1 Ko ia foki, ke ʻoua ʻe liʻaki ʻa e ngaahi tefitoʻi moʻoni ʻo e tokāteline ʻa Kalaisí, ka tau laka atu ki muʻa ki he haohaoá; pea ʻoua ʻe toe ʻai ʻa e tuʻunga ʻo e fakatomalá meí he ngaahi ngāue maté, pea mo e tui ki he ʻOtuá.

2 ʻO e tokāteline ʻo e ngaahi papitaisó, ʻo e hilifaki ʻo e nimá, mo e toetuʻu ʻo e maté, mo e fakamaau taʻengatá.

3 Pea tau fai atu ki he haohaoá ʻo ka hōifua ki ai ʻa e ʻOtuá.

4 He kuó ne ngaohi ia ke ʻikai malava ʻe kinautolu naʻe muʻaki fakamāmá, pea kuo nau ʻahiʻahiʻi ʻa e meʻafoaki fakalangí, pea ngaohi ke nau ʻinasi ʻi he Laumālie Māʻoniʻoní,

5 Pea kuo nau ʻahiʻahiʻi ʻa e folofola lelei ʻa e ʻOtuá, mo e ngaahi mālohi ʻo e maama ka hoko maí,

6 Kapau te nau hē atu, ke toe fakafoʻou ki he fakatomalá; ʻi he mamata kuo nau toe tutuki ki he ʻakaú ʻiate kinautolu pē ʻa e ʻAlo ʻo e ʻOtuá, pea fai fakahāhā pē ʻa hono fakamāʻí.

7 He ʻe hoko mai ʻa e ʻaho ʻe inumia ai ʻe he māmaní ʻi he ʻuha ʻoku faʻa tō ki aí, pea tupu mei ai ʻa e ʻakau ʻoku taau mo kinautolu ʻoku nofo ʻi aí, ʻe kinautolu ʻoku tauhi iá, ʻa ia eni ʻoku nau maʻu ha ngaahi tāpuaki mei he ʻOtuá, ʻe fakamaʻa ʻaki ʻa e afi.

8 He ko ia ʻoku tupu mei ai e ʻakau talatalá mo e talatalaʻāmoá ʻoku siʻaki ia, pea ofi ke fakamalaʻiaʻi; ko ia, ko kinautolu ʻoku ʻikai ke nau ʻomi e ngaahi fua leleí ʻe laku ki he afí; he ko honau ikuʻangá ko hono tutu.

9 Ka, ʻe kāinga ʻofeina, kuo fakalotoʻi kimautolu ʻoku ʻi ai ha ngaahi meʻa lelei ange maʻamoutolu, pea mo ha ngaahi meʻa ʻoku haʻu fakataha mo e fakamoʻuí, neongo ʻemau lea pehení.

10 He ʻoku ʻikai taʻeangatonu e ʻOtuá, ko ia he ʻikai te ne fakangaloki hoʻomou ngāué mo e ngāue ʻofá, ʻa ia kuo mou fakahā ki hono huafá, ʻi hoʻomou tauhi ki he kāingalotú, pea tokoniʻí.