1 Ket sadiay nagparang ti nabatad a tanda iti langit, a kaarngi dagiti banag iti daga; ti babai a nagaruat iti init, ken nagbatay iti bulan, ken nagkorona iti sangapulo-ket-dua a bituen.

2 Ket ti babai nga agdadagsen, nagsangit, iti rigatna nga agpasikal, ken ti saem ti panagpasngayna.

3 Ket nagpasngay iti ubing a lalaki, a mangituray kadagiti amin a pagilian babaen ti landok a pagkaptan; ket naipangato ti anakna iti trono ti Dios.

4 Ket sadiay nagparang ti sabali pay a tanda iti langit; ket adtoy, ti dakkel a nalabaga a dragon, nga addaan iti pito nga ulo ken sangapulo a sara, ken pito a korona kadagiti ulona. Ket ginuyod ti ipusna ti apagkatlo dagiti bituen iti langit, ket impuruakna ida iti daga. Ket nagtakder ti dragon iti sango ti babai a a nagpasngay, a sisasagana a mangalun-on iti anakna sakbay pay a maipasngay.

5 Ket naglibas ti babai iti langalang, a yan ti lugar nga insagana ti Dios a para kenkuana, tapno taraonanda sadiay iti unos ti sangaribu dua gasut ken tallopulo a tawen.

6 Ket adda idi gubat iti langit; kinaranget da Miguel ken dagiti anghelna ti dragon; ket kinaranget ti dragon ken dagiti anghelna ni Miguel;

7 Ket saan a nagballigi ti dragon ken ni Miguel, wenno iti ubing, wenno iti babai nga isu ti simbaan ti Dios, a naisalakan iti panagsagabana, ken nangyeg iti pagarian ti Diostayo ken ti Cristona.

8 Kasta met nga awan ti lugar a nasarakan iti langit a para iti dakkel a dragon, a napataPPuak; a naawagan ti lakay nga uleg iti sairo, ken kasta met a naawagan iti Satanas, a nangallilaw iti sangabukel a lubong; naitaPPuak iti daga; ket kaduana a naitaPPuak dagiti anghelna.

9 Ket nakangngegak iti napigsa a timek nga agkunkuna iti langit, Ita immayen ti pannakaisalakan, ken pigsa, ken ti pagarian ti Diostayo, ken ti bileg ti Cristona;

10 Ta napatappuaken ti namabasol kadagiti kakabsattayo, a nakapabasolanda iti imatang ti Diostayo iti aldaw ken rabii.

11 Ta naparmekda daytoy babaen ti dara ti Kordero, ken babaen ti balikas ti pammaneknekda; ta dida impateg ti bukodda a biag, ngem intakderanda ti pammaneknek uray pay iti patay. Ngarud, agrag-okayo O langlangit, ken dakayo nga agnaed kadakuada.

12 Ket kalpasan dagitoy a banag nakangngegak iti sabali pay a timek nga agkunkuna, Ay-ay pay dagiti agindeg iti daga, wen, ken dagiti agindeg kadagiti purpuro iti baybay! ta umayto kadakayo ti sairo, a kasta unay ti pungtotna, gapu ta ammona nga ababa unayen ti panawenna.

13 Ta idi nakita ti dragon a naitappuak iti daga, pinarigatna ti babai a nangipasngay iti anak-ti-tao.

14 Ngarud, naikkan ti babai iti dua a payak ti dakkel nga agila, tapno makalibas iti kabakiran, nga agturong iti lugarna, a nakataraknanna iti ababa a panawen, ken dagiti panawen, ken kagudua ti panawen, manipud iti rupa ti uleg.

15 Ket nangipugso ti uleg iti danum a panglayusna iti babai, tapno yanudna iti layus.

16 Ket tinulongan ti daga ti babai, ket nagnganga ti daga, ket inarub-obna ti layus nga impugso ti dragon.

17 Ngarud, kinapungtot ti dragon ti babai, ket napanna ginubat dagiti nabati a bukelna, a nangsurot kadagiti bilin ti Dios, ken naaddaan iti pammaneknek ken ni Jesucristo.