¶ 1 KOIA nae ha‘u ai ae tu‘i mo Hamani ki he katoaga mo Eseta koe tu‘i fefine.

2 Bea nae toe lea ae tu‘i kia Eseta i hono ua oe aho i he katoaga inu uaine, Koeha hoo kole e tu‘i fefine ko Eseta? bea e tuku ia kiate koe: bea koeha ia a hoo kole? bea e fai ia o a‘u ki hono vahe ua oe buleaga.

3 Bea lea ai a Eseta koe tu‘i fefine, o ne behe, Kabau kuou ma‘u ae ofa i ho ao, E tu‘i, bea kabau oku lelei ki he tu‘i, ke foaki eku moui kiate au i he eku kole, mo hoku kakai i he eku tala:

4 He kuo fakatau akimautolu, Ko au mo hoku kakai, ke maumau‘i, mo tamate‘i, bea ke fakaauha. Bea ka ne takatau akimautolu ke hoko koe kau tagata bobula, moe kau fefine bobula, behe, teu logobe au, ka koe mooni e ikai mafai e he fili ke totogi hono kovi ki he tu‘i.

¶ 5 Bea nae lea ai ae tu‘i ko Ahasivelo kia Eseta koe tu‘i fefine o behe, Kohai ia, bea kofaa ia, aia nae fielahi i hono loto ke fai behe?

6 Bea nae behe e Eseta, Koe tagata agatuu moe fili, ko Hamani agakovi ni. Bea nae toki manavahe a Hamani i he ao oe tu‘i moe tu‘i fefine.

¶ 7 Bea nae tuu hake ae tu‘i i he ene tubutamaki lahi mei he katoaga uaine, bea alu kitua ia ki he goue oe fale; bea nae tuu hake a Hamani ke fai ae kole koeuhi ko ene moui kia Eseta koe tu‘i fefine; he nae mamata ia kuo tuutuuni ae kovi ke hoko kiate ia mei he tu‘i.

8 Bea nae liu mai ae tu‘i mei he goue oe fale, ki he botu oe katoaga uaine: bea kuo to a Hamani ki he tokotoaga aia nae i ai a Eseta. Bea behe e he tu‘i, Bea e tohotoho eia ae tu‘i fefine foki i he fale i hoku ao? Bea i he alu ae lea mei he fofoga oe tu‘i, naa nau ufiufi ae mata o Hamani.

9 Bea behe e Habona koe tauhi fale e toko taha i he ao oe tu‘i, Vakai foki, koe tautauaga koe haga e teau hono maoluga, aia nae gaohi e Hamani ma a Motekiai, aia nae lea lelei ma ae tu‘i, oku tuu i he fale o Hamani. Bea behe ai e he tu‘i, Tautau ia ki ai.

10 Koia naa nau tautau a Hamani i he tautauaga naa ne teuteu ma a Motekiai. Bea nae toki lolou ai houhau ita ae tu‘i.