Abraham Nwoma

1 Chaldeafo hɔn asaase do, wɔ m’egyanom hɔn fie, emi, Abraham, hun dɛ ohia dɛ minya bea bi kɛtsena hɔ;

2 Na, muhun dɛ enyigye kɛsenara na asomdwee na ahomgye wɔ hɔ ma me no, meperee hwehwɛɛ egyanom no hɔn nhyira, na me kyɛfa no a ɔwɔ dɛ wɔhyɛ me sɔfo ma meedzi no mu dwuma no; osiandɛ emi mankasa meyɛ ndzeyɛtsenenee ne kadofo a, mepɛ so dɛ minya nyimdzee kɛse, na meyɛ ndzeyɛtsenenee ne kãdofo mapã, na minya nyimdzee kɛsenara, na meyɛ aman pii hɔn egya, asomdwee hen, na mepɛɛ, dɛ, megye nkyerɛkyerɛ, na midzi Nyankopɔn ne mbrasɛm do no, mebɛyɛɛ ɔdzedzifo a ɔfata, Ɔsɔfo Panyin a, mokura dza odzi wɔ egyanom no.

3 Wɔdze dza ofi egyanom hɔ no maa me; ofi egyanom no hɔ, fi mber ahyɛse, nyew, ofi ahyɛse no mpo, anaadɛ ansaana wɔrobɔtow asaase ne fapem, dze besi ndɛ mber yi, dza odzi wɔ abakan no ne kyɛfa no mpo, anaadɛ nyimpa a odzii kan no, a ɔyɛ Adam, anaa egya a odzii kan, duaa egyanom no do baa mo hɔ.

4 Mepeer dɛ me nsa bɛkã m’Asɔfodzi ɔfrɛ no dɛ mbrɛ Nyankopɔn dze frɛɛ egyanom a ɔfa asefo ho no.

5 M’egyanom a, wɔadan efi hɔn ndzeyɛtsenenee ho nye mbrasɛm krɔnkrɔn no a Ewuradze hɔn Nyankopɔn dze ama hɔn no ho, na wɔadan rosom abosonsɔrfo hɔn enyame no, wɔpoow koraa dɛ wɔbɛyɛ aso ama me ndze;

6 Osiandɛ nna woesi hɔn akoma pi dɛ wɔbɛyɛ bɔn, nna wɔadan hɔnho koraa dze ama Elkenah nyame, nye Libnah nyame, nye Mahmackrah nyame, nye Korash nyame, nye Pharaoh, Egypthen nyame;

7 Dɛm ntsi wɔdaan hɔn akoma dze maa abosonsɔrfo afɔrbɔ na wɔdze hɔn mba maa dɛ wɔmfa hɔn mbɔ afɔr mma dɛm ehonyi mmum yinom, na wɔannyɛ aso amma me ndze, mbom wɔbɔɔ mbɔdzen dɛ wobeyi me nkwa efi hɔ wɔ Elkenah no sɔfoe nsaano. Elkenah no sɔfoe no yɛ Pharaoh so no sɔfoe.

8 Afei, dɛm aber yi mu no nna ɔyɛ Pharaoh, Egypthen no no sɔfoe no n’amandze dɛ ɔdze mbanyin, mbaa, na mbofra bɔ afɔr wɔ afɔrmbukyia no a woesi wɔ Chaldea asaase do hɔ dze ama dɛm abosom ahɔho yinom no.

9 Na ɔbaa dɛ ɔsɔfo no bɔɔ afɔr maa Pharaoh nyame, nye Shagreel nyame, mpo dɛ mbrɛ Egyptfo no yɛ no. Afei Shagreel nyame no yɛ ewia.

10 Abofra ne ndaase-afɔr mpo na Pharaoh no sɔfoe no bɔ wɔ afɔrmbukyia no a osi koko a wɔfrɛ no Potiphar Koko no a ɔwɔ Olishem bea petee no no sor hɔ no do.

