1 Sa lewa na Turaga na Kalou me tatara sara vakabibi na dausiga ena vanua ko Uri, ka sa mate kina ko Erani na taciqu; ia a sa tiko mai Uri mai Kalitia ko Tira na tamaqu.

2 Ka sa yaco ni’u sa tauri Serai koi au ko Eparaama, me watiqu, ia ko Neori na taciqu sa tauri Milika me watina, ko koya na luvei Erani.

3 A sa kaya vei au na Turaga: Eparaama, mo toki tani mai na nomu vanua, mai vei ira na wekamu, kei na vale nei tamamu, ki na dua na vanua au na vakaraitaka vei iko.

4 O koya au sa biuta kina na vanua ko Uri mai Kalitia, meu lako ki na vanua ko Kenani; kau sa kauti Loti voli, na luvei taciqu, kei na watina, kei Serai na watiqu; ia sa muri au talega mai na tamaqu, ki na vanua keimami sa vakatoka ko Karana.

5 A sa oti mai na dausiga; ia sa tiko voli mai Karana ko tamaqu ka vakaitikotiko kina, ni sa levu sara na qele ni sipi mai Karana; a sa lesu tale ko tamaqu ki na qaravi kalou matakau, ka sa tiko vakadua ga mai Karana.

6 Ia koi au, ko Eparaama, kei Loti, na luvei taciqu, keirau sa ia tiko ga na masumasu vua na Turaga, a sa rairai vei au na Turaga, ka kaya vei au: Mo cavutu, ka kauti Loti vata kei iko; niu sa nakita tiko meu kauti iko tani yani mai Karana, ia au na lesi iko mo noqu italatala ka mo kauta yani na yacaqu ki na vanua vou ko ya kau na solia vei ira na nomu kawa era na muri mai vei iko me ra taukena ka tawamudu, ni ra sa vakatudaliga ki na domoqu.

7 Ni sai Au na Turaga na nomu Kalou; sa noqu itikotiko ko lomalagi; ka sa itutu ni yavaqu ko vuravura; au sa dodoka yani na ligaqu ki na wasawasa, ka sa muria na domoqu; raica au sa qisia na cagi kei na yameyame ni bukawaqa me noqu qiqi vakaturaga. Au sa kaya ki na veiulunivanua—mo ni toki tani—ia raica era sa kau yani ena covulaca, vakidacala ka vakasauri.

8 Na yacaqu ko Jiova, kau sa kila na icavacava mai na itekitekivu; ia ena vakarurugi iko tiko na ligaqu.

9 Kau na cakava mai vei iko e dua na matanitu levu, kau na vakalougatataki iko me sega ni vakarautaki rawa na kena levu, kau na vakarogoya na yacamu ena veimatanitu kecega, ia ko na veivakalougatataki vei ira na nomu kawa era na muri mai vei iko, ia ena ligadra era na kauta kina na nona cakacaka kei na Matabete ki na veivanua kecega;

10 Ia au na vakalougatataki ira ena vuku ni yacamu; ko ira kecega sa vakabauta na kosipeli era na vakatokai ena yacamu; ka ra na okati me nomu kawa ka ra na tucake ka vakacaucautaki iko, ni ko sa tamadra.

11 Ia au na vakalougatataki ira era sa vakalougatataki iko, ka cudruvi ira sa cudruvi iko; ia ena vukumu (oya, ena nomu Matabete) kei na vukudra na nomu kawa (oya, na nomu Matabete), niu sa yalataka kina oqo ni na tiko ga vei iko na dodonu oqo, kei ira na nomu kawa era na muri mai vei iko (oya me da kaya, na nona kawa, se na nona kawa dina sara) era na vakalougatataki kina na veimatavuvale kece sara ni vuravura, io ena veivakalougatataki ni Kosipeli, sai koya na veivakalougatataki ni veivakabulai, io na bula tawamudu.

