16 Mo oli talem long hem: “Mifala i gat loa, mo ol profet; be man ia, bambae mifala i no akseptem hem blong i man blong rulum mifala, from se hem i putum hem i stap wan jaj ova long mifala.”

17 Mo afta, Jisas i talem long olgeta: “Loa mo ol profet oli testifae long saed blong mi; yes, mo evri profet we i bin raetem toktok blong God, i go kasem Jon, oli bin tokbaot ol dei ia.

18 Stat long tetaem ia, Kraes mo ol disaepol blong hem oli prij abaot kingdom blong God, mo evri man we i lukaotem trutok, i stap pus i go from.

19 Mo hem i moa isi blong heven mo wol blong go lus, bitim blong wan smol pat blong loa i lus.

20 ?Mo from wanem yufala i tijim loa, mo sakemaot toktok we oli raetemdaon; mo panisim hem we Papa i bin sendem i kam blong mekem loa ia i kamtru blong mekem se hem i pemaot yufala?

21 !O yufala i krangke! From se yufala i talem long hat blong yufala: ‘I no gat God.’ Mo yufala i jenisim stret fasin; mo kingdom blong heven i safa from ol bigfala faet blong yufala; mo yufala i givim hadtaem long olgeta we oli no stap flas; mo long faet blong yufala, yufala i wantem blong prapa spolem gud kingdom; mo yufala i tekem ol pikinini blong kingdom long fos. !Sore tumas long yufala, yufala i mekem adaltri!”

22 Mo oli tok nogud long hem bakegen, from se oli bin kros long toktok ia se oli olgeta we oli mekem adaltri.

23 Be hem i gohed, i talem se: “Huia i divos long waef blong hem, mo i maredem wan narafala woman bakegen, i mekem adaltri; mo huia i maredem woman ia we hasban blong hem i divos long hem, i mekem adaltri. I tru, mi talem long yufala, bae mi tekem yufala se yufala i olsem rij man ia.”