1 Ɔbɛsɛ ne da a otsĩa ebiasa, wɔ afe apem ahaakron eduawɔtwe, metsena me dan mu rodwendwen kyerɛwsɛm no ho;

2 Nna morodwendwen werdam kɛse no a Nyame ne Ba no bɔe dze poon wiadze;

3 Nye ɔdɔ kɛse na ɔdɔ nwanwa a Egya na Ɔba no kyerɛe wɔ Pomfo no no wiadze mbae mu.

4 Dɛ ɔnam no werdambɔ no do, nna sɛ yɛyɛ setsie ma asɛmpa ne nkyerɛkyerɛ no a, adasamba benya nkwagye.

5 Ber a mugu do rodwendwen dɛm no, m’adwen twee kesii Ɔsomafo Peter ne kyerɛwsɛm no, nye tsetse ahotseweefo no a wɔbɔɔ hɔn petsẽe Pontus, Galatia, Cappadocia, na Asia mbea bi so do no do, hɔ na ber a wɔbɔɔ Ewuradze mbeamudua mu ekyir no wɔkãa asɛmpa no.

6 Mubuee Bible no na mekenkaan Peter nwoma a odzi kan no tsir ebiasa na anan, na ber a mekenkanee no asɛm a odzi do yi tɔɔ mo do ara yie, seen dza da biara mekenkan a ɔyɛ me no:

7 “Osiandɛ Christ so hun bɔn ho amandze prɛko, nyia ɔtsen hunii maa hɔn a wɔnntsen, ama ɔdze hɛn aakɔ Nyankopɔn nkyɛn; wokum no honam mu, na wɔmaa onyaa nkwa wɔ sunsum mu;

8 Ɔno mu so na ɔnam kɔree kɛkãa asɛm kyerɛɛ esunsum a wɔwɔ efiadze a,

9 Tsetseber no wɔyɛɛ asoɔdzen, wɔ ber a Nyame ne penkyɛr tweɔnee no, wɔ Noah nda no a wɔrepam hɛn no mu, no mu na, akra kakra, mekyerɛ baawɔtwe, nyaa nkwa wɔ nsu no mu” (1 Peter 3:18–20).

10 “Na iyi ntsi na asɛmpa no wɔkãa kyerɛɛ ewufo no so, ama woeebu hɔn atsɛn dɛ nyimpa a wɔwɔ honam mu, na wɔaatsena ase dɛ mbrɛ Nyame tse wɔ sunsum mu.” (1 Peter 4:6).

11 Na ber a morodwendwen dɛm ndzɛmba yinom a wɔakyerɛw ho no, wobuee me ntseasee enyiwa, na Ewuradze no Sunsum besii mo do, na muhun ewufodɔm, nkakraba nye akɛse.

12 Na hɔn esunsum a wodzii pɛrpɛr dɔmtutuw a obi nntum nnkan hɔn; hɔn a wodzii Jesus no ho dase nokwar mu ber a nna wɔtse atseneneefo mu no aboa hɔn ano wɔ fakor;

13 Na hɔn na wɔbɔɔ afɔr wɔ Nyankopɔn ne Ba n’afɔrbɔ kɛse no ne saso do, na wɔsɔɔw abɛbrɛsɛ wɔ hɔn Pomfo ne dzin mu.

14 Woyinom nyina efi ɔnnkyebo asetsena mu, na wɔnam Nyame Egya na ne Ba a Wɔwoo no Kortoo no no hɔn adom do nyaa enyidado a osi pi wɔ enyimnyam wusoɛr no mu.

15 Muhun dɛ enyigye dɛw na ahyɛ hɔn mã, na wɔabɔ mu ridzi ehurusi osiandɛ hɔn ɔgye da no abɛn.

16 Woehyia mu rotweɔn Nyame ne Ba no ne mbae a, ɔreba sunsum wiadze abɛda no edzi akyerɛ hɔn dɛ ɔapon hɔn efi owu ne nkyehoma mu no.

17 Wɔdze bɛma hɔn huntuma a wɔadeda no asan aba no bɔbea a odzi mu no mu, na mbiew besi mbiew enyim, na ntsin na honam aaba ho, na sunsum na nyimpadua bɔbɔ mu, na hɔn mu nnkɛtsetsew bio, ama woetum enya enyigye ne mãhyɛ.