12 Ia ni sa tini na nona vosa na Turaga vei au, ka golea tani na matana mai vei au; au sa qai kaya e lomaqu: Au sa vakasaqarai kemuni matua sara koi au na nomuni tamata; ia oqo au sa kunei kemuni.

13 Ko ni a tala yani na nomuni agilosi me vakabulai au mai na kalou i Ilikena, ia kau na caka vinaka meu vakatudaliga ki na domomuni, o koya mo ni laiva na nomuni tamata me tucake ka lako yani ena vakacegu.

14 Ia koi au ko Eparaama, au sa cavutu ka lako yani me vaka na ivakaro ni Turaga vei au, ia keirau sa lako vata kei Loti; au a sa yabaki onosagavulu karua tiko koi au ko Eparaama, ena gauna au biuti Karana kina.

15 Kau sa kauti Serai, o koya kau a qai vakawatitaka niu sa tiko mai Uri e Kalitia, ia kei Loti tale ga na luvei taciqu, kei na veika kece e neitou keitou sa kumuna rawa, kei ira tale ga era sa saumaki mai Karana; ka lako yani ki na sala vaka ki na vanua ko Kenani; ia keimami dau vakaitikotiko ga ena vale laca ena neimami ilakolako.

16 Ia, sa neimami ivakaruru ko koya na gauna tawamudu, na neimami uluvatu ka neimami ivakabula, ena neimami ilakolako mai Karana vaka ki Kerisoni ka me yaco ki na vanua ko Kenani.

17 Ia, koi au ko Eparaama, au sa tara e dua na icabocabo ni soro ena vanua ko Jerisoni ka vakacacabo vua na Turaga, ka masuta me kau laivi na dausiga mai na vuvale nei tamaqu, me ra kakua ni rusa.

18 Keimami sa qai lako siviti Jerisoni ka curuma na vanua ko Sikemi; sa tiko ena buca ko More, ia keimami sa curuma oti na iyalayala ni nodra vanua na kai Kenani, au a vakacabo isoro ena buca ko More, ka vakamamasu ena yalodina vua na Turaga ni keimami sa curuma oqo na nodra vanua na veimatanitu era dau qarava na matakau.

19 A sa rairai vei au na Turaga ni sa rogoca na noqu masu, ka kaya vei au: Au sa solia na vanua oqo vei ira na nomu kawa.

20 Ia koi au, ko Eparaama, au sa tucake mai na icabocabo ni soro au a tara me nona na Turaga, ka lako mai kea ki na dua na ulunivanua ena tokalau kei Peceli, ka birika kina na noqu vale laca, ia ko Peceli ki na ra kei Ai ki na tokalau; au sa tara tale mai kea e dua na icabocabo ni soro vua na Turaga, ka masuta tale na yaca ni Turaga.

21 Ia koi Au, ko Eparaama, au sa cavutu ka kuria yani na noqu ilakolako vaka ki na ceva; ia sa yaco tikoga na dausiga ena vanua taucoko; ia koi au, ko Eparaama au sa mani nakita me’u lako sobu sara ki Ijipita, ka tiko vulagi kina, ni sa veivakararawataki sara na dausiga.

22 Ka sa yaco ni’u sa vakarau curu ki Ijipita, sa kaya vei au na Turaga: Raica, sa yalewa mata vinaka sara ko Serai na watimu;

23 O koya ena yaco kina, ni ra na raici koya na kai Ijipita, era na kaya—Oqo na watina; ka ra na vakamatei iko, ia era na vakabulai koya; oqo na ka mo na kitaka:

24 Me kaya ko koya vei ira na kai Ijipita ni sa ganemu. Io ko na qai bula kina.

25 Ka sa yaco niu sa tukuna vei Serai na watiqu, koi au ko Eparaama, na veika kece sara sa tukuna vei au na Turaga—A ka oqo au sa masuti iko kina mo kaya ni ko sa ganequ me’u vinaka kina ena vukumu, ka me bula na yaloqu ena vukumu.