1 Kiiō Irooj Anij eaar kōm̧m̧an bwe n̄ūta eo en kanooj kōmetak ilo āneen Ōr, jon̄an Heran, ļeo jatū, eaar mej; a Tira, jema, eaar mour wōt ilo āneen Ōr, an riKaldia.

2 Im ālikin men kein N̄a, Ebream, eaar bōk Serai, im Nehor, ļeo jatū, eaar bōk Milka n̄an pāleen, eo ekar kōrā nejin Heran.

3 Kiiō Irooj eaar ba n̄an eō: Ebream, kwōn ilo̧k jān āniin āneem, im jān ro nukum im jān m̧weo im̧ōn jemam̧, n̄an juon āne I naaj kwaļo̧k n̄an eok.

4 Kōn menin iaar likūt āneen Ōr, an riKaldia, im etal ilo āneen Kenean; im iaar bōk Lot, ļeo nejin ļeo jatū, im kōrā eo pāleen, im Serai kōrā eo pālleō; im barāinwōt jema eaar ļoore eō, n̄an āneo me kōm ar ņa etan Heran.

5 Im n̄ūta eo ekar m̧ōjņo̧ļo̧k; im jema ekar pād wōt ilo Heran im kar jokwe ijo, āinwōt ke eaar wōr elōn̄ bwijin in mennin mour ko ilo Heran; im jema eaar bar oktakļo̧k n̄an kabun̄ n̄an ekjab eo an, kōn menin eaar amņak wōt ilo Heran.

6 A N̄a, Ebream, im Lot, ļeo nejin ļeo jatū, kōmro ar jar n̄an Irooj, im Irooj eaar waļo̧ktok n̄an eō, im ba n̄an eō: Kwōn jerkak, im bōk Lot ippam̧; bwe ewōr unin Aō bōkļo̧k eok jān Heran, im n̄an kōm̧m̧an bwe kwōn juon minister n̄an bōk Eta ilo juon āne eruwamāejet me I naaj lewōj n̄an ineem ālikūm bwe en aer n̄an indeeo, n̄e rej eo̧ron̄ Ainikiō.

7 Bwe N̄aij Irooj am̧ Anij; Ij jokwe ilo lan̄; laļ ej eran Neō; Ij erļo̧ke Peiū ioon lo̧jet eo, im ej pokake Ainikiō; Ij kōm̧m̧an bwe kōto im kijeek ren Aō jariot; Ij ba n̄an toļ ko—Kom̧in etal jān ijin—im lo, rej bōkļo̧k er jān juon aire, kiiō kiiō wōt, ejidimkij.

8 Eta ej Jeova, im I jeļā jem̧ļo̧kin eo jān jinoin; kōn menin Peiū enaaj pād ioom.

9 Im I naaj kōm̧m̧ane jān eok juon laļ eļap, im I naaj kōjeraam̧m̧an eok eļap jān jon̄an, im kōm̧m̧an bwe etam̧ en ļap ilubwiljin aolep laļ, im kwo naaj juon kōjeraam̧m̧an n̄an ineem ālikūm, bwe ilo peier renaaj kotak jerbal in im Priesthood in n̄an aolep laļ;

10 Im I naaj kōjeraam̧m̧an er kōn etam̧; bwe jon̄an wōt lōn̄in eo enaaj bōk Gospel in naaj ņa etan ilo̧kan Eta, im enaaj bōnbōn ineem, im enaaj jutaktok im kōjeraam̧m̧an eok, āinwōt jemāer;

11 Im I naaj kōjeraam̧m̧an er ro rej kōjeraam̧m̧an eok, im kaliaik er ro rej kaliaik eok; im ilo kwe (en̄in, ilo am̧ Priesthood) im ilo ineem (en̄in, am̧ Priesthood), bwe Ij leļo̧k n̄an eok juon kallim̧ur bwe jim̧we in naaj wōnm̧aanļo̧k ilo kwe, im ilo ineem (en̄in jen ba, lukkuun ine eo, ak ineen ānbwin) naaj aolep nokwe ko an laļ jeraam̧m̧an, em̧ool kōn kōjeraam̧m̧an ko an Gospel eo, ko rej kōjeraam̧m̧an ko in lo̧mo̧o̧r, em̧ool mour indeeo.

