¶ 1 NAE foaki e he tu‘i ko Ahasivelo i he aho koia ae fale o Hamani koe fili oe kakai Jiu, kia Eseta koe tu‘i fefine. Bea nae ha‘u a Motekiai ki he ao oe tu‘i; he nae fakaha e Eseta a ena kaiga moia.

2 Bea nae too e he tu‘i hono mama, aia naa ne ma‘u mei a Hamani, o ne foaki ia kia Motekiai. Bea nae fakanofo e Eseta a Motekiai ke bule ki he fale o Hamani.

¶ 3 Bea nae toe lea a Eseta i he ao oe tu‘i, bea fakatomabee ki hono va‘e, o ne kole tagi loimata ke ne taofi ae kovi nae laga‘i e Hamani koe tagata Ekaki, moe tuutuuni aia naa ne tuutuuni kovi ki he kakai Jiu.

4 Bea nae mafao atu e he tu‘i ae tokotoko koula kia Eseta. Koia nae tuu ai a Eseta, bea tuu i he ao oe tu‘i,

5 O ne behe, Kabau oku lelei ki he tu‘i, bea kabau kuou ma‘u ae ofa i hono ao, bea kabau oku matamata totonu ae mea ni i he ao oe tu‘i bea oku ou leleiia au i hono ao, tuku ke fai ae tohi ke fakakehe ae gaahi tohi nae filioi e Hamani koe foha o Hamitata koe tagata Ekaki, aia naa ne tohi ke fakaauha ae kakai Jiu oku i he gaahi buleaga kotoabe oe tu‘i:

6 He teu kataki fefe‘i ke mamata ki he kovi aia e hoko ki hoku kakai? bea e fefe‘i eku kataki ae mamata ki he fakaauha a hoku kaiga?

¶ 7 Bea nae behe e he tu‘i ko Ahasivelo kia Eseta koe tu‘i fefine mo Motekiai koe Jiu, Vakai, kuou foaki kia Eseta ae fale o Hamani, bea kuo nau tautau ia ki he tautauaga, koe mea i he ene hilifaki hono nima ki he kakai Jiu.

8 Mou tohi foki ma ae gaahi Jiu, ae mea oku lelei ki akimoua, i he huafa oe tu‘i, bea buluji ia aki ae mama ae tu‘i: he koe tohi kuo tohi i he huafa oe tu‘i, bea fakamau aki ae mama oe tu‘i, oku ikai gofua ke fakakehe ia e ha toko taha.

9 Bea nae fekau ke ha‘u ae kau tagata tohi ae tu‘i i he aho koia i hono tolu oe mahina, aia koe mahina ko Sivani, i hono aho uofulu ma tolu; bea nae tohi o fakatatau ki he mea kotoabe nae fekau e Motekiai ki he kakai Jiu, bea ki he kau bule, moe kau matābule, moe kau fetogi bule moe kau bule oe gaahi buleaga aia oku tuu mei Initia ki Itiobea, koe buleaga e teau moe uofulu ma fitu, ki he buleaga kotoabe o fakatatau ki he tohi ki ai, bea ki he kakai kotoabe i he e nau lea, bea ki he gaahi Jiu o fakatatau ki he e nau tohi, bea fakatatau ki he e nau lea.

10 Bea nae tohi ia i he huafa oe tu‘i ko Ahasivelo, bea fakamau aki ia ae mama oe tu‘i, bea ne ave ae gaahi tohi e he kau ave tohi nae heka i he faga hose, moe kau heka miuli, moe faga kameli, moe faga kameli mui.

11 Aia nae fakagofua ai e he tu‘i ki he kakai Jiu i he kolo kotoabe ke nau fakakatoa fakataha akinautolu, bea tuu o lagomaki e nau moui bea ke maumau, mo tamate‘i, mo fakaauha akinautolu moe malohi kotoabe oe kakai, moe buleaga aia te nau tuu ke tau‘i akinautolu, ae fānau jii moe kau fefine, bea ke ave ae koloa vete iate kinautolu ma anautolu,

12 I he aho be taha i he buleaga kehekehe oe tu‘i ko Ahasivelo, i hono hogofulu ma tolu oe aho i hono hogofulu ma ua oe mahina, aia koe mahina ko Atali.

13 Ko hono hiki oe tohi koe fekau ke atu ki he gaahi buleaga kotoabe nae fakaha ki he kakai kotoabe, bea ke teu be ki he aho koia e he kakai Jiu ke totogi ki ho nau gaahi fili.

14 Koia nae heka ai ae kau ave tohi i he gaahi miuli moe gaahi kameli, nae fakavavevave, bea ue‘i ke alu e he fekau ae tu‘i. Bea nae fai ae fono i Susani koe kolo fakaeiki.

¶ 15 Bea nae alu kitua a Motekiai mei he ao oe tu‘i i he gaahi kofu galigali eiki koe lanu moana, moe hinehina, moe fuu tatā koula i hono ulu, moe kofu tubenu moe bauhiuhi: bea nae fiefia ae kolo ko Susani, bea nekeneka.

16 Nae ma‘u e he kakai Jiu ae māma moe fiefia, moe nekeneka, moe fakahikihiki.

17 Bea koe buleaga kotoabe, moe kolo kotoabe nae hoko ki ai ae fekau moe tuutuuni ae tu‘i, nae ma‘u ai e he kakai Jiu ae fiefia moe fakafetai, moe katoaga, moe aho lelei. Bea nae hoko ae kakai toko lahi oe fonua, koe Jiu: he nae to kiate kinautolu ae manavahe ki he kakai Jiu.