11 Afei, dɛm ɔsɔfo yi dze mbaabun baasa abɔ afɔr wɔ dɛm afɔrmbukyia yi do mber kor mu, dɛm mbaabun yi yɛ Onitah ne mbaabun, Ham n’asen mu adehye asefo mu kor. Wɔdze dɛm mbaabun yinom bɔɔ afɔr osian hɔn ɔbrapa ntsi; wɔammpɛ dɛ wɔbɔbɔ hɔn mu adze asom enyame a wɔyɛ dua anaa ɔbo, dɛm ntsi wokum hɔn wɔ afɔrmbukyia yi do, na wɔyɛɛ no dɛ mbrɛ Egyptfo yɛ no.

12 Na ɔbaa dɛ asɔfo no nam patapaa kwan do kyeer me dɛ worukoku mo so, dɛ mbrɛ wɔdze yɛɛ dɛm mbaabun no wɔ afɔrmbukyia yi do no; ama hom enya nyimdzee wɔ afɔrmbukyia yi ho no, morotwe hom adwen ekegyina ne saso wɔ abakɔsɛm yi ahyɛse no.

13 Wɔayɛ no dɛ mpadua, ɔtse dɛ dza Chaldeafo wɔ no pɛpɛɛpɛr, na osi Elkenah, Libnah, Mahmackrah, Korasah, enyame no enyim, nye nyame bi so a ɔtse dɛ Pharaoh, Egypthen nedze no.

14 Mbrɛ ɔbɛyɛ a hom benya ntseasee wɔ dɛm enyame yinom ho no, maakã mbrɛ hɔn su tse ho asɛm akyerɛ hom wɔ mfonyin mu wɔ ahyɛse hɔ, dɛm mfonyin no no su na Chaldeafo no frɛ no Rahleenos, dza ogyina hɔ ma mfonyin akyerɛw no.

15 Na ber a wɔmaa hɔn nsa do wɔ mo do no, dɛ wɔdze bosuo mo mu na woeyi mo nkwa efi hɔ no, hwɛ, metseaa mu frɛɛ Ewuradze me Nyankopɔn, na Ewuradze tsiei, na ɔtsee, na ɔmaa minyaa enyido-adzehu hun Otumfo no, na n’enyim ɔbɔfo no begyinaa me nkyɛn, na ntsɛmara osansaan me nkyehoma no;

16 Na ne ndze baa mo hɔ: Abraham, Abraham, hwɛ, me dzin nye Jehovah, na meetsie wo, na maaba famu dɛ merebɛgye wo, na mafa wo efi w’egya fi, na meyi wo efi w’ebusuafo mu, dze wo akɔ asaase ananabea a innyim do do.

17 Na iyi ho ntsi wɔadan hɔn akoma efi moho, ma aakɔsom Elkenah nyame, nye Libnah nyame, nye Mahmackrah nyame, nye Korash nyame, nye Pharaoh, Egypthen nyame; dɛm ntsi mesian famu dɛ merebɛsera hɔn na masɛɛ nyia ɔama ne nsa do dze ritsia wo, Abraham, me babanyin, dɛ obeyi wo nkwa efi hɔ no.

18 Hwɛ, medze me nsa bedzi w’enyim kan, na mafa wo, na medze me dzin ato wo do, w’egya n’Asɔfodzi no mpo, na mo tum bɛkata wo do.

19 Dɛ mbrɛ meyɛɛ maa Noah no dɛmara so na mebɛyɛ ama wo; mbom wɔnam wo somdwuma ne nyɛe mu no wɔbɛtse me dzin nkã wɔ asaase do afebɔɔ, osiandɛ meyɛ wo Nyame.

20 Hwɛ, Potiphar no koko no nna ɔwɔ Ur asaase do, wɔ Chaldea. Na Ewuradze bubuu Elkenah n’afɔrmbukyia no nye abosom a wɔwɔ asaase no do no guu famu, na ɔsɛɛ hɔn korakora, na ɔbɔɔ ɔsɔfo no ma owui; na wosuu kɛsenara wɔ Chaldea, nye Pharaoh so ne fi; Pharaoh n’asekyerɛ nye ɔhen a ofi adehye bɔgya ebusua mu.

