1 Ao e kaoti te kanikina ae korakora i karawa, ni katotongan bwain aon te aonaba; te aine ae kunikaiaki ma taai, ao namwakaina i aan waena, ao i aon atuna te baunuea ae itoi aika tebwi ma uoua.

2 Ao te aine are e bikoukou, e tang, n ariri ngke e bung, ao e maraki bwa e na bung.

3 Ao e bungia te nati te mwaane, are e na tautaekania botanaomata ni kabane ma te kai te biti; ao natin neierei e uotaki rake nakon te Atua ao ana kaintokanuea.

4 Ao e a manga kaoti te kanikina riki teuana i karawa; ao nooria, te rakon ae uraura ma ni korakora, are itiua atuna ao tebwina korona, ao itiua baunuea i aon atuna. Ao bukina e uakini kateni mwakoron itoini karawa, ao e tewe nakoi nako aon te aonaba. Ao te rakon e tei imatan te aine are e bung, e tauraoi ni kana natina i mwin bungiakina.

5 Ao e birinako te aine nakon te rereua, ike iai nnena ae katauraoaki iroun te Atua, bwa a na kamwarakea ikekei tenga uabubua ao onongaun ririki.

6 Ao bon iai te buaka i karawa; Mikaera ma ana anera a buaka ni kaitara te rakon; ao te rakon ma ana anera a buakana Mikaera;

7 Ao te rakon e aki tokanikai ni kaitara Mikaera, ao te ataei, ke te aine are bon ana ekaretia te Atua, are e tia ni kamaiuaki man marakina, ao e uota uean Atuara ao ana Kristo.

8 Akea te tabo ae kuneaki i karawa ibukin te rakon are korakora, are e teweaki nako, are te naeta ni kawai are aranaki bwa te riaboro, ao e aranaki naba bwa Tatan, are e mwamwana te aonaba ae bwanin; e bon teweaki nako nakon te aonaba; ao ana anera a teweaki nako ma ngaia.

9 Ao I ongo te bwana ae takarua ni kangai i karawa, E a roko ngkai te kamaiuaki, ao te korakora, ao uean Atuara ao mwaakan ana Kristo.

10 Bwa te tia bukinia tarira e a kabwakaaki, are e bukiniia imatan Atuara n te ngaina ao te bong.

11 Bwa a tia n tokanikai i aona n raraan te Tibu te Teei, ao n taekan aia kakoaua, bwa aki tangiri oin maiuia, ma a kawakina te kakoaua ni karokoa te mate. Ngaia are, kimwareirei O karawa, ao ngkami ake kam maeka iai.

12 Ao i mwin baikai I ongo te bwana riki teuana ae kangai, Te rekenikai nakoia taan maeka n te aonaba, eng, ao naake a maeka i aon aban marawa! bwa te riaboro e a ruo nakoimi, are e korakora unna, ibukina bwa e ataia bwa e a uarereke ana tai.

13 Bwa ngke e nooria te rakon bwa e teweaki nako nakon te aonaba, e bwainikirina te aine are e karika te nati te mwaane.

14 Ngaia are, e angan te aine uaai bain te ikare ae korakora, bwa e aonga ni birinako nakon te rereua, nakon ana tabo, are e na kamwarakeaki iai i nanon teuana te tai, ma tai, ma te itera n tai, n nako mai maitan te naeta.

15 Ao te naeta e kaotinakoa mai wiina te ran n aron te ieka ri mwin te aine, bwa e aonga ni karikia bwa e na uotaki nako n te ieka.

16 Ao te aonaba e buoka te aine, ao te aonaba e kaurea wiina, ao e kabwauta te ieka are e kaotinakoa te rakon mai wiina.

17 Ngaia are, te rakon e un iroun te aine, ao e nako ni karika te buaka ma nikiraia ana kariki, ake a kawakina ana tua te Atua, ao iai aia koaua iroun Iesu Kristo.