12 Kiiō, ālikin an Irooj kar kamōj an ekkōnono n̄an eō, im kar jenļo̧k turun mejān jān n̄a, iaar ba ilo buruō: Karejeram̧ eaar kanooj kijejeto kappukot Eok; kiiō em̧ōj aō lo Eok;

13 Kwaar jilkintok enjeļ eo Am̧ n̄an lo̧mo̧o̧ren eō jān anij ko an Elkena, im enaaj em̧m̧an n̄e Ij eo̧ron̄ Ainikiōm, kōn menin karejeram̧ en jerkak im ilo̧k ilo aenōm̧m̧an.

14 Kōn menin N̄a, Ebream, iaar ilo̧k āinwōt Irooj eaar ba n̄an eo, im Lot ippa; im N̄a, Ebream, eaar jiljinon̄oul im ruo iiō ko ke iaar ilo̧k jān Heran.

15 Im iaar bōk Serai, eo iaar bōk pālleō ke iaar pād ilo Ōr, in Kaldia, im Lot, ļeo nejin ļeo jatū, im aolep ro kōm ar tōblaļ er ilo Heran, im itok ilo iaļ eo n̄an āneen Kenean, im jokwe ilo em̧ nuknuk ko ke kōm ar itok ilo iaļ eo am;

16 Kōn menin, indeeo ar am libobo im am ejm̧aan im am lo̧mo̧o̧r, ke kōm ar ito-itak jān Heran ilo iaļ in Jersōn, n̄an itok n̄an āneen Kenean.

17 Kiiō n̄a, Ebream, iaar kalōk juon lokatok ilo āneen Jersōn, im kar kōm̧m̧ane juon katok n̄an Irooj, im kar jar bwe n̄ūta eo en maron̄ kar oktakļo̧k jān m̧weo im̧ōn jema, bwe ren maron̄ jab jako.

18 Innām kōm ar eļļāļo̧k jān Jersōn deblo̧ke āneo n̄an jikin in Sejem; ekar pād ilo meļaaj ko in Moreh, im kōm ar dedeļo̧k am itok ilo tōrerein ko an āneo āneen riKenean, im iaar ajeļo̧k katok eo ijo ilo meļaaj ko in Moreh, im kar kūr ioon Irooj ilo niknik, kōnke kōm ar dedeļo̧k am itok ilo āneo āneen laļ in kabun̄ n̄an ekjab.

19 Im Irooj eaar waļo̧ktok n̄an eō ilo uwaak in jar ko aō, im ba n̄an eō: N̄an ro ineem I naaj leļo̧k āniin.

20 Im n̄a, Ebream, iaar jerkak jān jikin in lokatok eo me iaar kalōke n̄an Irooj, im kar em̧m̧akūt jān ijo n̄an juon toļ irear in Betel, im kajutak em̧ nuknuk eo aō, Betel iturilik, im Hai iturear; im ijo iaar bar kalōk juon lokatok n̄an Irooj, im bar kūr ioon etan Irooj.

21 Im n̄a, Ebream, iaar ito-itak, im etal wōt ļo̧k n̄an rak; im eaar wōr wōnm̧aanļo̧k wōt in juon n̄ūta ilo āneo; im n̄a, Ebream, iaar jek n̄an wanlaļļo̧k ilo Ijipt, n̄an pād ijo, bwe n̄ūta eo eaar kanooj kaen̄tanaan.

22 Im ālikin men kein ke iaar itok iturin n̄an deļo̧n̄ļo̧k ilo Ijipt, Irooj eaar ba n̄an eō: Lo, Serai, kōrā eo pāleem̧, ej juon kōrā edeo̧ n̄an kalimjeke;

23 Kōn menin ālikin men kein, n̄e riIjipt renaaj lo e, renaaj ba—Lieņ ej pāleen leen; im renaaj m̧an eok, a renaaj dāpiji wōt bwe en mour; kōn menin lale bwe kwōn kōm̧m̧an āinwōt jekjek in:

24 Lieņe en ba n̄an riIjipt raņ, e ej jeiūm̧ im jatūm kōrā, im kwo naaj mour.

25 Im ālikin men kein N̄a, Ebream, iaar ba n̄an Serai, kōrā eo pālleō, aolep men ko Irooj eaar ba n̄an eō—Kōn menin ba n̄an er, ij kajjitōk ippam̧, kwe kwōj jeiū im jatū kōrā, bwe en maron̄ em̧m̧an n̄an eok, im inaaj mour kōnke kwe.