1 Mpe elembo moko ya monene emonanaki na lola, na bokokani ya biloko oyo ezali likolo ya mabele; mwasi moko alatisami moi, mpe sanza na nse ya makolo na ye, mpe likolo ya moto na ye motole ya minzoto zomi na mibale.

2 Mpe mwasi yango lokola azalaka na mwana, agangaki, mpo azalaki na mpasi ya kobota, mpe ayokaki mpasi wana ezalaki ye kobota.

3 Mpe abotaki mwana mobali, oyo asengelaki kokonza bikolo nyonso na lingenda ya ebende; mpe mwana na ye akamatanaki epayi ya Nzambe mpe kiti ya bokonzi na ye mpe lokola.

4 Mpe elembo mosusu emonanaki na lola; mpe tala, elima mabe ya motane, oyo azalaki na mitu sambo mpe maseke zomi, mpe mitole sambo likolo ya moto na ye. Mpe mokila na ye mobendaki eteni ya misato ya minzoto ya lola, mpe abwakaki yango na mabele. Mpe nyoka atelemaki liboso ya mwasi oyo asilaki kobota, pene na kolia mwana na ye nsima ya kobotama.

5 Mpe mwasi akimaki kati na esobe, wapi azalaki na esika elengelami na Nzambe, ete bakoka koleisa ye kuna mibu nkoto na nkama mibale mpe ntuku motoba.

6 Mpe etumba ezalaki na lola; Mikaele mpe banjelu na ye babundaki na nyoka; mpe nyoka na banjelu na ye babundaki na Mikaele;

7 Mpe nyoka alongaki Mikaele te, to mwana mpe te, to mwasi oyo azalaki eklezia ya Nzambe mpe te, oyo akangolamaki na mpasi na ye, mpe abotaki bokonzi ya Nzambe na biso mpe Klisto na ye.

8 Esika ezwamaki mpe te na lola mpo na nyoka, oyo babwakaki libanda; nioka oyo ya kala abiangami zabulu, mpe abiangami lisusu Satana, oyo azali kokosa mokili mobimba; babwakaki ye libanda na mabele; mpe banjelu na ye babwakamaki libanda elongo na ye.

9 Mpe nayokaki mongongo makasi kolobaka na lola, Sikawa lobiko oyo, mpe bokasi, mpe bokonzi ya Nzambe na biso, mpe nguya ya Klisto na ye;

10 Mpo oyo afundaka bandeko na biso bandimi abwakami na nse, oyo azalaki kofunda bango liboso ya Nzambe moi mpe butu.

11 Mpo basili kolonga ye na makila ya Mwana ya mpate, mpe na liloba ya litatoli ya bango; mpo balingi bomoi na bango te, kasi babomaki litatoli na bango kutu kino kufa. Boye, bosepela, O lola, mpe bino baoyo bofandi kati na yango.

12 Mpe nsima ya biloko oyo nayokaki mongongo mosusu kolobaka, Lisuma na bafandi ya mabele, iyo, mpe bango oyo bafandi likolo ya mabongo ya mbu! Mpo zabulu azali kokita epayi na bino, kozalaka na nkele monene, mpo ete ayebi ete azali bobele na ntango mokuse.

13 Mpo ntango nyoka amonaki ete abwakamaki na mabele, aniokolaki mwasi oyo abotaki mwana mobali.

14 Boye, mapapu mibale ya engondo moko monene epesamaki na mwasi, ete akoka kokima na esobe, na esika na ye, wapi aleisami mpo na ntango moko, mpe bantango, mpe ndambo moko ya ntango, uta na elongi ya nioka.

15 Mpe nyoka asanzaki mai uta na monoko na ye lokola mpela nsima ya mwasi, ete akoka kobenda ye na mpela.

16 Mpe mabele masalisaki mwasi, mpe mabele efungolaki monoko na ye, mpe mamelaki mpela oyo nyoka asanzaki uta na monoko na ye.

17 Boye, nyoka azalaki na nkanda na mwasi, mpe akendaki kosala etumba na montika ya nkona na ye, oyo ezali kobomba mitindo ya Nzambe, mpe oyo ezali na litatoli ya Yesu Klisto.