VJS, iVakatekivu 9:4–6. Veidutaitaka na iVakatekivu 8:20–22
Ni oti na waluvu, a kerea na Turaga o Noa me kua ni cudruva tale na vuravura.
4 Sa tara ko Noa vua na Turaga e dua na icabocabo ni soro, ka kauta e yadua mai na manumanu yavaiva savasava, ka yadua mai na manumanu vuka savasava, ka vakacabo isoro kama ena icabocabo ni soro; ka vakavinavinaka vua na Turaga, ka sa reki na yalona.
5 Ka sa vosa vei Noa na Turaga, ka vakalougatataki koya. Sa boica ko Noa e dua na isaluwaki boi vinaka, ka sa kaya e yalona;
6 Au na masuta na yaca ni Turaga, me na kua tale ni cudruva na vanua ena vuku ni tamata, ni sa ca na vakanananu ni tamata mai na nona gauna ni gone; ka me na kakua tale ni cudruva na veika bula kece, me vaka sa vakayacora ko koya, ni se tu ko vuravura;
VJS, iVakatekivu 9:10–15. Veidutaitaka kei na iVakatekivu 9:4–9
Ena tarogi na tamata ni vakadavea na dra ni manumanu kei na tamata. Sa vakayacora na Kalou vei Noa kei ira na luvena na veiyalayalati vata a vakayacora vei Inoki.
10 Ia, na dra kecega ni lewe au sa solia vei kemudou me kakana, ena vakadavei e dela ni qele, ka sa kauta tani mai kina na bula, ia na dra mo dou kakua ni kania.
11 Ia sa dina sara, ena sega ni vakadavei na dra, me baleta ga na kakana, mo dou vakabulai kina; ia na dra ni manumanu kecega au na taroga e ligamudou.
12 Ia ko koya sa vakadavea na dra ni tamata, ena vakadavea na nona dra na tamata; me kakua ni vakadavea na dra ni tamata na tamata.
13 Ni’u sa solia e dua na ivakaro, ni sa dodonu ki na tamata kecega, me taqomaka na bula ni tamata, ni’u sa bulia na tamata me ucui au.
14 Au sa solia vei kemudou e dua na ivakaro, Dou vakaluveni ka tubu me lewe vuqa mai; mo dou vakatubura vakalevu e vuravura, ka mo dou lewevuqa mai kina.
15 A sa vosa vei Noa na Kalou, kei ira vata kaya na luvena tagane, ka kaya, Ia, raica, au na vakayacora vei iko na noqu veiyalayalati, kau a cakava vua na nomu qase ko Inoki, me baleti ira na nomu kawa mai muri.
VJS, iVakatekivu 9:21–25. Veidutaitaka na iVakatekivu 9:16–17
Sa vakatikora mai lomalagi na Kalou na drodrolagi me ivakananumi ni Nona veiyalayalati vei Inoke kei Noa. Ena veisiga mai muri era na duavata kei ira na buladodonu e vuravura na vakasoqoni raraba ni nona lotu na Ulumatua.
21 Ka sa tiko ena o na drodrolagi; me’u na dau nanuma tiko kina na veiyalayalati tawamudu, ka’u a cakava vua na nomu qase ko Inoki; ni, ena gauna era sa na muria kece kina na noqu ivakaro na tamata, sa na yaco tale mai kina ki vuravura ko Saioni, na koro nei Inoki ka’u sa kauta cake ki lomalagi.
22 Ia oqo na noqu veiyalayalati tawamudu, ena gauna era sa ciqoma kina na nomu kawa na dina, ka ta cake, ena qai rai sobu yani ko Saioni, ka na sakure ko lomalagi ena marau, ka sautaninini ko vuravura ena reki;
23 Ka na lako sobu mai lomalagi na soqoni raraba ni nona lotu na ulumatua, ka taukeni vuravura, ia ena tu ga kina me yacova na ivakataotioti. Ia sai koya oqo na noqu veiyalayalati tawamudu, kau a cakava vata kei na nomu qase ko Inoki.
24 Ia ena tu ena o na drodrolagi, ka’u na cakava na noqu veiyalayalati vei iko, na kena au sa cakava vei iko kei au, me baleta na veika bula kecega ena kena veimataqali kecega ena tu e vuravura.
25 Ka sa kaya vei Noa na Kalou, Oqo na ivakatakilakila ni veiyalayalati au sa cakava vei iko kei au; me baleta na tamata kecega ena bula e vuravura.