1 Na asɛnkyerɛdze kɛse bi puei wɔ sor, a ɔtse dɛ ndzɛmba a ɔwɔ asaase yi do ne nsaso; ɔbaa a ofura ewia na bosoom wɔ n’anandze, na nworaba duebien ahenkyɛw wɔ n’etsifi.

2 Na ɔbaa no nyinsen, ɔkekaa mu, rokõ awoo, na awoo no mu yɛɛ no dzen.

3 Na ɔwoo ɔbabanyimba, ɔno a ɔdze dadze poma robɔhwɛ aman nyina do; na ne ba no wohwiim no kɔr Nyankopɔn nkyɛn nye n’ahengua no ho.

4 Na asɛnkyerɛdze fofor bi so puei wɔ sor; na hwɛ, dragon memen kokroko a ɔwɔ etsir esuon nye mmbɛn du, na ahenkyɛw esuon wowɔ n’etsifi. Na no dua twee ɔsor nworaba nkyɛmu ebiasa mu kor, na ɔtoow hɔn guu asaase no do. Na dragon no gyinaa ɔbaa no a ɔawo no enyim, a ɔayɛ krado dɛ sɛ ɔwo ne ba no ara a ɔamen no.

5 Na ɔbaa no guanee kɔr sar no do, beebi a Nyame esiesie ama no, dɛ wɔnyɛn no wɔ hɔ mfe apem ahaebien eduosia no.

6 Na ɔkõ sii sor; Michael na n’abɔfoe nye dragon no dzii akõ; na dragon nye n’abɔfoe kõe tsiaa Michael;

7 Na dragon no enntum enndzi Michael do konyim, anaa abofra no, anaa ɔbaa no a ɔyɛ Nyankopɔn n’asɔr no, ɔno a wɔagye no efi ne yaw mu no, na ɔdze hɛn Nyankopɔn ahenman na ne Christ no abɔbɔ adze.

8 Na woennya tsenabew wɔ sor hɔ aamma dragon kɛse no, ɔno na wɔtoow no kyenee no; dɛm ɔwɔ dadaw no a wɔfrɛ no abɔnsam no, na wɔfrɛ no Satan so, a ɔdaadaa wiadze nyina no. Wɔtoow no kyeen asaase do; na wɔtoow n’abɔfoe kyenee kãa no ho.

9 Na metsee ndze kɛse bi rese wɔ sor dɛ, Afei na nkwagye aba, ɔnye Nyankopɔn ahoɔdzen na n’ahendzi, nye ne Christ no tum.

10 Osiandɛ wɔatow hɛn nuanom hɔn tõafo no akyen famu, ɔno a ɔtõatoaa hɔn wɔ hɛn Nyankopɔn enyim adzekyee nye adzesaa no.

11 Na wɔnam Eguambaa no bɔgyaa, na n’asɛm nye dasedzi do dzii no do konyim; na wɔanndɔ hɔnankasa hɔn nkwa, mbom wosiei dasedzi no dze kɔr owu mpo mu. Dɛm ntsi, O hom ɔsorsor, nye hom a hom tsetse no mu nyina hom ndzi dɛw.

12 Na iyinom ekyir no metsee ndze fofor bi rese dɛ, Hom a hom tsetse asaase do hom ndue, nyew, na hom a hom tsetse po nsupruw do! osiandɛ abɔnsam dze ebufuwhyew esian aba hom nkyɛn, osiandɛ onyim dɛ ne ber a ɔwɔ yɛ tsia.

13 Na aber a dragon no hun dɛ wɔatow no akyen asaase do no, ɔtseetsee ɔbaa a ɔwoo ɔbabanyimba no.

14 Dɛm ntsi, ɔmaa ɔbaa no ɔkɔr kese ne ntsaban ebien, dɛ ɔmfa nguan nkɔ sar no do, nkɔ ne tsenabea hɔ, bea a wɔbɛnyɛn no yie wɔ ber nye mber na aber fã, efi ɔwɔ no n’enyim.

15 Na ɔwɔ no puuw n’anomu nsu tse dɛ nsuyirii dze tsiiw ɔbaa no, dɛ ɔbɛma nsuyirii no afa no akɔ.

16 Na asaase no boaa ɔbaa no, na asaase buee n’anomu, na ɔmeen nsuyirii no a dragon no puwii fii n’anomu no.

17 Dɛm ntsi, dragon no no bo fuuw ɔbaa no, na ɔkɔr dɛ ɔnye ɔbaa n’asefo no rokɔkõ, hɔn a wodzi Nyankopɔn ne mbrasɛm do no, na wɔwɔ dasedzi wɔ Jesus Christ ho no.