5 Na ber a yɛwɔ honam mu no, bɔn ne nhyɛdodze a, ɔmmfa mbra kwan no, no dzii dwuma wɔ hɛn nyimpadua mfafakuwa mu dze soow aba kɔr owu mu.

6 Mbom afei dze wɔagye hɛn efi mbra no ase bea a nkyɛ wɔdze hɛn mu no, mbra no ewu ama hɛn, ama yɛdze sunsum fofor aasom, na nnyɛ akyerɛwaba dadaw mu no do.

7 Ebɛn mbɔ na yɛbɛse? Ana mbra no yɛ bɔn a? Nyame mpa ngu. Dabida, naaso nna nkyɛ minnyim bɔn, mbom gyedɛ ɔnam mbra no mu; Osiandɛ nna nkyɛ minnyim akɔndɔbɔn, sɛ mbra no annse dɛ, Mma w’enyi mmber adze a.

8 Mbom bɔn, nam mbrasɛm no do, maa akɔndɔdze ahorow nyina soɛrsoɛr mo mu. Na mbra nnyi hɔ a nna bɔn ewu.

9 Mpɛn bi mobɔɔ me bra a manntõ mbra no, mbom ber a Christ ne mbrasɛm bae no, bɔn nyanee, na muwui.

10 Na ber a menngye Christ ne mbrasɛm no a ɔbae no nndzi no, dza wɔhyehyɛɛ dze kɔ nkwa mu no; muhun dɛ oebu me fɔ akɔ owu mu.

11 Na bɔn, nam kwan do poow mbrasɛm no, na ɔdaadaa me; na ɔnam do kum me.

12 Naaso, muhun dɛ mbra no yɛ krɔnkrɔn, na mbrasɛm no yɛ krɔnkrɔn, na ɔtsen, na oye.

13 Ɔyɛ dɛn mbɔ na adze a oye ayɛ adze a ɔdze owu bɛba mo do? Nyame mpa ngu. Mbom bɔn, ama abɛyɛ dɛ ɔyɛ bɔn na ɔnam do ma dza oye dze owu aba mo do; ama bɔn, anam mbrasɛm do ayɛ adze a omuo mbordo mbordo.

14 Na yenyim dɛ mbrasɛm no yɛ sunsum mu dze; mbom ber a mehyɛ mbra no ase no, nna meyɛ honam dze, a ɔatɔn me ahyɛ bɔn ase.

15 Mbom afei mayɛ sunsum mu dze; dɛm ntsi dza wɔhyɛ me dɛ menyɛ no, meyɛ; na dza wɔahyɛ me dɛ mma minngyaa no, minngyaa.

16 Na dza minyim dɛ ɔnntsen no, merennyɛ; na dza ɔyɛ bɔn no, mekyir.

17 Sɛ nkyii mannyɛ dza mirinngyaa no a, mepen mbra no do, dɛ oye; na wommbu me fɔ.

18 Afei nkyii, nnyɛ emi bi na meyɛ bɔn; mbom mepɛ dɛ mehyɛ bɔn a ɔtse mo mu no do.

19 Osiandɛ minyim wɔ mo mu, dɛ, wɔ mo honam mu, biribi papa biara nntse mu; na dza mepɛ no nye me tse, mbom mebɛyɛ dza oye no munnhu, gyedɛ wɔ Christ mu.

20 Na papa no a nkyɛ mebɛyɛ no ber a mehyɛ mbra no ase no, munnhu no dɛ ɔyɛ papa; dɛm ntsi, mennyɛ.

21 Mbom bɔn no a nkyɛ merennyɛ no wɔ mbra no ase no, muhu no dɛ oye; ɔno na meyɛ.

22 Afei sɛ meyɛ dza, ɔnam Christ no mboa do no merennyɛ no wɔ mbra no ase a, mennhyɛ mbra no ase; na nnyɛ dɛ morohwehwɛ ayɛ bɔn bio, na mbom dɛ mebɛhyɛ bɔn a ɔtse mo mu no do.

23 Muhu dɛ, wɔ mbra no ase no, dɛ ber a mebɛyɛ dza oye no nna bɔn nye me tse; osiandɛ mo mu-nyimpa afamu dze m’enyi gye Nyankopɔn mbra ho.

24 Na afei muhu mbra fofor, Christ ne mbrasɛm no mpo, na woetsintsim no wɔ m’adwen mu.

25 Mbom me nyimpadua mfafakuwa no kõ tsia m’adwen mu mbra no, na ɔfa me ndɔmmum ma bɔn mbra a ɔwɔ me nyimpadua mfafakuwa mu no.

26 Na sɛ mennhyɛ bɔn a ɔwɔ mo mu no do, na mbom mosom bɔn mbra no wɔ honam mu a; Ao, ɔwerɛhonyi a ɔtse dɛ emi! Woana bɛgye me efi sunsum mu owu yi mu.

27 Menam hɛn Ewuradze Jesus Christ mu da Nyankopɔn ase, nkyii, ama emi mankasa medze adwen asom Nyankopɔn ne mbra no.