18 Ber a dɔmtutuw no rotweɔn na woridzi nkɔmbɔ, woridzi ehurusi wɔ dɔn a wɔbɛgye hɔn efi owu no mpokyerɛ mu no, Nyame ne Ba no puee hɔ, ɔbɔɔ ahotɔ ho dawur kyerɛɛ, ndɔmmumfo a wodzii nokwar no;

19 Ɔkãa asɛmpa a ɔwɔ hɔ daapem no kyerɛɛ hɔn, owusoɛr ho nkyerɛkyerɛ no nye adasa hɔn asehwe ho mponee, na mponee efi ankorankor biara no bɔn ho wɔ nnuhu ngyinado ho.

20 Mbom ɔannkɔ emumuyɛfo hɔ, nna hɔn a wɔannsom Nyame nye hɔn a woennu hɔnho na hɔn a woguu hɔnho fĩ wɔ ber a wɔwɔ honam mu no, wɔamma ne ndze do wɔ hɔn mu;

21 Nna etuatsewfo no a wɔpoow tsetseberdo nkɔnhyɛfo no hɔn dasegye na kɔkɔbɔ no ennhu no, nna eso wɔannhwɛ n’enyim.

22 Bea a woyinom wɔ no, sum ahyɛ hɔ mã, na atseneneefo no mu dze, asomdwee ara nko;

23 Na ahotseweefo no dzii dɛw wɔ hɔn pon no ho, nna wobuu ntwɛr na wɔgyee too mu dɛ Nyame ne Ba no yɛ hɔn Pomfo na Ɔgyefo fi owu na hɛl nkɔnsɔnkɔnsɔn mu.

24 Hɔn enyim hyerɛnee, na Ewuradze n’enyim kan no tɔɔ hɔn do, na wɔtoow ayɛyi ndwom maa ne dzin krɔnkrɔn no.

25 Mo ho boow me, osiandɛ metsee dɛ Agyenkwa no yɛɛ ne ɔsomdwuma bɛyɛ mfe ebiasa wɔ Jewfo nye hɔn a wɔyɛ Israelfifo no mu, ɔbɔɔ mbɔdzen kyerɛkyerɛɛ hɔn asɛmpa a ɔwɔ hɔ daapem no na ɔato nsa afrɛ hɔn akɔ nnuho mu;

26 Naaso, no ndwuma akɛse, nye anwanwadze, nye tum na tumdzi a ɔyɛe dze bɔɔ nokwar no ho dawur nyina ekyir no, mbom nyimpa kumaabi na wotsie ne ndze, na wodzii dɛw wɔ n’enyim, na wonyaa nkwagye wɔ ne nsamu.

27 Mbom ɔdze mber kumaabi yɛɛ no ɔsomdwuma no wɔ ewufo mu, fitsi mbeamuduamubɔ no do dze kesi no wusoɛr no;

28 Na Peter ne nsɛm a ɔkãe no yɛɛ me ahobow—dza ɔsee dɛ Nyame ne Ba kɔree kɛkãa nyamesɛm kyerɛɛ esunsum a wogu efiadze, hɔn a mber bi wɔyɛɛ asoɔdzen, wɔ mber bi no a Nyankopɔn ne penkyɛr tweɔnee wɔ Noah n’aber do—na mbrɛ osii kãa asɛmpa no kyerɛɛ dɛm esunsum no, na odzii dwuma a no ho hia wɔ hɔn mu dɛm mber tsiabaa no.

29 Na me ahobow mu no, m’enyiwa buei, na me ntseasee nyaa nkenyan, na muhun dɛ Ewuradze nankasa ɔannkɔ emumuyɛfo na asokyewfo no a wɔpoow nokwar no hɔn mu, dɛ ɔrekɛkyerɛkyerɛ hɔn;

30 Mbom hwɛ, oyii binom fii atseneneefo no mu, ɔboaboaa no dɔm ano na oyii asomafo, na ɔdze tum na tumdzi, ɔmaa hɔn tum dɛ wɔmfa asɛmpa ne kan no nkɛma hɔn a wɔwɔ sum no mu, nyimpa esunsum nyina mpo; na dɛm kwan no do na wɔnam dze kãa asɛmpa no kyerɛɛ ewufo no.

