¶ 1 KOIA oku laiki kuo alu hake i ho ao: too ae mahafu, leohi ae hala, nonoo ho kogaloto, fakalahi aubito hoo malohi.

2 He kuo liliu e Jihova ae nāunāu o Jekobe, hage koe nāunāu o Isileli: he kuo ohu kinautolu kitua e he kau ohu, mo maumau‘i ho nau gaahi vaa vaine.

3 He kuo gaohi ke kulokula ae ba o ene kau tagata malohi, oku kofu kulaahoaho a ene kau to‘a: e i ai ae gaahi tuhulu vela, moe gaahi saliote i he aho o ene teuteu, bea e galulululu fakamanavahe ae gaahi akau koe fea.

4 E oho ae gaahi saliote i he gaahi hala, te nau febaki ae taha ki he taha, i he gaahi hala laulahi: te nau ha mai o tatau moe gaahi tuhulu, te nau lele hage koe uhila.

5 Te ne toe lau ene kau tagata tuu ki mua: te nau tohumu i he e nau laka; te nau vave atu ki hono a, bea koe tali tau e teuteu.

6 E fakaava ae gaahi mataba oe gaahi vaitafe, bea e auha ae fale fakaeieiki.

7 Bea e taki a Husabi ki he bobula, e buke ia o omi, bea e taki ia e he ene kau kaunaga, kae tagi o hage ae faga lube, mo tajibi ki ho nau fatafata.

8 Ka e talu mei mua moe tatau a Ninive moe anovai, ka te nau hola atu. Te nau kalaga, Tuu, tuu; ka e ikai ha toko taha e jio ki mui.

9 Mou ave ae gaahi mea vetekina, koe siliva, mou ave ae gaahi mea vetekina, koe koula: he oku ikai hono gata oe koloa moe nāunāu mei he gaahi mea teuteu matamatalelei.

10 Oku ne atā, mo gaogao mo lala: bea oku vaivai ae loto, bea oku feha-beaki ae ogo tui, bea oku lahi ae laga i he gaahi koga loto kotoabe, bea oku uliuli ho nau mata kotoabe.

11 Kofaa ae botu nofoaga oe faga laione, moe keinagaaga oe faga laione mui, aia nae alu ai ae laione, io ae laione motua moe uhiki‘i laione, bea nae ikai fakamanavahe‘i kinautolu e ha niihi?

12 Nae haehae e he laione ke tāu mo ene fānau, bea ne jijina‘i ma a hono faga laione fefine, bea nae fakabito hono gaahi luo i he meakai, mo hono gaahi ana aki ae mea kuo fakamalohia.

13 Oku behe e Jihova oe gaahi kau tau, Vakai, oku ou tuu kiate koe, bea teu tutu a ene gaahi saliote i he ahu, bea e fakaauha e he heleta ae faga laione mui: bea teu motuhi hoo meakai mei mamani, bea koe le‘o o ho kau talafekau e ikai ha toe fanogo ki ai.