Jesus Christ N’Asɔr a ɔwɔ hɔ ma Nda a Odzi Ekyir Ahotseweefo No ne Wiadze Mfɛndzanan Ehyiadzi a wɔyɛ no mprɛnu wɔ afe mu no dza otsĩa 148 a wɔyɛɛ wɔ Fankwa 30, 1978 mu, dza odzi do yinom President N. Eldon Tanner, Ɔpamfo a Odzi Kan wɔ President a Odzi Kan na n’Apamfo Kuw wɔ Asɔr no mu no dze too gua:

Obiradzi ne nda a odzi kan no mu wɔ afe yi mu no, President a Odzi Kan no na n’Apamfo dze too gua dɛ President Spencer W. Kimball enya nyikyerɛ dɛ wɔmma asɔfodzi na temple nhyira no nsõ Asɔr no mu mbanyin nyinara a wodzi mu no do. President Kimball ase me dɛ memfa nto hɔn a wɔaba wiadze mfɛndzanan ehyiadzi yi ase no enyim dɛ, onyaa nyikerɛ no wɔ aber a, ɔdwendween ho wɔ n’akoma mu na ɔbɔɔ ho mpaa mber pii wɔ temple krɔnkrɔnbea no n’adankora krɔnkrɔn no mu, na ekyir no ɔdze too n’apamfo no enyim ma wosusuu ho na wɔgyee too mu. Nkyii ɔdze too Asomafo Duebien Quorum no enyim, hɔn nyinara gyee too mu, na nkyii ɔdze too Asɔr no ne Dzibewdzi Etumdzifo Etsitsir no nyinara enyim na hɔn so gyee too mu.

President Kimball ase me dɛ afei menkenkan krataa yi:

Dɛ mbrɛ hɛn nyinara gye ho dase dɛ Ewuradze n’edwuma retserɛw wɔ asaase ne mbea nyinara do no, ayɛ hɛn enyigye dɛ aman pii mu nyimpa agye asɛmpa no a wɔasan dze aba no no mu nsɛm no ato mu, na ɔnam do ma wɔabɔdɔm Asɔr yi ma no mu nyimpa gu do rodɔr. Iyi na ekenyan hɛn ma yeenya pɛ dɛ yɛbɛma Asɔr yi no mu mba nyinara a wodzi mu no hɔn nsa akã ndzinoa na nhyira nyinara a asɛmpa no dze ma no.

Dɛ mbrɛ yenyim no, Asɔr no mu nkɔnhyɛfo na presidentfo no a woedzi hɛn enyim kan no bɔɔ anohoba dɛ Nyame ne onnyiewiei nhyehyɛɛ mu no, mber bi bɛba a hɛn enuanom nyinara a wodzi mu no hɔn nsa bekã asɔfodzi no, na yehu dɛm nkorɔfo no a wɔdze asɔfodzi no akam hɔn no hɔn nokwardzi, yɛdze mber tsentsen atotɔ aserɛ enyiberdo ama hɛn enuanom anokwafo yinom, yedzi mber pii wɔ Temple no n’Abansor dze ntotɔserɛ ma Ewuradze dɛ ɔma hɛn ɔsor kwankyerɛ.

Oetsie hɛn mpaabɔ, na ɔnam nyikyerɛ do esi no pi dɛ anohoba no a ɔabɔ no mber tsentsen a wɔabɛsen kɔ no asõ dɛ Asɔr no mu banyin biara a odzi mu no ne nsa bɛkã asɔfodzi krɔnkrɔn no, na oenya tum no dze edzi no dwuma krɔnkrɔn, na ɔnye n’adɔfo enya nhyira biara a ofi mu ba no a temple mu nhyira kã ho. Dza ɔkã ho so nye dɛ, wɔbɛyɛ ayɛdze dze ahyɛ Asɔr no mu mbanyin nyinara a wodzi mu dze asɔfodzi aahyɛ hɔn a, wɔronnhwɛ ebusuakuw no a ofi anaa no wer enyi. Wɔhyɛ Asɔfodzi banodzifo no dɛ, dɛ ɔyɛ Aaron anaa Melchizedek Asɔfodzi no, wɔmfa kwan a wɔahyehyɛ ato hɔ no do pɛpɛɛpɛr nye hɔn a wɔbɛyɛ ayɛdze ama hɔn no mpɛnsampɛnsamu yie ama woeehu dɛ, nokwar, wodzi mu dɛ mbrɛ emudzi nhyehyɛɛ no tse.

Yɛkã no botooyɛ mu dɛ, afei Ewuradze ada ne pɛ edzi wɔ nhyira a ɔpɛ dɛ ne mba nyinara a wɔwɔ asaase nyinara do a wɔbɛyɛ setsie ama no nkowaa a ɔama hɔn tum no ndze, na woesiesie hɔnho dɛ hɔn nsa bekã asɛmpa no mu nhyira nyinara.

Yenyim dɛ Spencer W. Kimball yɛ nkɔnhyɛnyi, adzehunyi, na oyikyerɛfo, na ɔyɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo ne president, yesusu dze to gua dɛ hɛn a yɛyɛ asɔrmba a yeehyia wɔ baguabɔ mu dɛ yɛbɛgye dɛm nyikyerɛ yi ato mu dɛ ɔyɛ Ewuradze n’asɛm na ne pɛ. Meserɛ dɛ hɔn a wɔgye to mu nyinara mma hɔn nsa nyimfa do. Hɔn a wotsia so nyɛ dɛm asɛnkyerɛdze kor noara.

Hɔn nyina a wɔtoow aba no gyee dza wɔkãa ho nsɛm no too mu.