyenkyendur na wɔtoo no adaka mu wɔ Egypt, na Israel mba ennsie no ama wɔasoa no wɔnye no akɔto ndamu wɔ n’egyanom nkyɛn. Na dɛm na wɔkaa nsew a wodzii kyerɛɛ no.