21 Afei Egypthen yi yɛ Ham n’asen mu asenyi, na ɔnam n’awoo do yɛ Canaanfo bɔgya mu fafafo.

22 Ofi asefo yi mu na Egyptfo nyinara fi bae, na ɔnam dɛm kwan yi do na Canaanfo bɔgya kaa asaase no do.

23 Egypt asaase a wodzii kan hunii no nam ɔbaa do, nyia ɔyɛ Ham ne babaa, nye Egyptus ne babaa, dza Chaldea kasa mu no n’asekyerɛ nye Egypt, dza n’asekyerɛ nye adze a wɔabra;

24 Ber a ɔbaa yi hun asaase no nna ɔhyɛ nsu ase, ɔno na n’ekyir no ɔmaa ne mbabanyin kɛtsenaa mu; na dɛm ntsi ofi Ham do, dɛm ebusuakuw no a wɔmaa ndom no kaa asaase no do.

25 Afei Egypt aban a odzii kan no Pharaoh na ɔkyekyeree, Egytus n’abakan babanyin, Ham ne babaa, na ɔnam Ham n’aban kwan do, na patriarch adzedzi do.

26 Pharaoh ɔyɛ nyimpa tsenenee ntsi, ɔkyekyeer n’ahendzi na obuu no nkorɔfo atsɛn wɔ nyansa na pɛrpɛrdzi mu no nkwa nda nyina mu, na ɔpeer enyiberdo dɛ ɔbɛfa dɛm kwan a egyanom faa do dze buu ɔman wɔ ebusuasantsen a odzii kan no mu no, wɔ patriarch adzedzi do a wodzii kan dzii adze no no nkwa nda mu, wɔ Adam n’adzedziber mu, nye Noah so a, ɔyɛ n’egya, ɔno na ɔdze asaase do nhyira, nye nyansa nhyira hyiraa no, na mbom ɔdze ndoom doom no wɔ Asɔfodzi ho.

27 Afei, Pharaoh a ofi dɛm asefo no mu no enntum ennya Asɔfodzi mu kyɛfa no, eso Pharaohfo no peer dɛ wodua Ham do gye fi Noah hɔ, dɛm ntsi wɔdze hɔn abosonsom twee m’egya.

28 Mbom mobɔbɔ mbɔdzen, ekyir yi, makyerɛkyerɛ mber no mu esiado esiado fi mankasa mo do dze kɔ ekyir kesi abɔdze ahyɛse, osiandɛ nkyerɛwee no ebedzi me nsamu, a ɔwɔ mo hɔ dze besi dɛm mber yi mu.

29 Afei, ekyir no a wɔbɔɔ Elkenah no sɔfoe ma owui no, dɛm ndzɛmba yinom a wɔkãa kyerɛɛ me a ɔfa Chaldea asaase ho dɛ ɔkɔm bɛba asaase no do no baa mu pɛpɛɛpɛr.

30 Dɛ mbrɛ wɔase no, ɔkɔm baa Chaldea asaase nyinara do, na m’egya tseetsee ara yie osian ɔkɔm no ntsi, na onuu noho wɔ bɔn a osusui tsiaa me dɛ obeyi mo nkwa efi hɔ no ho.

31 Mbom egyanom hɔnho nkyerɛwee no, dza ɔfa patriarchfo mpo ho no a ɔfa Asɔfodzi kyɛfa ho no, Ewuradze me Nyankopɔn no dze esie yie wɔ mankasa me nsamu; dɛm ntsi nyimdzee a ɔfa abɔdze n’ahyɛse, nye sor abɔdze so, nye nworaba, dɛ mbrɛ woyii kyerɛɛ egyanom no, medze esie dze ebodu ndɛ da yi, na mobɔbɔ mbɔdzen makyerɛw dɛm ndzɛmba yinom a ɔwɔ nkyerɛwee no mu no bi, ama wɔaayɛ mfaso dze ama m’asefo a wɔbɛba m’ekyir no.