¶ 1 BEA nae ikai faa mohe ae tu‘i i he bo koia, bea nae fekau eia ke omi ae tohi fakamatala mea fakabuleaga: bea nae lau ia i hono ao.

2 Bea nae ilo i he tohi, nae fakaha e Motekiai a Bikitani mo Telesi, koe ogo tauhi fale oe tu‘i, aia nae iate kinaua ae mataba, aia naa na kumi ke labaji ae tu‘i ko Ahasivelo.

3 Bea nae behe e he tu‘i, Koeha ae fakaogoogo lelei moe fakahikihiki nae fai kia Motekiai ki he mea ni? Bea behe ai e he kau tamaioeiki ae tu‘i aia nae tauhi ia, Nae ikai ha mea nae fai maana.

¶ 4 Bea behe e he tu‘i, Kohai oku i loto fale? Bea vakai kuo hokoage a Hamani ki he fale itua oe fale oe tu‘i, ke lea ki he tu‘i ke tautau a Motekiai ki he tautauaga naa ne teuteu.

5 Bea nae behe e he kau tamaioeiki ae tu‘i kiate ia, Vakai, Ko Hamani oku tuu i he fale  i tua. Bea behe e he tu‘i, Tuku ke ha‘u ia.

6 Koia nae huage a Hamani. Bea behe e he tu‘i kiate ia, Koeha oku lelei ke fai ki he tagata oku fiefia ae tu‘i ke fakaogoogo lelei? Bea nae mahalo e Hamani i hono loto, Kohai e fiefia ai ae tu‘i ke fakaogolelei o lahi hake iate au?

7 Bea nae lea a Hamani ki he tu‘i,  o behe, Koe tagata oku fiefia ai ae tu‘i ke fakaogoogolelei.

8 Tuku ke omi ae gaahi kofu fakatu‘i aia oku faa ai e he tu‘i, moe hose oku heka ai ae tu‘i, moe tatā fakatu‘i aia oku ai ki hono fofoga:

9 Bea tuku ae gaahi kofu ni moe hose ki he nima oe toko taha oe houeiki lahi oe tu‘i, koeuhi, ke nau teu‘i aki ia ae tagata aia oku fiefia ai ae tu‘i ke fakahikihiki, bea omi heka hose ia i he hala lahi oe kolo, bea lea kalaga i hono ao, E fai behe ki he tagata aia oku loto fiemalie ae tu‘i ke fakahikihiki.

10 Bea nae behe e he tu‘i kia Hamani, Fai vave, ave ae gaahi kofu moe hose, o hage koia kuo ke tala, bea fai behe be kia Motekiai koe Jiu, aia oku nofo i he mataba oe tu‘i: oua naa liaki ha mea jii i he mea kotoabe kuo ke lea ki ai.

11 Bea nae too ai e Hamani ae gaahi kofu, moe hose, o ne teu‘i a Motekiai, o ne ave ia i he heka hose i he hala lahi oe kolo, bea nae kalaga i hono ao, E fai behe be ki he tagata aia oku loto fiemalie ki ai ae tu‘i ke fakahikihiki.

¶ 12 Bea nae toe ha‘u a Motekiai ki he mataba oe tu‘i. Ka nae alu fakavave a Hamani ki hono fale, kuo ufiufi hono ulu.

13 Bea nae tala e Hamani kia Selesi ko hono unoho mo hono kaiga kotoabe ae mea kotoabe kuo hoko kiate ia. Bea nae behe ai e he ene kau tagata boto mo Selesi ko hono unoho, Kabau oku i he hako oe kakai Jiu a Motekiai, aia koe ao oona kuo kamata ai hoo higa, e ikai te ke faa iku‘i ia, ka koe mooni te ke higa i hono ao.

14 Bea lolotoga e nau kei talanoa moia, mo ene ha‘u ai ae kau tauhi fale oe tu‘i, bea fakatootoo ke omi a Hamani ki he katoaga nae teu e Eseta.