1 Mo afta, Lod i bin talem: “Yufala i kam, yumi godaon.” Mo oli bin godaon long stat, mo olgeta, hemia ol God, oli bin oganaesem mo oli bin mekem ol heven mo wol ia.

2 Mo wol ia, afta we oli mekem, i bin emti mo i no gat man long hem, from se oli no bin mekem eni samting, be raon wol ia nomo; mo tudak i bin rul long fes blong dip solwota, mo Spirit blong Ol God i bin kavremap fes blong ol wota.

3 Mo olgeta (ol God) oli bin talem se: “I mas gat laet;” mo i bin gat laet.

4 Mo olgeta ia (ol God), oli andastanem laet ia, from se hem i saen gud; mo oli bin seraotem laet, o oli bin mekem se i seraot, laet i seraot long tudak.

5 Mo ol God oli bin singaotem laet ia Dei, mo tudak ia, oli singaotem Naet. Mo i bin hapen se stat long naet i go kasem moning, oli singaotem naet. Mo stat long moning i go kasem naet, oli singaotem dei; mo hemia i faswan, o stat, blong wanem we oli bin singaotem dei mo naet.

6 Mo ol God oli bin talem tu se: “Bae i gat wan bigfala skae long medel blong ol wota, mo bae i seraotem ol wota antap mo ol wota daon.”

7 Mo ol God oli bin givim oda blong bigfala skae i kam, mekem se hem i seraotem ol wota we oli stap andanit long bigfala skae long ol wota we oli stap antap long bigfala skae; mo i bin hapen olsem, olsem we oli bin givim oda from.

8 Mo ol God oli bin singaotem bigfala skae ia, Heven. Mo i bin hapen se i bin naet go kasem moning, we oli bin singaotem naet; mo i bin hapen se i bin moning i go kasem naet, we oli bin singaotem dei; mo hemia i bin seken taem we oli bin singaotem naet mo dei.

9 Mo ol God oli bin givim oda mo talem se: “Ol wota andanit long heven oli mas kam tugeta long wan ples, mo graon i mas kam drae;” mo i bin hapen olsem we oli bin givim oda from;

10 Mo ol God oli singaotem graon ia we i drae, Wol; mo ol wota we oli bin kam tugeta long wan ples, oli bin singaotem Ol Bigfala Wota; mo ol God oli bin luk se tufala i bin obei long olgeta.

11 Mo ol God oli talem: “Bae yumi mekem graon ia blong gras i gro long hem; mo lif i mas givim sid; frut tri i mas givim frut, folem kaen blong hem, we sid blong hem i givim sem kaen tri long wol;” mo i bin hapen olsem we oli bin givim oda from.

12 Mo ol God oli bin oganaesem graon blong gras i gro aot long sid blong hem, mo lif blong hem i tekem lif aot long sid blong hem, mo i givim sid folem kaen blong hem; mo blong graon i givim tri folem sid blong hem, mo i givim frut, we sid blong hem bae i givim semfala tri nomo, folem kaen blong hem; mo ol God oli bin luk se oli stap obei long olgeta.

13 Mo i bin hapen se ol God oli bin kaontem ol dei; stat long naet i go kasem moning, oli bin singaotem naet; mo i bin hapen se, stat long moning i go kasem naet, oli bin singaotem dei; mo i bin nambatri taem.

14 Mo ol God oli bin oganaesem ol laet long bigfala skae blong heven, mo oli bin mekem olgeta oli seraotem deitaem long naet taem; mo oli bin oganaesem olgeta blong oli stap olsem ol saen mo ol taem blong yia, mo ol dei mo ol yia;

15 Mo oli oganaesem olgeta blong oli stap olsem ol laet long bigfala skae blong heven, blong oli givim laet long wol; mo i bin hapen olsem.

16 Mo ol God oli bin oganaesem tufala bigfala laet, laet we i moa bigwan blong i rul long deitaem, mo smol laet blong i rul long naet taem; wetem smol laet ia, oli putum ol sta tu wetem;

17 Mo ol God oli putum olgeta long bigfala skae blong ol heven, blong oli givim laet long wol, mo blong oli rul ova long deitaem mo ova long naet taem, mo blong seraotem laet long tudak.

