24 Mo Josef i bin talem long ol brata blong hem: “Mi stap ded, mo mi go long ol papa blong mi; mo mi godaon long gref wetem glad. God blong papa blong mi, Jekob, i stap wetem yufala, blong i tekemaot yufala long hadtaem long ol taem we bae yufala i stap olsem prisena; from se Lod i bin kam luk mi, mo mi bin kasem wan promes long Lod, se aot long frut blong laen blong mi, Lod God, bae i statem wan branj aot long ol pikinini blong mi; mo long yu we papa blong mi Jekob i bin singaotem Isrel, bae wan profet i kamaot long hem; (i no Mesaea we oli singaotem Silo;) mo profet ia, bae i sevem ol pipol blong mi aot long Ijip long taem we bae yufala i stap olsem prisena.”

25 Mo bambae i hapen se bae oli seraot i go olbaot bakegen; mo Lod bae i brekem wan branj, mo i tekem i go long wan kantri longwe; be Lod bae i tingbaot olgeta insaed long ol kavenan blong Lod, taem bae Mesaea i kam; from se Lod bae i soemaot hem long olgeta long ol las dei, tru long Spirit blong paoa; mo bae i tekem olgeta aot long tudak oli kam long laet; aot long tudak we i haed, mo aot long kalabus i go long fridom.

26 Wan sia bae Lod, God blong mi i resemap, we bae hem i wan sia we hem i jusumaot long ol pikinini blong laen blong mi.

27 Olsem ia nao Lod God blong ol papa blong mi i talem long mi: “Wan sia bae mi resemap we bae mi jusumaot long ol pikinini blong laen blong yu; mo bae ol pikinini blong laen blong yu bae oli respektem hem bigwan. Mo long hem bae mi givim wan komanmen se bae hem i mekem wan wok blong ol pikinini blong laen blong yu, ol brata blong hem.

28 Mo bae i tekem olgeta blong kam blong save ol kavenan we mi bin mekem wetem ol papa blong yu; mo bae hem i mekem eni kaen wok we bae mi givim oda long hem.

29 Mo bae mi mekem hem i kam wan haeman long ae blong mi, from bae hem i mekem wok blong mi; mo bae hem i haeman olsem man we mi bin talem se bae mi resemap blong yu, blong sevem pipol blong mi, O haos blong Isrel, aot long graon blong Ijip; from se bae mi resemap wan sia blong sevem pipol blong mi aot long graon blong Ijip, mo bae mi singaotem hem Moses. Mo tru long nem ia, bae yufala i save se hem i blong haos blong yufala; from se gel blong king bae i lukaotem hem, mo bae oli singaotem se pikinini ia i boe blong hem.

30 Mo bakegen, bae mi resemap wan sia i kamaot long ol pikinini blong laen blong yu; mo long hem, bae mi givim paoa blong tekem ol toktok blong mi i go long ol pikinini blong laen blong yu—mo i no blong karemaot ol toktok blong mi nomo, Lod i talem, be blong mekem olgeta i biliv long ol toktok blong mi, we bae i go aot finis long medel blong olgeta long ol las dei.

31 Taswe, ol pikinini blong laen blong yu bae oli raetemdaon toktok; mo ol pikinini blong laen blong Juda bae oli raetemdaon toktok; mo evri samting we ol pikinini blong laen blong yu bae oli raetemdaon, mo tu, evri samting we ol pikinini blong laen blong Juda bae oli raetemdaon, bae i gro tugeta, blong blokem ol giaman doktrin, mo blong putumdaon ol rao, mo blong stanemap pis long medel blong ol pikinini blong laen blong yu, mo blong tekem olgeta blong kasem wan save long saed blong ol papa blong olgeta long ol las dei, mo tu, blong kam blong kasem save long saed blong ol kavenan blong mi, Lod i talem.

32 Mo aot long ol samting we hem i slak long hem bae hem i kam strong, long taem ia we wok blong mi bae i go aot long medel blong evri pipol blong mi, wok ia we bae i putumbak olgeta we oli blong haos blong Isrel, long ol las dei.

33 Mo sia ia, bae mi blesem, mo olgeta we oli lukaot blong kilimded hem bae oli lus evriwan; from promes ia, mi givim long yu; from se bae mi tingbaot yu stat long wan jeneresen i go long narafala jeneresen; mo nem blong hem, bae oli singaotem Josef, mo bae nem ia i kam folem nem blong papa blong hem; mo bae hem i olsem yu; from samting ia we Lod bae i karem i kam tru long han blong hem, bae i tekem ol pipol blong mi i kam long fasin blong sevem man.”

34 Mo Lod i bin mekem tabu promes long Josef se bae hem i sevem laen blong hem blong oltaem, mo i talem: “Bae mi resemap Moses i kam, mo wan stik bae i stap long han blong hem, mo bae hem i karem i kam wanples ol pipol blong mi, mo bae i lidim olgeta olsem wan grup we hem i lukaotem, mo bae hem i kilim ol wota blong Red Si wetem stik blong hem.

35 Mo bae hem i save mekem jajmen, mo bae i raetemdaon toktok blong Lod. Mo bae hem i no talem tumas toktok, from se long hem, bae mi raetemdaon loa blong mi wetem fingga blong han blong miwan. Mo bae mi givim hem wan man blong talemaot ol toktok, mo nem blong hem i Eron.”

36 Mo tu, bambae i hapen long yu long ol las dei olsem we mi bin mekem tabu promes long yu. From hemia, Josef i bin talem long ol brata blong hem: “I tru, bae God i visitim yufala, blong tekem yufala aot long kantri ia, i go long kantri ia we hem i bin mekem tabu promes long hem long Ebraham, mo long Aesak, mo long Jekob.”

37 Mo Josef i bin talemaot tru bakegen plante narafala samting long ol brata blong hem, mo i bin mekem ol pikinini blong Isrel oli mekem wan strong promes long hem, mo i talem long olgeta: “I tru, God bae i visitim yufala, mo bae yufala i karem ol bun blong mi i go wetem yufala.”

38 Mo biaen, Josef i bin ded taem hem i bin kasem wan handred mo ten yia; mo oli wokem ded bodi blong hem blong i no save roten, mo oli putum hem insaed long wan kofin long Ijip; mo ol pikinini blong Isrel oli blokem blong oli berem hem, blong oli save tekem hem i go silip insaed long hol blong ston wetem papa blong hem. Mo olsem ia nao, oli bin stap tingbaot strong promes we oli bin mekem long hem long wan tabu promes.