1 Ana Kaotioti Ioane, ae ana tia mwakuri te Atua, are e anganaki iroun Iesu Kristo, bwa e na kaoti nakoia ana taan mwakuri bwaai ake a kaan koro bukia, are e kanakoa ao e kaotaki iroun ana anera nakon ana tia mwakuri ae Ioane,

2 Are e kaota koauan ana taeka te Atua, ao te kakoaua ibukin Iesu Kristo, ao ibukin bwaai ni kabane ake e noori.

3 A na kakabwaiaaki naake a wareware, ao naake a ongo ao a mataata n taekan te taeka ni burabeti aei, ao a kawakini bwaai ake a koreaki i nanona, bwa ana tai n roko te Uea e a kaan.

4 Ngkai bon aei ana kakoaua Ioane nakoia itiman taan mwakuri ake a tararuai itiua mwangan te ekaretia i Atia. Te akoi nakoimi, ao te rau mai iroun teuare iai ngkai, ao iai ngkoa, ao iai n taai aika a na roko; are e tia ni kanakomaia ana anera mai matan ana kaintokanuea, bwa a na kakoaua nakoia naake itiman ake taan mwakuri i aon itiua mwangan te ekaretia.

5 Ngaia are, Ngai, ae Ioane, te tia kaotioti ae kakaonimaki, I kaota koauan bwaai ni kabane ake I anganaki iroun te anera, ao mai iroun Iesu Kristo te moan ua mai buakoia mate, ao Mataniwia uean te aonaba.

6 Ao nakon teuare e tangirira, ana bwai te neboaki; are e tebokira man are bure nako n oin raraana, ao e karaoira bwa uea ao ibonga nakon te Atua, are Tamana. Ana bwai te neboaki ao te tautaeka, n aki toki. Amen.

7 Bwa nooria, e nang nakomai i nanon nang ma tebwina tenga ana aomata aika itiaki ni ueana, ni kunnikaiaki ma mimitongin Tamana. Ao a na bane maata n nooria; ao naake a ewaria, ao ni kabane kaain aonaba ana tang ibukina. Eng, Amen.

8 Bwa e taku, Ngai te Arebwa ao te Omeka, te moan ao te kabane, te Uea, are iai ngkai, ao iai ngkoa, ao e na manga bon roko, ae Moan te Mwaaka.