¶ 1 BEA hili ae gaahi mea ni, bea kuo oji ae houhau ae tu‘i ko Ahasivelo, naa ne manatu‘i a Vasiti, moia naa ne fai, moia nae tuutuuni ke fai kiate ia.

2 Bea behe ai e he kau tamaioeiki ae tu‘i aia nae tauhi ia, Tuku ke kumi ha kau tāuboou hoihoifua ma ae tu‘i:

3 Bea ke fakanofo e he tu‘i ae kau matābule i he gaahi botu kotoabe o hono buleaga, koeuhi ke nau tanaki ke fakataha kotoabe ae kau tāuboou hoihoifua ki Susani koe kolo fakaeiki, ki he fale oe kau fefine, ke he tauhi o Hekai, koe tauhi fale oe tu‘i, aia oku tauhi ae kau fefine: bea ke atu kiate kinautolu e nau gaahi mea fakamaa:

4 Bea iloga ae tāuboou aia e fiemalie ki ai ae tu‘i, tuku ia ke tu‘i fefine koe fetogi o Vasiti. Bea nae fiemalie ae tu‘i i he mea koia; bea naa ne fai ai.

¶ 5 Bea nae i Susani koe kolo fakaeiki, ae Jiu e taha, ko Motekiai hono higoa, koe foha o Jaili, koe foha o Simi, koe foha o Kisi, koe tagata Benijimani:

6 Aia nae fetuku mei Jelusalema i he fakabobula aia nae fetuku ki he mamao mo Jekonia koe tu‘i o Juta, aia nae fetuku e Nebukanesa koe tu‘i o Babilone o ave ki he mamao.

7 Bea naa ne ohi a Hatasa, aia ko Eseta, koe ofefine o hono tuajina: he nae ikai haane tamai be fa‘e, bea nae matamata lelei mo hoihoifua ae tāuboou, aia nae ohi e Motekiai i he bekia ene tamai mo ene fa‘e, o ne ofefine aki ia.

¶ 8 Bea nae hoko o behe, i he ogo‘i ae fekau ae tu‘i mo ene tuutuuni, bea kuo fakakatoa ae kau taahine toko lahi ki Susani koe kolo fakaeiki, ki he tauhi o Hekai, nae omi foki a Eseta ki he fale oe tu‘i, ki he tauhi o Hekai, koe tauhi oe kau fefine.

9 Bea nae fiemalie ia ki he taahine, bea naa ne ofeina ia: bea naa ne atu leva kiate ia ae gaahi mea ma a ene fakamaa ia, fakataha moe gaahi mea nae kau tonu kiate ia, moe kau taahine e toko fitu, aia nae tāu ke foaki kiate ia, mei he fale oe tu‘i: bea naa ne tomua fili ia mo ene kau taahine ki he botu lelei lahi oe fale oe kau fefine.

10 Nae teeki ai fakaha e Eseta hono kakai be ko hono kaiga: he nae fekau ia e Motekiai ke oua naa fakaha ia.

11 Bea nae eveeva a Motekiai i he aho kotoabe i he mata fale oe lotoa oe fale oe kau fefine, ke ilo be oku fefe‘i a Eseta, bea koeha e fai kiate ia.

¶ 12 Bea i he hoko ae lakaga oe taahine kotoabe ke hu ki loto ki he tu‘i ko Ahasivelo, hili ene nofo i he mahina e hogofulu ma ua, o fakatatau ki he aga ae kau fefine, (he nae behe be hono fakaoji ae gaahi aho o ho nau fakamaa, io, ae mahina e ono moe lolo koe mula, moe mahina e ono moe gaahi mea namu kakala, bea moe gaahi mea kehe koe mea fakamaa ae kau fefine.)

13 Bea nae ha‘u behe be ae taahine kotoabe ki he tu‘i: iloga aia kotoabe naa ne fili ke tauga aki mei he fale oe kau fefine, ke alu ki he fale oe tu‘i, nae foaki ia kiate ia.

14 Nae hu ki ai ia i he efiafi, bea bogibogi ai nae liu mai ia ki hono ua oe fale oe kau fefine, ki he tauhi a Seasikasi, koe tauhi fale ae tu‘i, aia nae tauhi ae kau jinifu: nae ikai te ne toe ha‘u ki he tu‘i, o kabau nae ikai fiemalie ae tu‘i iate ia, bea ne ui ia i hono higoa.

¶ 15 Bea i he hoko ae lakaga o Eseta, koe ofefine o Abieli koe tuajina o Motekiai, aia naa ne ohi ko hono ofefine, ke hu ia ki loto ki he tu‘i, nae ikai te ne fili ha mea e taha ka koe mea be nae atu kiate ia e Hekai, koe tauhi fale ae tu‘i, moe haatukaui oe kau fefine. Bea nae ofeina a Eseta e he kakai kotoabe nae mamata kiate ia.

16 Koia, nae ave a Eseta ki he tu‘i ko Ahasivelo ki hono fale fakatu‘i i hono hogofulu oe mahina, aia koe mahina ko Tibeti, i hono fitu ta‘u o ene bule.

17 Bea nae ofa lahi ae tu‘i kia Eseta i he kau fefine kotoabe, bea nae ma‘u eia ae lelei moe agaofa i hono ao o lahi hake i he kau tāuboou kotoabe; koia naa ne ai ai ae tatā fakatu‘i ki hono ulu, bea fakanofo ia koe tu‘i fefine koe fetogi o Vasiti.

18 Bea nae fai ai e he tu‘i ae katoaga lahi ki he ene gaahi houeiki kotoabe mo ene kau tamaioeiki, io koe katoaga o Eseta: bea naa ne fai ae vetebobula i hono gaahi buleaga, o ne fai ae gaahi foaki, o tāu moe monuia oe tu‘i.

19 Bea i he fakakatoa ae kau taahine ko hono liuga ua, nae toki nofo ai a Motekiai i he mataba oe tu‘i.

20 Bea nae teeki ai fakaha e Eseta a hono kaiga be ko hono kakai: o hage koe fekau bau e Motekiai kiate ia: he nae fai e Eseta ki he fekau a Motekiai kiate ia, o hage koia naa ne fai i he ene kei tauhi ia.

¶ 21 I he gaahi aho koia, lolotoga ene nofo a Motekiai i he mataba oe tu‘i, nae ita ae tauhi e toko ua ae tu‘i, ko Bikitani mo Telesi, iate kinautolu nae tauhi ae mataba, o na kumi ke ala ki he tu‘i ko Ahasivelo.

22 Bea nae ilo ae mea ni e Motekiai, aia nae tala ia kia Eseta koe tu‘i fefine, bea fakaha ia e Eseta ki he tu‘i i he higoa o Motekiai.

23 Bea i he fai ae eke ki he mea ni, nae ilo hono mooni: koia nae tautau ai akinaua fakatouoji ki ha akau: bea nae tohi ia i he tohi fakamatala mea i he ao oe tu‘i.