KOE GAAHI TAGILAULAU A JELEMAIA

¶ 1 OIAU! ae nofo lala be ae kolo aia nae bito i he kakai! kuo ne hoko o hage koe fefine kuo mate hono unoho! koia, aia nae lahi i he gaahi buleaga, bea hage koe eiki fefine ki he gaahi botu buleaga, kuo hoko ia koe fai tukuhau!

2 Oku ne tagi mamahi i he bo, bea oku i hono kouahe a hono loimata; i he ene gaahi kaumea kotoabe, oku ikai ha taha ke fakafiemalie ia: kuo fai kākā a ene gaahi kaumea kotoabe kiate ia, kuo nau hoko ko hono gaahi fili.

3 Kuo alu a Juta ki he bobula, koeuhi koe mamahi bea koeuhi koe gaue lahi: oku ne nofo moe hiteni, oku ikai te ne ilo ha fiemalie: nae ma‘u ia e he kau fakataga kotoabe i he gaahi botu laujii.

4 Oku tagi ae gaahi hala o Saione, koeuhi oku ikai ha niihi ke ha‘u ki he gaahi katoaga mamafa: oku lala hono gaahi mataba kotoabe: oku mafulu ene kau taulaeiki, oku mamahiia ene kau tāuboou, bea oku ne i he kona.

5 Oku maoluga a hono gaahi fili, oku tubu lelei hono gaahi fili; he kuo fakamamahi‘i ia e Jihova koeuhi koe lahi o ene gaahi agahala: kuo alu ene fānau ki he bobula i he ao oe fili.

6 Bea kuo mole ae hoihoifua kotoabe mei he ofefine o Saione: kuo hoko a ene gaahi houeiki o hage koe faga haate oku ikai ke ilo ha botu ke kai, bea kuo nau hola tae ha malohi i he ao oia oku tuli.

7 Nae manatu e Jelusalema i he gaahi aho o ene mahaki mo ene gaahi mamahi, a ene mea malie kotoabe aia naa ne ma‘u i he gaahi aho i mua, aia nae to a ene kakai ki he nima oe fili, bea nae ikai ha tokoni kiate ia: nae mamata ae kau fili kiate ia bea nau taukae ki hono gaahi aho tabu.

8 Kuo fai kovi lahi e Jelusalema; koia kuo fetukutuku ai ia: ko kinautolu kotoabe nae fakaabaaba kiate ia oku nau manuki, ki ai, koeuhi kuo nau mamata ki he ene telefua: io, oku ne mafulu bea foki ki mui.

9 Oku i hono kaba‘i kofu a ene uli; oku ikai ha manatu iate ia ki hono gataaga; koia naa ne to hifo fakamanavahe: nae ikai iate ia ha taha ke fakafiemalie. E Jihova ke ke afio ki he eku mamahi: he kuo fakahikihiki eia ia, e he fili.

10 Kuo mafao ae fili a hono nima ki he ene gaahi mea lelei kotoabe: he kuo ne mamata nae hu ae hiteni ki hono botu tabu, aia naa ke fekau, ke oua naa nau hoko atu ki hoo kakai.

11 Oku mafulu a ene kakai kotoabe, oku nau kumi ma, kuo nau foaki e nau gaahi mea lelei koe mea kai, ke tokoni ae laumalie: E Jihova ke ke afio bea vakai; he kuou hoko o fakalielia.

¶ 12 Ko ha mea noabe eni kiate kimoutolu, akimoutolu kotoabe oku aluage? vakai, bea mamata, be oku ai ha mamahi o hage ko eku mamahi, aia oku fai kiate au, aia kuo fakamamahi aki au e Jihova i he aho o hono houhau lahi.

13 Kuo ne fakahifo mei oluga ae afi ki hoku gaahi hui, bea oku ne malohi ki ai: kuo ne fola ha kubega ki hoku va‘e; kuo ne fakatafoki‘i au ki mui: kuo ne gaohi au koe liaki moe vaivai i he aho kotoabe.

14 Koe noo o eku gaahi agahala, kuo na‘i aki hono nima: oku nau fihi, bea oku a‘u hake ki hoku kia: kuo ne bule ke higa a eku malohi, kuo tukuage au e Jihova ki ho nau nima, bea oku ikai teu mafai ke tuu hake.

15 Kuo malaki hifo e Jihova a eku kau tagata malohi kotoabe, i hoku haohaoga: kuo ne ui ha fakataha kiate au ke taomia eku kau talavou: kuo molomoloki e Jihova ae tāuboou, koe ofefine o Juta, o hage i ha tataoaga uaine.

16 Koeuhi koe gaahi mea ni oku ou tagi; ko hoku mata, ko hoku mata oku tafe hifo i he vai, koeuhi oku mamao meiate au ae fakafiemalie nae totonu ke tokoni hoku laumalie: oku liaki be eku fānau, koeuhi nae malohi mai ae fili.

17 Oku mafao atu e Saione a hono nima, bea oku ikai ha niihi ke fakafiemalie kiate ia: kuo fekau e Jihova kia Jekobe, ke takatakai ia e hono gaahi fili: oku hage ha fefine mahaki a Jelusalema iate kinautolu.

18 Oku maonioni a Jihova; he kuou fai talagataa ki he ene fekau; oku ou kole kiate kimoutolu ae kakai kotoabe fanogo bea mou vakai ki he eku mamahi: kuo alu eku kau tāuboou mo eku kau talavou ki he bobula.

19 Neu ui ki he eku kau mamana, ka naa nau kākā‘i au: ko eku kau taulaeiki mo eku kau mātua naa nau tukuage a ho nau laumalie i he kolo,  i he e nau kei kumi mea kai ke fakafiemalie ho nau laumalie.

20 Afio mai e Jihova, he oku ou mamahi: oku gau‘e mamahi hoku fatu; kuo liliu hoku loto iate au; he kuou fai talagataa aubito; i tuaa oku fakamajiva e he heleta, bea oku i he loto fale ae mate.

21 Kuo nau fanogo oku ou mafulu: oku ikai ha taha ke fakafiemalie kiate au, kuo fanogo a hoku gaahi fili kotoabe ki he eku mamahi; oku nau fiefia koeuhi kuo ke fai ia: he te ke fakahokojia ae aho kuo ke tuutuuni, bea te nau hoko be o hage ko au.

22 Tuku ke hoko ki ho ao ae nau gaahi agahala kotoabe; bea ke fai kiate kinautolu, o hage koia kuo ke fai kiate au koeuhi ko eku gaahi agahala kotoabe: he oku lahi eku mafulu, bea oku vaivai hoku loto.