1 John, Nyankopɔn no somfo ne nyikyerɛ, a Jesus Christ dze maa no, dɛ ɔmfa nkyerɛ n’asomfo ndzɛmba a otwar dɛ ɔba ntsɛm, dɛm na ɔdze somae na no bɔfoe dze brɛɛ no somfo John.

2 Ɔno a ɔgyee dase wɔ Nyankopɔn n’asɛm ho, nye dasedzi wɔ Jesus Christ ho, na ndzɛmba nyina a ohunii ho.

3 Nhyira nkã hɔn a wɔkenkan na hɔn a wotsie na wonya ntsease ma nkɔnhyɛ nsɛm yi, na wosie dɛm ndzɛmba a wɔakyerɛw wɔ mu no, osiandɛ Ewuradze ne mbae mber no abɛn.

4 Afei iyi nye John ne dasedzi a ɔdze kɛma asomfo esuon a wɔhwɛ nsɔr esuon a wɔwɔ Asia no do no. Adom nkã hom, na asomdwee a ofi nyia ɔwɔ hɔ, ɔwɔ hɔ dada, na ɔreba no; ɔno a ɔsomaa n’abɔfoe fii n’ahengua enyim, dɛ ɔmbɛgye dase nkyerɛ hɔn a wɔyɛ asomfo esuon wɔ nsɔr esuon no mu no.

5 Dɛm ntsi, emi, John, dasefo nokwafo no, gye dase wɔ ndzɛmba a ɔbɔfo no dze maa me ho, na ofi Jesus Christ ewufo mu abakan, na asaase do ahemfo Ɔhemba no.

6 Na nyia ɔdɔɔ hɛn no, enyimnyam nkã no, ɔno a ɔdze nankasa no bɔgyaa hohor hɛn fii hɛn bɔn ho, na ɔayɛ hɛn ahemfo na asɔfo ama n’Egya, Nyankopɔn. Ɔno na enyimnyam na tumdzi nkã no mbersantsen mfesantsen. Amen.

7 Na hwɛ, ɔnam nsuwusiw no mu reba a ɔnye n’ahotseweefo mpedu mpedu a wɔwɔ ahenman no mu, a n’Egya enyimnyam no efura no. Na enyiwa nyina bohu no; nye hɔn a wɔwɔɔ no peaa no, na ne ntsi wiadze mbusuakuw nyina bɔbɔ mbubuw. Ɔtse dɛm, Amen.

8 Emi nye Alpha na Omega, ahyɛse nye ewiei no, Ewuradze no na ɔase, nyia ɔwɔ hɔ, na nyia ɔwɔ hɔ dada, na nyia ɔbɛba, Tumfo no.