¶ 1 BEA behe e Naomi ko ene fa‘e i he fono kiate ia, A eku tama, ikai oku lelei eku kumi ae fiemalie kiate koe, koeuhi ke lelei ai kiate koe?

2 Bea koeni, ikai ko ho ta kaiga a Boasi, ae kau kaunaga oona naa ke i ai? Vakai, oku tabili baale eia he bo ni i he botu hahaaga.

3 Koia ke ke kaukau‘i koe, bea ke tākai koe, bea ai ho gaahi kofu kiate koe, bea ke alu hifo ki he botu hahaaga: kae oua naa ke fakaha atu koe ki he tagata, kae oua ke oji ene kai mo inu.

4 Bea ka tokoto hifo ia, bea e behe, Ke ke vakai ki he botu aia oku tokoto ai ia, bea ke alu ki ai, bea too ae kafu mei hono va‘e, bea ke tokoto hifo; bea e fakaha eia kiate koe aia te ke fai.

5 Bea behe eia kiate ia, Koe mea kotoabe oku ke tala kiate au teu fai ia.

¶ 6 Bea nae alu hifo ia ki he botu hahaaga, bea ne fai o hage koia kotoabe nae fekau e he ene fa‘e i he fono kiate ia.

7 Bea hili ae kai mo inu a Boasi, bea kuo fiemalie lahi hono loto, nae alu ia, ke tokoto i hono botu oe fokotuuga uite: bea ha‘u fakaeteete be ia, bea too ae kafu mei hono va‘e, bea tokoto hifo ia.

¶ 8 Bea hoko o tuuabo, bea behe, Kuo manavahe ae tagata, bea tafoki eia ia, bea, vakai, oku tokoto ha fefine ki hono va‘e.

9 Bea behe eia, Kohai koe? Bea behe eia, Ko au Lute ko hoo kaunaga: koia ke ke ai ho kafu ki hoo kaunaga; he koe kaiga ofi koe.

10 Bea nae behe eia, E hoku ofefine, Ke monuia koe ia Jihova: he kuo ke fakaha ae agaofa lahi i he kimui i he kamataga, koe mea i he ikai te ke muimui i he kau talavou, be ko ha majiva be koe maumea.

11 Bea koeni, E hoku ofefine, oua naa ke manavahe; teu fai kiate koe aia kotoabe oku ke tokaga ki ai: he oku ilo e he kakai kotoabe o hoku mataba koe fefine agalelei koe.

12 Bea koeni, koe mooni ko ho kaiga ofi au: ka oku ai ha kaiga e taha oku ofi lahi iate au.

13 Tatali he bo ni, bea e behe i he abogibogi, kabau te ne fai kiate koe ae gaue ae kaiga, oku lelei; tuku ia ke fai ae gaue ae kaiga: bea kabau e ikai fai eia ae gaue ae kaiga kiate koe, bea teu fai e au ae gaue ae kaiga kiate koe; oku moui a Jihova: tokoto hifo ke oua ke bogibogi.

¶ 14 Bea nae tokoto ia ki hono va‘e ke oua ke bogibogi: bea tuu hake ia i he tae faa ilo e ha taha ha taha. Bea behe eia, Ke oua naa ilo nae ha‘u ha fefine ki he botu hahaaga.

15 Bea behe eia foki, Omi kiate au a ho kafu aia oku iate koe, bea ke fakatali ia. Bea i he ene fakatali ia, naa ne ligi ki ai ae fua baale e ono, o ne hilifaki ia kiate ia: bea nae alu ia ki he kolo.

16 Bea i he ene ha‘u ki he ene fa‘e i he fono, nae behe eia, Kohai koe, eku tama? Bea naa ne tala kiate ia aia kotoabe nae fai e he tagata kiate ia.

17 Bea behe eia, Naa ne tuku kiate au ae fua baale e ono ni; he naa ne behe kiate au, Oua naa ke alu geeji be ki hoo fa‘e i he fono.

18 Bea behe eia, Ko eku tama, ke ke nofo fiemalie be, ke oua ke ke ilo be gata fefe ae mea ni: koeuhi e ikai nofo noa be ae tagata, kae oua ke ne fakaoji ae mea ni he aho ni.