Ɔfã 81
Nyikyerɛ a wɔnam Joseph Smith Nkɔnhyɛnyi no do dze mae, wɔ Hiram, Ohio, Ebɔw 15, 1832. Wɔfrɛ Frederick G. Williams dɛ ɔmbɛyɛ sɔfopanyin na ɔpamfo wɔ Asɔfodzi a Ɔkrɔn ne President na n’Apamfo kuw no mu. Abakɔsɛm a wɔkyerɛwee too hɔ no kyerɛ dɛ ber a nsa kãa nyikyerɛ yi wɔ Ebɔw, 1832 no, wɔfrɛɛ Jesse Gause dɛ ongyina dzibew dɛ Joseph Smith ne pamfo wɔ President na n’Apamfo kuw no mu. Na ɔnam dɛ oenntum annkɔ dwumadzi no do dɛ mbrɛ ɔsɛ no ntsi, wɔdaan frɛ no maa Frederick G. Williams. Nyikyerɛ a wonyaa no (Ebɔw, 1832) kyerɛ dɛ, nna wɔahyɛ ase dɛ wɔrehyehyɛ dwumadzi a ɔwɔ President a Odzi Kan na n’Apamfo Kuw no mu no, nkanka ɔpamfo dzibew no frɛ wɔ kuw no mu na enyidzi a ɔbata hɔn dwumadzi no ho. Onuabanyin Gause dzii dwuma no mber kakra, mbom, woyii no edzi fii Asɔr no mu Mumu, 1833. Wɔhyɛɛ Onuabanyin Williams wɔ dzibew soronko yi mu Ebɔw 18, 1833.
1–2, President a Odzi Kan na n’Apamfo no na daa nyina wokura ahenman no ne nsaafee; 3–7, Sɛ Frederick G. Williams dzi nokwar wɔ no ɔsomdwumadzi mu a, obenya onnyiewiei nkwa.
1 Nokwar, nokwar, mese ɔwo m’akowaa Frederick G. Williams dɛ: Tsie nyia ɔrekasa yi ne ndze, tsie Ewuradze wo Nyankopɔn n’asɛm no, na tsie frɛ a wɔdze afrɛ wo yi, dɛ ebɛyɛ sɔfopanyin wɔ m’asɔr mu, na ayɛ ɔpamfo ama m’akowaa Joseph Smith, Kakraba.
2 Ɔno na medze ahenman no ne nsaafee ama, dza aber nyina odzi wɔ Asɔfodzi a Ɔkrɔn ne President na n’Apamfo kuw no:
3 Dɛm ntsi, nokwar, megye no to mu, na mibehyira ɔno nye ɔwo so, susuampaara dɛ eyɛ nokwafo wɔ apam mu yi, wɔ dzibew a medze ama wo no, wɔ daa mpaa a ebɔ no w’ano nye w’akoma mu, wɔ bagua mu nye kokoa mu, nye w’asɔfodwumadzi mu so, wɔ asɛmpa no a ebɔ no dawur wɔ atseasefo asaase yi do, nye w’enuanom mu no.
4 Na ndzɛmba yinom ne nyɛe mu no, ebɛyɛ adzepa kɛsenara dze ama wo mfɛfonom adasamba, na ama nyia ɔyɛ w’Ewuradze no n’enyimnyam akrɔn.
5 Dɛm ntsi, dzi nokwar, gyina dzibew a medze ama wo no; boa hɔn a wɔyɛ mberɛw no, ma nsa a ɔsensɛn famu no do wɔ sor, na ma nkotodwe a wɔagow no mu nyɛ dzen.
6 Na sɛ idzi nokwar dze kɔ ewiei a, ibenya bɛkyebo ahenkyɛw, nye onnyiewiei nkwa wɔ tsenabew a mesiesie wɔ m’Egya fie no.
7 Hwɛ, na hu dɛ, iyi nye Alpha na Omega, Jesus Christ no, ne nsɛm. Amen.