HJS, Mateo 4:1, 5–6, 8–9 (itandi sa Mateo 4:1, 5–6, 8–9; managsama nga mga kausaban gihimo diha sa Lucas 4:2, 5–11)
(Si Jesus gihatud sa Espiritu, dili ni Satanas.)
1 Unya si Jesus gigiyahan sa Espiritu, ngadto sa kamingawan, aron makig-uban sa Dios.
5 Unya si Jesus gidala ngadto sa balaan nga dakbayan, ug ang Espiritu mipahiluna kaniya sa kinatuktukan sa templo.
6 Unya ang yawa miduol ngadto kaniya ug miingon, Kon ikaw mao ang anak sa Dios, ihulog ang imong kaugalingon: kay kini gisulat, Siya mosugo sa iyang mga anghel sa pagbantay kanimo: ug sa ilang mga kamot sila mosawo kanimo, tingali og sa bisan unsa nga higayon madugmok ang imong tiil sa bato.
8 Ug usab, si Jesus diha sa Espiritu, ug kini midala kaniya ngadto sa hilabihan ka taas kaayo nga bukid, ug nagpakita kaniya sa tanan nga mga gingharian sa kalibutan ug sa himaya diha kanila.
9 Ug ang yawa miduol ngadto kaniya pag-usab, ug miingon, Tanan niini nga mga butang ako mohatag kanimo, kon ikaw moluhod ug mosimba kanako.
HJS, Mateo 4:11 (itandi sa Mateo 4:11)
(Si Jesus mipadala og mga anghel aron sa pagpangalagad ngadto ni Juan Bautista.)
11 Ug karon si Jesus nasayud nga si Juan gibalhug ngadto sa bilanggoan, ug siya mipadala og mga anghel, ug, tan-awa, sila miabut ug nangalagad ngadto kaniya.
HJS, Mateo 4:18 (itandi sa Mateo 4:19)
(Mga propeta sa Daang Tugon naghisgot kang Jesus.)
18 Ug siya miingon ngadto kanila, Ako mao siya kinsa gikasulat sa mga propeta; sunod kanako, ug Ako mohimo kaninyo nga mga mangingisda sa mga tawo.
HJS, Mateo 4:22 (itandi sa Mateo 4:23)
(Si Jesus nang-ayo sa mga katawhan kinsa mituo sa iyang ngalan.)
22 Ug si Jesus milibut sa tibuok Galilea nga nagtudlo diha sa ilang mga sinagoga, ug nagsangyaw sa ebanghelyo sa gingharian; ug nang-ayo sa tanan nga matang sa sakit, ug sa tanan nga matang sa mga sakit diha sa mga katawhan nga mituo sa iyang ngalan.