¶ 1 NAE toki alu hake ai a Boasi ki he mataba, bea nofo ki lalo ia i ai: bea, vakai, nae aluage ae kaiga aia nae lea ki ai a Boasi; aia nae behe ki ai ia, E, akoe, tafoki mai, bea nofo ki lalo i heni. Bea nae tafoki ia, o nofo ki lalo.

2 Bea naa ne omi ae kau tagata e toko hogofulu koe kau mātua oe kolo, o ne behe, Mou nofo ki lalo i heni. Bea naa nau nofo ki lalo.

3 Bea behe eia ki he kaiga, Ko Naomi, aia kuo toe ha‘u mei he fonua ko Moabe, oku fakatau eia ae koga fonua, aia nae ia Elimeleki ko ho tau tokoua.

4 Bea neu behe, teu fakaha ia kiate koe, o behe, Ke ke fakatau ia i he ao oe kakai, bea i he ao oe kau mātua o hoku kakai. Kabau te ke huhui ia, bea ke huhui ia: bea kabau e ikai te ke huhui ia, bea ke fakaha kiate au, koeuhi keu ilo: he oku ikai ha toko taha kehe ke huhui ia ka ko koe; bea oku ou hoko mo koe. Bea behe eia, Teu huhui ia.

5 Bea behe ai e Boasi, Koe aho koia oku ke fakatau ae goue i he nima o Naomi, oku totonu hoo fakatau ia i he nima o Lute foki koe fefine Moabe, koe unoho oe bekia, ke fokotuu hake ae higoa oe bekia ki hono tofia.

¶ 6 Bea nae behe e he kaiga, Oku ikai teu faa huhui ia mooku, telia naaku maumau ai ae tofia ooku: ke ke huhui aia oku ooku moou; he oku ikai teu faa huhui ia.

7 Bea ko eni hono aga i mu‘a i Isileli oe huhui, bea ki he fetogi, ke fakamooni ae gaahi mea kotoabe; nae vete e he tagata hono tobuva‘e, bea atu ia ki hono kaugaabi: bea koe mea fakamooni ia i Isileli.

8 Koia nae behe ai e he kaiga kia Boasi, Ke ke fakatau ia moou. Koia naa ne vete o too hono tobuva‘e.

¶ 9 Bea behe e Boasi ki he kau mātua, bea ki he kakai kotoabe, Koe kau fakamooni akimoutolu he aho ni kuou fakatau aia kotoabe nae o Elimeleki, mo ia kotoabe nae o Kilioni mo Maloni, i he nima o Naomi.

10 Bea mo Lute foki koe fefine Moabe, koe unoho o Maloni, kuou fakatau ko hoku unoho, ke fokotuu hake ae higoa oe bekia ki hono tofia, koeuhi ke oua naa motuhi ae higoa oe bekia mei hono kaiga, bea mei he mataba o hono botu: koe kau fakamooni akimoutolu he aho ni.

11 Bea nae lea ae kakai kotoabe nae i he mataba, moe kau mātua, o behe, Koe kau fakamooni akimautolu. Ke gaohi e Jihova ae fefine kuo ha‘u ki ho fale ke hage ko Lejieli mo Lia, akinaua naa na laga ae fale o Isileli: bea ke tabuekina koe i Efalata, bea ke ogolelei koe i Betelihema:

12 Bea ke hoko o tatau ho fale moe fale o Felesi, aia nae fanau‘i e Tema kia Juta, i he hako aia e tuku kiate koe e Jihova i he fefine mui ni.

¶ 13 Koia nae omi e Boasi a Lute, bea hoko ia ko hono unoho: bea i he ene alu kiate ia, nae foaki kiate ia e Jihova ke feitama, bea ne fanau‘i ae tama.

14 Bea nae behe e he kau fefine kia Naomi, Fakafetai kia Jihova, aia nae ikai tuku liaki koe tae hao kaiga, koeuhi ke hoko o ogoogolelei hono higoa i Isileli.

15 Bea e iate koe ia koe fakaakeake moui, bea koe tauhi kiate koe i hoo motua: koeuhi ko hoo taahine i he fono, aia oku ofa kiate koe, aia oku lelei lahi kiate koe i he tama tagata e toko fitu, kuo ne fanau‘i kiate ia.

16 Bea nae too e Naomi ae tamajii, bea ai ia ki hono fatafata, bea hoko ia ko hono tauhi.

17 Bea nae fakahigoa ia e he kau fefine o hono kaugaabi, o behe, Kuo tubu ae tama kia Naomi, bea naa nau ui hono higoa ko Obeti: koia ia koe tamai a Jese, koe tamai a Tevita.

¶ 18 Bea koe gaahi toutagata eni o Felesi: Nae tubu ia Felesi a Hesiloni,

19 Bea tubu ia Hesiloni a Lame, bea tubu ia Lame a Aminitabi,

20 Bea tubu ia Aminitabi a Nasoni, bea tubu ia Nasoni a Salimoni,

21 Bea tubu ia Salimoni a Boasi, bea tubu ia Boasi a Obeti,

22 Bea tubu ia Obeti a Jese, bea tubu ia Jese a Tevita.