¶ 1 BEA i hono hogofulu ma ua oe mahina, aia koe mahina ko Atali i hono hogofulu ma tolu oe aho i ai, i he hoko o ofi ae fekau moe tuutuuni ae tu‘i ke fakatonutonu, i he aho koia nae amanaki ai e he gaahi fili oe Jiu ke nau ma‘u ae malohi kiate kinautolu, (ka nae liliu kehe ia, koeuhi nae hoko o bule ae kakai Jiu kiate kinautolu nae fehia kiate kinautolu:)

2 Nae katoa fakataha akinautolu e he kakai Jiu i ho nau gaahi kolo i he gaahi buleaga kotoabe oe tu‘i ko Ahasivelo, ke buke akinautolu oku kumi ke fai kovi kiate kinautolu: bea nae ikai ha tagata nae faa talia akinautolu: he nae to ae manavahe kiate kinautolu i he kakai kotoabe.

3 Bea nae tokoni ki he kakai Jiu ae gaahi tu‘i oe gaahi buleaga, moe kau matābule, moe kau tokoni, moe kau matābule ae tu‘i; he nae to kiate kinautolu ae manavahe kia Motekiai.

4 He nae hoko o lahi a Motekiai i he fale oe tu‘i, bea nae ogo atu ki he gaahi buleaga kotoabe a ene ogolelei: he koe tagata ni ko Motekiai nae fakaaau ai be ia ke hakeaki‘i.

5 Bea nae ta‘i behe be e he kakai Jiu ho nau gaahi fili kotoabe aki ae ta oe heleta, moe tamate‘i, moe fakaauha, o nau fai e nau faiteliha kiate kinautolu nae fehia kiate kinautolu.

6 Bea nae tamate‘i o fakaauha e he kakai Jiu ae kau tagata e toko nimageau i Susani koe kolo fakaeiki.

7  Bea nae tamate‘i a Basanitata, mo Talifoni, mo Asibata.

8 Mo Bolate, mo Atalia, mo Alitata,

9 Mo Bamasita, mo Alisai, mo Alitai, mo Vajisata,

10 Koe foha e hogofulu o Hamani koe foha o Hamitata, koe fili oe kakai Jiu, naa nau tamate‘i: ka nae ikai te nau ala ho nau nima ki he koloa vete.

11 Nae omi i he aho koia ki he ao oe tu‘i hono lau okinautolu nae tamate‘i i Susani koe kolo fakaeiki.

¶ 12 Bea nae behe e he tu‘i kia Eseta koe tu‘i fefine, Kuo tamate‘i mo fakaauha e he kakaiJiu ae kau tagata e toko nimageau i Susani koe kolo, moe foha e hogofulu o Hamani; koeha kuo nau fai i he gaahi toega buleaga oe tu‘i? bea koeni, koeha hao kole? bea e tuku ia kiate koe: be koeha hao tala oku toe? bea e fai ia.

13 Bea behe ai e Eseta, Kabau oku lelei ki he tu‘i, tuku ke gofua ki he kakai Jiu aia oku i Susani ke nau fai abogibogi o hage koe tuutuuni oe aho ni, bea tuku ke tautau ae foha e hogofulu o Hamani ki he tautauaga.

14 Bea nae fekau e he tu‘i ke fai ia: bea nae fai ae fono i Susani; bea naa nau tautau ae foha e hogofulu o Hamani.

15 He nae fakataha ae kakai Jiu nae i Susani i hono hogofulu ma fa oe aho oe mahina ko Atali, o nau tamate‘i ae kau tagata e toko tolugeau i Susani; ka nae ikai te nau ala ki he vete.

16 Ka koe gaahi Jiu niihi nae i he gaahi buleaga oe tu‘i naa nau nau fakakatoa fakataha akinautolu, o nau tuu tali tau koeuhi koe nau moui, bea naa nau ma‘u ae mālōlō mei ho nau gaahi fili, bea tamate‘i i ho nau gaahi fili koe toko fitu mano moe toko nima afe, ka nae ikai te nau ala ki he vete,

17 I hono hogofulu ma tolu oe aho oe mahina ko Atali: bea i hono hogofulu ma fa oe aho oe  mahina koia naa nau mālōlō, o nau gaohi ia koe aho katoaga kai mo fakafiefia:

18 Ka koe kakai Jiu nae i Susani naa nau fakakatoa fakataha akinautolu i hono hogofulu ma tolu, bea i hono hogofulu ma fa, bea i hono hogofulu ma nima naa nau mālōlō, o gaohi ia koe aho katoaga kai mo fakafiefia.

