¶ 1 HONO ikai ufiufi e Jihova ae ofefine o Saione aki ae ao i hono houhau, bea fakahifo mei he lagi ki mamani ae nāunāu o Isileli, bea tae manatu ki hono tuuga va‘e i he aho o hono houhau!

2 Kuo folo hifo e Jihova ae gaahi nofoaga o Jekobe bea nae ikai te ne manavaofa; kuo ne holoki hifo i hono houhau ae gaahi botu malohi oe ofefine o Juta; kuo ne hifo akinautolu ki he kelekele: kuo ne fakauli‘i ae buleaga moe gaahi houeiki oia.

3 Kuo ne tutuu i hono houhau lahi ae nifo kotoabe o Isileli: kuo ne too a hono nima toomatau mei he ao oe fili, bea ne vela kia Jekobe o hage koe afi kakaha, aia oku fakaauha takatakai.

4 Kuo ne teke a ene kaufana o hage ha fili: naa ne tuu mai mo hono nima toomatau o hage ha fili, bea ne tamate‘i akinautolu kotoabe nae hoihoifua i he fale fehikitaki oe ofefine o Saione: naa ne liligi hono houhau o hage koe afi.

5 Nae hoko a Jihova ke tatau moe fili: kuo ne folo hifo a Isileli, kuo ne folo hifo a hono gaahi fale lelei kotoabe: kuo ne maumau‘i a hono gaahi botu malohi, bea kuo ne fakatubu ki he ofefine o Saione ae mamahi moe tagi.

6 Bea kuo ne ave fakamalohi a hono fale fehikitaki o hage ko ha mea oe goue: kuo ne fakaauha ae gaahi botu oe fakataha: kuo gaohi e Jihova ke galo ae gaahi katoaga mamafa moe gaahi aho tabu i Saione, bea kuo ne manuki i hono houhau lahi ae tu‘i moe taulaeiki.

7 Kuo liaki e Jihova a hono feilaulauaga, kuo ne fehia ki hono botu tabu, kuo ne tukuage ki he nima oe fili ae gaahi holiji o hono gaahi fale lelei; kuo nau mavava i he fale o Jihova o hage i he aho oe katoaga mamafa.

8 Kuo finagalo a Jihova ke maumau ae a oe ofefine o Saione: kuo ne falo ha afo, nae ikai te ne taofi hono nima mei he fakaauha: koia naa ne gaohi ae tanu moe a ke tagi; naa nau fakaaau ki mui fakataha.

9 Kuo galo hifo i he kelekele a hono gaahi mataba: kuo ne feji‘i mo maumau‘i hono gaahi akau sogo; oku i he kakai Jenitaile a hono tu‘i mo hono houeiki: oku ikai ha fono: ko ene kau balofita foki oku ikai ke kei ilo ha mea ha mai mei a Jihova.

10 Oku nofo hifo i he kelekele bea oku logo be ae kau mātua oe ofefine o Saione: kuo nau bani efu a ho nau ulu; kuo nau fakavala aki akinautolu ae tauagaa: koe kau tāuboou o Jelusalema oku nau fakatomabee ho nau ulu o a‘u ki he kelekele.

11 Oku vaivai i he loimata a hoku mata, oku gau‘e hoku fatu, oku liligi hoku ate ki he kelekele, koe mea i he fakaauha ae ofefine o hoku kakai; koeuhi oku bogia ae tamaiki moe kau valevale i he gaahi hala oe kolo.

12 Oku nau behe ki he e nau gaahi fa‘e, Kofaa ae koane moe uaine? i he e nau bogia o hage koe kau kafo i he hala oe kolo, i he aho koia, aia nae liligi ai a ho nau laumalie ki he fatafata oe nau gaahi fa‘e.

13 Koeha teu atu ke fakamooni kiate koe? koeha teu fakatātā aki kiate koe e ofefine o Jelusalema? koeha teu fakatatau mo koe, koeuhi keu fakafiemalie‘i koe e ofefine o Saione? he ko hoo maumau oku lahi o hage koe tahi: kohai e fakamoui koe?

14 Kuo ilo e hoo kau balofita ae gaahi mea vaiga mo vale koeuhi ko koe: bea nae ikai te nau fakaha hoo kovi koeuhi ke fakaafe‘i hoo bobula; ka kuo nau ilo koeuhi ko koe ae gaahi kikite loi, mo gaahi mea fakahe.

15 Oku baji nima kiate koe akinautolu kotoabe oku aluage; oku nau isa mo kalokalo ho nau ulu ki he ofefine o Jelusalema, o nau behe, Ko eni koa ae kolo aia oku ui e he kakai koe toulekeleka haohaoa, koe fiefiaaga o mamani kotoabe?

16 Kuo fakamaga ho nau gutu kiate koe e ho kau fili kotoabe: oku nau isa bea fegaitaki ae nifo: o nau behe, Kuo tau folo hifo ia: koe mooni ko eni ae aho naa tau amanaki ki ai; kuo tau ilo, kuo tau mamata ai.

17 Kuo fai e Jihova aia naa ne filioi; kuo ne fakamooni ki he ene folofola aia naa ne fekau i he gaahi aho i mua: kuo ne holoki hifo, bea nae ikai te ne manavaofa; bea kuo ne bule ke fiefia ho fili kiate koe, kuo ne fokotuu ki oluga ae nifo o ho kau fili.

18 Nae tagi ho nau loto kia Jihova, E a oe ofefine o Saione tuku ke tafe hifo ae gaahi loimata i he aho moe bo, o hage ha vaitafe: oua naa ke mālōlō; ke oua naa tuku e ho kano‘i mata.

19 Tuu hake, bea ke kalaga i he bo: i he kāmataga oe gaahi leo, huai ho loto o hage koe vai i he ao oe fofoga oe Eiki: hiki hake ho nima kiate ia koeuhi ke moui a hoo tamaiki iki, aia oku mate fiekaia i he mua hala kotoabe.

20 E Eiki ke ke vakai bea tokaga kiate kinautolu kuo ke fai behe ki ai. E kai e he kau fefine a ho nau fua, moe tamaiki, oku haga be taha a ho nau loloa? e mate tamate‘i, ae taulaeiki moe balofita i he fale tabu o Jihova?

21 Ae kakai talavou moe matua oku nau tokoto i he kelekele i he gaahi hala: kuo to i he heleta eku kau tāuboou mo eku kau talavou: kuo ke tamate‘i akinautolu i he aho o ho houhau; kuo ke tamate‘i bea ikai manavaofa.

22 Kuo ke uiui‘i ae gaahi fakamanavahe ke kabui au, o hage i ha aho mamafa, koia nae ikai jii ke hao be toe ha niihi i he aho oe houhau o Jihova: akinautolu nae fakakofu‘i mo tauhi‘i e au kuo fakaauha e he fili.