31 Na asomafo a wɔasan mu eyi hɔn no kɔree kɛdaa Ewuradze n’enyisɔ da no edzi na wɔbɔɔ ahotɔ ho dawur kyerɛɛ ndɔmmumfo a wɔakyekyer hɔn no, nye hɔn so a wobonu hɔnho na wɔagye asɛmpa no mpo.

32 Dɛm na wɔnam kãa asɛmpa no kyerɛɛ hɔn a woennya no ho nyimdzee na wowui wɔ hɔn bɔn mu, anaadɛ hɔn a wɔpoow nkɔnhyɛfo no na wowui wɔ hɔn mbrato mu no.

33 Woyinom na wɔkyerɛkyerɛɛ hɔn gyedzi wɔ Nyame mu, bɔn ho nnuho, hɔn a wonuma hɔn ma ewufo dze kɔ bɔnfakyɛ mu, nsa a wɔdze gu tsir do dze nya Sunsum Krɔnkrɔn n’akyɛdze no,

34 Nye asɛmpa ne fapem nyina so a no ho hia a ɔsɛ dɛ wohu ana wɔafata ma woeebu hɔn atsɛn dɛ nyimpa a wɔwɔ honam mu, ma wɔaatsena ase dɛ mbrɛ Nyame ne pɛ tse wɔ sunsum mu.

35 Na dɛm na wɔdaa no edzi wɔ ewufo mu, nkakraba na akɛse nyina, hɔn a wɔnntsen nye agyedzifo nyina, dɛ ɔpon nam Nyame ne Ba n’afɔr a ɔbɔe wɔ mbeamudua no do no aba.

36 Dɛm na wɔmaa muhunii dɛ Ɔpomfo no ne mber a odzii wɔ esunsum wiadze hɔ no ɔdze kyerɛkyerɛe na osiesiee nkɔnhyɛfo agyedzifo a wɔgyee no ho dase wɔ honam mu no esunsum;

37 Aama wɔdze ɔpon ho nsɛm no aakɛma ewufo nyina, hɔn a osian hɔn etuatsew na mbrato no ntsi nankasa enntum annkɔ hɔn nkyɛn no, ama ɔnam no nkowaa hɔn ɔsomdwuma no do hɔn so wɔaatse ne nsɛm no.

38 Etsitsir na ekunyim a wohyiaa mu no hɔn mu kor nye Egya Adam, nyia ne Nda fir Tsetse no na adasa nyina egya no,

39 Nye hɛn Nã Eve onyimnyamfo no, nye ne mbabaa agyedzifo piinara a wɔtsenaa ase mfe pii na wɔsoom Nyame tseasefo nokwafo no.

40 Abel, mogyadasefo a odzi kan no, nye ne nuabanyin Seth; a ɔyɛ ekunyinfo no mu kor, a ɔsɛ n’egya Adam papaapa no.

41 Noah, nyia ɔbɔɔ nsuyirii ho kɔkɔ no; Shem, ɔsɔfopanyin kɛse no; Abraham, agyedzifo hɔn egya no; Isaac, Jacob na Moses, Israel hɔn mbramafo kɛse no;

42 Nye Isaiah, nyia ɔdaa no edzi dɛ wɔasera Ɔpomfo no ngo na ɔmbɔ ahotɔ ho dawur nkyerɛ ndɔmmumfo, no na ombue hɔn a wɔakyekyer hɔn egu efiadze no hɔn mbobow no so wɔ hɔ bi.

43 Na Ezekiel, nyia onyaa enyido-adzehu na ohun bɔnsa bi a mbiew a no ho akokwa gu mu a wɔdze honam bɛkata ho a, owusoɛr ber no wɔbɔsoɛr bio, dɛ akra atseasefo no;

44 Daniel a odzii kan hunii na ɔkãa dɛ wɔbɛkyekyer Nyankopɔn n’ahenman wɔ nda a odzi ekyir no mu no, na wɔnnkɛsɛɛ no bio, eso wɔnnkɛfa ama nyimpa biara no;

45 Elias, nyia nna ɔnye Moses wɔ Nɔsakyeree Bepɔw do no;

46 Nye Malachi, nkɔnhyɛnyi no a ɔkãa dɛ Elijah bɛba no—nyia Moroni so kãa no ho asɛm kyerɛɛ Joseph Smith no, daa no edzi dɛ ɔbɛba ansaana Ewuradze ne da kɛse huhuuhu no aba no—hɔn so wɔ hɔ bi.

