¶ 1 BEA hili ae gaahi mea ni nae fakahikihiki e he tu‘i ko Ahasivelo a Hamani koe foha o Hamitati koe tagata Ekaki, mo ne hakeaki‘i ia, bea ai hono nofoa ke maoluga hake i he gaahi houeiki nae iate ia.

2 Bea nae bunou ae kau tamaioeiki kotoabe, aia nae i he mataba oe tu‘i, o nau fakaabaaba kia Hamani: he nae behe be ae fekau ae tu‘i iate ia. Ka nae ikai bunou a Motekiai, be fai fakaabaaba kiate ia.

3 Bea behe ai e he kau tamaioeiki ae tu‘i, aia nae nofo i he mataba ae tu‘i kia Motekiai, Koeha oku ke talagataa ai ki he fekau ae tui?

4 Bea nae hoko o behe, i he e nau lea kiate ia i he aho kotoabe, bea ikai tokaga ia kiate kinautolu, naa nau  toki tala ia kia Hamani, ke vakai, be e tuu mau ae aga a Motekiai: he naa ne tala kiate kinautolu koe Jiu ia.

5 Bea i he vakai a Hamani nae ikai bunou a Motekiai, be fakaabaaba kiate ia, nae bito ai a Hamani i he ita.

6 Bea nae behe eia koe mea noabe ke ala kia Motekiai toko taha be: he naa nau fakaha kiate ia ae kakai o Motekiai: koia nae tokaga e Hamani ke fakaauha ae gaahi Jiu kotoabe i he buleaga kotoabe o Ahasivelo, io koe kakai o Motekiai.

¶ 7 I he uluaki mahina, aia koe mahina ko Nisani, i hono hogofulu ma ua oe ta‘u oe bule oe tu‘i ko Ahasivelo, naa nau li a Buli, aia koe talotalo, i he ao o Hamani, i he aho hokohoko be, bea mei he mahina ki he mahina, o hoko ki hono hogofulu ma ua ae mahina, aia koe mahina ko Atali.

¶ 8 Bea nae behe e Hamani ki he tu‘i ko Ahasivelo, Oku ai ae kakai e taha kuo movetevete mamao atu o nofo tuku fakaholo i he lotolotoga oe kakai i he gaahi botu kotoabe o ho buleaga; bea oku kehe e nau gaahi fono i he kakai kotoabe; bea oku ikai foki te nau tokaga ki he gaahi fono ae tu‘i: koia oku ikai aoga ki he tu‘i ke kataki akinautolu.

9 Kabau oku lelei ki he tu‘i, tuku ke tohi koeuhi ke fakaauha akinautolu: bea teu totogi ki he nima okinautolu oku tuku ki ai ae gaue ni, ae taleniti siliva e taha mano, ke omi ki he gaahi fale koloa oe tu‘i.

10 Bea nae too e he tu‘i hono mama mei hono nima, bea ne foaki ia kia Hamani koe foha o Hamitata koe tagata Ekaki, koe fili oe kakai Jiu.

11 Bea behe e he tu‘i kia Hamani, Kuo foaki ae siliva kiate koe, moe kakai foki, ke ke fai kiate kinautolu aia oku mata lelei kiate koe.

12 Bea nae toki ui ke fakataha ae kau tagata tohi ae tu‘i i hono hogofulu ma tolu oe aho oe uluaki mahina, bea nae tohi o fakatatau ki he mea kotoabe nae fekau e Hamani ki he kau matābule moe kau bule fonua aia nae bule i he gaahi buleaga, bea ki he kau bule kotoabe oe kakai kotoabe i he gaahi buleaga kotoabe o fakatatau moe tohi oia, bea ki he kakai kotoabe o tāu moe nau lea: nae tohi ia i he huafa oe tu‘i ko Ahasivelo, bea fakamau aki ae mama oe tu‘i.

13 Bea nae ave ae gaahi tohi i he kau ave tohi ki he gaahi buleaga kotoabe oe tu‘i, ke maumau, ke tamate‘i, mo fakaauha, ae kakai Jiu kotoabe, ae iki moe motua, ae tamaiki iki, moe kau fefine, i he aho be taha, io i hono aho e hogofulu ma tolu i hono hogofulu ma ua oe mahina, aia koe mahina ko Atali, bea ke faao ae vete anautolu.

14 Ko hono hiki oe tohi koe fekau ke atu ki he buleaga kehekehe kotoabe, nae fakaha atu ki he kakai kotoabe, koeuhi ke nau tali teu be ki he aho koia.

15 Nae alu atu kituaa ae kau ave tohi, he nae fakavavevave ia e he fekau ae tu‘i, bea nae fai ae fono i Susani koe kolo fakaeiki. Bea nae nofo hifo ae tu‘ mo Hamani ke inu: ka nae maveuveu ae kolo ko Susani.