18 Mo ol God oli bin stap lukluk ol samting ia we oli bin givim oda long olgeta kasem taem we oli bin obei.

19 Mo i bin hapen se naet kasem moning, hem i bin naet; mo i bin hapen se moning kasem naet, i bin dei; mo hem i bin nambafo taem.

20 Mo ol God oli bin talem: “Bae yumi mekem ol wota oli rere blong tekem fulap long ol animol we oli muv mo oli laef; mo pijin, blong oli save flae antap long graon long bigfala open skae blong heven.”

21 Mo ol God oli mekem ol wota oli rere, blong oli tekem ol bigfala welfis, mo evri animol we i laef mo i muv, we ol wota ia bae oli tekem fulap long olgeta folem kaen blong olgeta; mo evri pijin we i gat wing, folem kaen blong hem. Mo ol God oli bin luk se bae oli obei long olgeta, mo tu, se plan blong olgeta i bin gud.

22 Mo ol God oli bin talem: “Bae yumi blesem olgeta, mo mekem olgeta oli karem fulap pikinini mo kam plante, mo bae oli fulumap ol wota long ol solwota o ol bigfala wota; mo bae yumi mekem pijin i karem fulap pikinini long wol ia.”

23 Mo i bin hapen se i bin naet kasem moning, we oli bin singaotem naet; mo i bin hapen se i bin moning kasem naet, we oli bin singaotem dei; mo i bin nambafaef taem.

24 Mo ol God oli bin mekem graon ia i rere blong tekem animol we i laef, folem defdefren kaen blong hem, ol bigfala mo smol animol, mo ol animol we oli stap wokbaot long graon, mo ol narafala animol blong wol, folem ol defdefren kaen blong olgeta; mo i bin hapen olsem we oli bin talem.

25 Mo ol God oli bin oganaesem wol blong tekem ol narafala animol folem ol defdefren kaen blong olgeta, mo ol smol mo ol bigfala animol folem ol defdefren kaen blong olgeta, mo evri animol we i stap wokbaot long graon folem ol defdefren kaen blong hem; mo ol God oli bin luk se bae oli obei.

26 Mo ol God oli bin toktok raon bitwin olgeta mo oli talem: “Yufala i kam, yumi godaon, mo mekem man i folem pikja blong yumi; mo bae yumi mekem olgeta oli rul ova long ol fis blong solwota, mo ova long ol pijin long skae, mo ova long ol bigfala mo smol animol, mo ova long ful wol, mo ova long evri animol we i stap wokbaot long graon.”

27 Mekem se ol God oli bin go daon blong mekem man folem pikja blong olgeta, folem pikja blong God we bae oli mekem hem, man mo woman, oli bin mekem olgeta.

28 Mo ol God oli bin talem: “Bae yumi blesem olgeta.” Mo ol God oli bin talem: “Bae yumi mekem olgeta oli karem fulap pikinini mo kam plante, mo fulumap wol, mo gat paoa ova long hem, mo rul ova long fis long solwota, mo ova long ol pijin long skae, mo ova long evri samting we i laef mo i stap muvmuv long wol.”

29 Mo ol God oli bin talem: “Luk. Bae yumi givim olgeta evri lif we i karem sid we i save kamaot long fes blong ful wol, mo evri tri we bae i gat frut long hem; yes, evri frut blong tri we insaed long hem i gat sid, bae yumi givim long olgeta; bae i olsem kaekae blong olgeta.

30 Mo long evri animol long wol, mo long evri pijin long skae, mo long evri samting we i stap wokbaot long graon, luk, bae yumi givim laef long olgeta, mo tu, bae yumi givim evri grin gras olsem kaekae, mo olsem ia nao bae ol samting ia oli oganaes.”

31 Mo ol God oli talem: “Bae yumi mekem evri samting we yumi bin talem, mo oganaesem olgeta; mo luk, bae oli obei evriwan.” Mo i bin hapen se i bin naet go kasem moning, we oli bin singaotem naet; mo i bin hapen se i bin moning kasem naet, we oli bin singaotem dei; mo oli bin kaontem se i nambasikis taem.