47 Nkɔnhyɛnyi Elijah na ɔdze anohoba a wɔbɔe kyerɛɛ egyanom no bɛhyɛ mba hɔn akoma mu,

48 Ɔkyerɛ dwuma kɛse a ndaamba wobedzi wɔ Ewuradze ne temple horow no mu wɔ mberano ne mãhyɛ mu, dze apon ewufo nkwa, na wɔdze asɔw mba ano ama hɔn awofo amma wɔaammfa ndom annsɛɛ wiadze nyina wɔ ne mbae no mu.

49 Woyinom nyina nye dodowara so, nye nkɔnhyɛfo so mpo a, wɔtsenaa Nephifo mu na wɔgyee dase wɔ Nyame ne Ba ne mbae ho no, hɔn nyina fora dɔmtutuw no a, nna woehyia mu na wɔrotweɔn hɔn ɔgye da no.

50 Osiandɛ ewufo no ahwɛ kwan akyɛr, ofi ber a hɔn esunsum twee hɔnho fii hɔn honandua mu dɛ wɔwɔ nkowaasom mu.

51 Woyinom na Ewuradze kyerɛkyerɛɛ hɔn, na ɔmaa hɔn tum ma no wusoɛr ekyir no, wonyanee fii ewufo mu, na wɔkɛhɛɛn n’Egya n’ahenman mu no, hɔ na wɔdze bɛkyebo ahenkyɛw na onnyiewiei nkwa bɛma hɔn.

52 Na ofi dɛm mber dze kɔ no, wɔbɔsɔw hɔn dwumadzi no do dɛ mbrɛ Ewuradze bɔɔ ho anohoba no, na woeenya kyɛfa wɔ nhyira nyina a woesiesie ato hɔ ama hɔn a wɔdɔ no no.

53 Nkɔnhyɛnyi Joseph Smith nye m’egya, Hyrum Smith, Brigham Young, John Taylor, Wilford Woodruff, nye esunsum binom so a wɔasan mu eyi hɔn a woesiesie hɔn esie dɛ wɔbɛba wɔ ne mberano mu ebosuo mu ma wɔaatow dwuma a wobedzi wɔ da kɛse a odzi ekyir mu ne fapem,

54 A temple ne nsisii, na ayɛdze ne nyɛe wɔ mu dze apon ewufo nkwa no, hɔn so wɔ sunsum wiadze no mu kã ho.

55 Muhun dɛ hɔn so wɔfora akɛsefo na etsitsir no a wɔsaan mu yii hɔn ahyɛse no dɛ wɔmbɛyɛ Nyankopɔn N’Asɔr no do ahwɛfo no.

56 Ansaana wɔrobɔwo hɔn no mpo, nna hɔn nye binom so, nsa akã hɔn adzesuadze a odzi kan no wɔ esunsum wiadze na wosiesiee hɔn dɛ wɔbɛba wɔ Ewuradze ne mber a wɔahyehyɛ ato hɔ no mu abɛyɛ edwuma wɔ no wenyin ture mu dze ama akra eenya nkwagye.

57 Muhun dɛ elderfo agyedzifo a wɔwɔ mberano yi no mu no, sɛ wofi asetsena a ɔnnkye bo no mu a, wɔnam Nyame ne Ba a Wɔwoo no Kortoo no no werdambɔ no do sɔw hɔn edwuma do kã asɛmpa no a ɔfa nnuho na ɔpon ho no wɔ hɔn a wɔwɔ sum mu na wɔhyɛ bɔn nkowaasom ase wɔ ewufo esunsum wiadze kɛse no mu.

58 Ewufo a wonu hɔnho no, wɔnam Nyankopɔn ne fie mu yɛdze ho setsie do wɔbɔpon hɔn.

59 Na sɛ wotua hɔn mbrato ho kaw no wie, na wɔhohor hɔn ma hɔn ho tsew a, hɔn nsa bɛkã hɔn akatua dɛ mbrɛ hɔn ndwuma tse, osiandɛ wɔyɛ nkwagye mu adzedzifo.

60 Dɛm na woyii enyido-adzehu a ɔfa ewufo hɔn ɔpon ho no kyerɛɛ me, na megye dase, na minyim dɛ dɛm dasegye yi yɛ nokwar, ɔnam hɛn Ewuradze na Agyenkwa, Jesus Christ ne nhyira do, ɔnyɛ dɛm so. Amen.