Koe Tohi a Eseta

¶ 1 BEA nae hoko o behe i he gaahi aho o Ahasivelo, (koe Ahasivelo eni nae bule mei Initia o a‘u ki Itiobea, ki he vahe fonua e teau ma uofulu ma fitu:)

2 I he gaahi aho koia, i he ene nofo ae tu‘i ko Ahasivelo, ki he nofoa fakatu‘i o hono buleaga, aia nae i Susani koe kolo fakaeiki.

3 Naa ne fai ae katoaga ki he ene gaahi houeiki kotoabe mo ene kau tamaioeiki i hono tolu ta‘u o ene bule: koe malohi o Beasia mo Mitia, koe gaahi houeiki, mo kinautolu nae bule ki he gaahi vahe fonua, nae i hono ao:

4 Bea naa ne fakaha ai i he gaahi aho lahi ae koloa o hono buleaga fakamanavahe, moe lahi o ene ogoogolelei aana, io, i he aho e teau ma valugofulu.

5 Bea i he hili ae gaahi aho koia, nae fai ae katoaga e he tu‘i ki he kakai kotoabe nae i Susani koe kolo fakaeiki, ki he lahi, moe jii, i he gaahi aho e fitu, i he loto a oe goue i he fale fakaeiki oe tu‘i;

6 Aia nae i ai ae gaahi  buibui hinehina, mo lanu akau mata, mo lanu moana, nae fakamau aki ae gaahi afo oe filo tubenu tuovalevale moe bauhiuhi ki he gaahi kave‘i siliva moe gaahi bou oe maka hinehina: nae koula mo siliva ae gaahi mohega nae tuu ki he faliki  fale oe maka hinehina, moe kulokula, moe lanu moana, moe hinehina, moe uliuli.

7 Bea naa nau atu ae mea inu kiate kinautolu i he gaahi ibu koula, (nae fai kehekehe ae gaahi ibu kotoabe,) moe uaine galigali tu‘i lahi aubito, o fakatatau ki he aga oe tu‘i.

8 Bea nae fai ae inu o fakatatau ki he fono; nae ikai bule‘i malohi e ha toko taha: he nae behe e he fono ae tu‘i ki he kau matābule kotoabe o hono fale, ke nau fai taki taha kotoabe o fakatatau ki hono loto oona.

9 Bea nae fai foki e Vasiti koe tu‘i fefine ae katoaga ki he nau fefine i he fale fakatu‘i aia nae oe tu‘i ko Ahasivelo.

¶ 10 Bea i hono fitu oe aho i he fiefia ae loto oe tu‘i i he uaine, naa ne fekau kia Mihumani, mo Bisita, mo Habona, mo Bikita, mo Abakita, mo Setali, mo Kakasi, koe kau tauhi fale e toko fitu nae talifekau i he ao o Ahasivelo koe tu‘i.

11 Ke nau omi a Vasiti koe tu‘i fefine ki he ao oe tu‘i moe tatā fakaeiki, ke fakaha ki he kakai moe gaahi houeiki hono hoihoifua: he nae hoihoifua ia ke mamata ki ai.

12 Ka nae ikai fie ha‘u ae tu‘i fefine ko Vasiti i he fekau ae tu‘i i he kau talafekau: koia nae tubutamaki ai ae tu‘i, bea lili ene houhau iate ia.

¶ 13 Bea behe ai e he tu‘i ki he kau tagata boto, aia nae ilo ae gaahi kuoga, (he nae behe be ae aga ae tu‘i kiate kinautolu kotoabe nae ilo ae fono moe fakamāu:

14 Bea nae hoko moia a Kasina, mo Setali, mo Atimata, mo Tasisi, mo Melesi, mo Masina, mo Mimukani, koe houeiki e toko fitu o Beasia mo Mitia, aia nae mamata ki he fofoga oe tu‘i, bea nae nofo ki mua i he buleaga;)

15 Koeha te tau fai ki he tu‘i fefine, ko Vasiti o fakatatau ki he fono, koe mea i he ikai te ne fai ae fekau ae tu‘i ko Ahasivelo i he kau talafekau?

16 Bea nae lea a Mimukani i he ao oe tu‘i moe gaahi houeiki,  o behe, Nae ikai fai hala e Vasiti koe tu‘i fefine ki he tu‘i be, ka ki he gaahi houeiki kotoabe, bea ki he kakai kotoabe aia oku i he gaahi buleaga oe tu‘i ho Ahasivelo.

17 Koeuhi e ogo atu ki he mamao ae gaue ni ae tu‘i fefine ki he kau fefine kotoabe, koia te nau mata manuki ai ki ho nau gaahi unoho, oka fakaogo atu ia, Nae fekau e he tu‘i ko Ahasivelo ke omi ae tu‘i fefine ki hono ao, ka nae ikai ha‘u ia.

18 E lea behe be foki e he houeiki fefine o Beasia, mo Mitia he aho ni ki he gaahi houeiki ae tu‘i, aia kuo ogo‘i ae gaue ni ae tu‘i fefine. Koia e tubu ai ae manuki lahi moe ita.

19 Bea kabau oku lelei ki he tu‘i, ke fai eia ae fono fakatu‘i, bea tuku ke tohi ia i he gaahi fono oe kakai Beasia moe kakai Mitia, koeuhi ke oua naa fakakehe ia, koeuhi ke oua naa toe ha‘u a Vasiti ki he ao oe tu‘i ko Ahasivelo: bea ke foaki e he tu‘i hono tuuga fakatu‘i ki ha toko taha oku lelei lahi iate ia.

20 Bea ka fakaogo atu ae fono ae tu‘i aia te ne fai ki he botu kotoabe o hono buleaga, (he oku lahi ia,) e atu e he gaahi fefine unoho ae fakaabaaba ki ho nau gaahi unoho, be koe lahi ia be koe jii.

21 Bea nae malie ai ae tu‘i moe gaahi houeiki i he lea koia; bea nae fai e he tu‘i o fakatatau ki he lea a Mimukani.

22 He naa ne ave ae gaahi tohi ki he gaahi botu kotoabe oe buleaga oe tu‘i, ki he buleaga kotoabe o fakatatau ki he tohi o hono lea, bea ki he kakai kotoabe o tatau moe nau lea, koeuhi ke bule taki taha ae tagata i hono fale oona, bea koeuhi ke fanogonogo ia i he lea ae kakai kotoabe.