19 Koia koe kakai Jiu oe gaahi botu kakai, aia nae nofo i he gaahi kolo tae hano a, naa nau gaohi hono hogofulu ma fa oe aho oe mahina, ko Atali, koe aho fiefia mo katoaga kai, moe aho lelei, ke feaveaki be ae gaahi inaji kiate kinautolu.

¶ 20 Bea nae tohi e Motekiai ae gaahi mea ni, o ne fekau ae gaahi tohi ki he kakai Jiu kotoabe nae i he gaahi buleaga kotoabe oe tu‘i ko Ahasivelo, ae ofi moe mamao,

21 Ke fakatuu mau ae mea ni iate kinautolu, koeuhi ke nau tauhi mau hono hogofulu ma fa oe aho oe mahina ko Atali, mo hono hogofulu ma nima oe aho, i he ta‘u kotoabe,

22 Aia koe gaahi aho nae mālōlō ai ae kakai Jiu mei ho nau gaahi fili, moe mahina nae foki ai ae mamahi meiate kinautolu ki he fiefia, bea mei he tagi ki he aho lelei: koeuhi ke nau gaohi ia koe ogo aho katoaga kai mo fakafiefia, moe feaveaki oe gaahi mea kiate kinautolu, moe gaahi mea foaki ki he majiva.

23 Bea nae alea ae kakai Jiu ke fai be o hage koia kuo nau kamata, bea hage koia nae tohi e Motekiai kiate kinautolu;

24 Koe mea ia Hamani koe foha o Hamitata, koe tagata Ekaki, koe fili oe kakai Jiu kotoabe, aia naa ne filioi kovi ki he kakai Jiu ke fakaauha akinautolu, mo ne fai ae Buli, aia koe talotalo, ke tamate akinautolu, mo fakaauha akinautolu;

25 Ka i he ha‘u a Eseta ki he ao oe tu‘i, naa ne fekau i he gaahi tohi, koeuhi ko ene filioi agakovi, aia naa ne fakatubu ki he kakai Jiu, ke foki mai ia ki hono ulu oona, bea ke tautau ia mo hono gaahi foha ki he tautauaga.

26 Koia naa nau ui ai ae aho koia, ko Bulimi koe higoa mei he lea ko Buli. Koia koe mea i he gaahi lea kotoabe oe tohi ni, bea mo ia naa nau mamata ki ai, aia oku kau ki he mea ni, bea mo ia nae hoko kiate kinautolu,

27 Nae tuutuuni e he kakai Jiu, bea fakahoko kiate kinautolu, bea ki ho nau hako, bea kiate kinautolu nae fakahoko akinautolu kiate kinautolu, bea ke oua naa gata, ke nau tauhi ae ogo aho ni o fakatatau ki he e na tohi, bea fakatatau ki hono kuoga kuo tuutuuni i he ta‘u kotoabe:

28 Bea koeuhi ke manatu‘i mo tauhi ae ogo aho ni, i he toutagata kotoabe  tuku fakaholo, i he faahiga kotoabe, i he buleaga kotoabe, bea i he kolo kotoabe: bea koe ogo aho oe Bulimi ke oua naa gata mei he kakai Jiu, bea oua naa mole ae manatu ki ai mei ho nau hako.

29 Bea nae tohi ai e Eseta koe tu‘i fiefine, koe ofefine o Abieli, mo Motekiai koe Jiu, i he malohi lahi, ke fakatuu mau hono ua oe tohi o Bulimi.

30 Bea naa ne fekau ae gaahi tohi moe gaahi lea ae melino moe mooni, ki he kakai Jiu kotoabe, ki he gaahi vahega fonua e teau ma uofulu ma fitu oe buleaga o Ahasivelo,

31 Ke fakamooni ki he ogo aho oe Bulimi i ho na kuoga, o hage koe tuutuuni nae fekau e Motekiai koe Jiu mo Eseta koe tu‘i fefine, bea hage koe na tuutuuni ma anaua bea ma a ho nau hako, koe mea oe aukai moe nau tagi.

32 Bea koe fono a Eseta nae fakababau ki he gaahi mea oe Bulimi; bea nae tohi ia i he tohi.