Wan Pikja Kopi we I Kamaot long Buk blong Ebraham

Pkj. 1. Kokob, we i minim fas kriesen, we i kolosap moa long selestial, o haos blong God. Faswan long gavman, laswan long fasin blong kaontem taem. Fasin blong kaontem taem folem selestial taem, mo selestial taem ia i minim wan dei i olsem wan kiubit. Wan dei long Kokob i semmak long wan taosen yia folem fasin blong kaontem taem long wol ia, we Ol Man Ijip oli singaotem Jah-oh-eh.

Pkj. 2. We i stap kolosap long Kokob, we Ol Man Ijip oli singaotem Oliblij, we i nambatu bigfala kriesen we i rul, we i stap kolosap long selestial, o ples ia we God i stap long hem; i holem ki blong paoa tu, long saed blong ol nara wol; olsem we God i bin talemaot long Ebraham tru long revelesen, taem hem i bin stap mekem sakrifaes antap long wan olta we hem i bin bildim i go long Lod.

Pkj. 3. I blong ripresentem God, we i stap sidaon long jea blong hem, wetem paoa mo atoriti; wetem wan hat blong king blong laet we i no save finis we i stap long hed blong hem; i stap ripresentem ol bigfala Ki toktok blong Tabu Prishud, olsem we God i bin talemaot long Adam tru long revelesen insaed long Garen blong Iden, mo tu, i bin talemaot long Set, Noa, Melkesedek, Ebraham, mo long evriwan we God i bin givim Prishud long olgeta.

Pkj. 4. Hemia i Hibru toktok Rokia, we i minim skae we i raon, o skae antap long heven; hem i wan namba pikja, we long lanwis blong Ijip, i minim wan taosen; hem i mak blong kaontem taem blong Oliblij we i semmak long Kokob long saed blong fasin blong muv raon long hemwan, mo long saed blong fasin blong kaontem taem blong hem.

Pkj. 5. Oli singaotem long lanwis blong Ol Man Ijip, Enis-go-on-dos; hemia tu, i wan long ol wol we i stap rul, mo Ol Man Ijip oli talem se hem i San, mo hem i stap tekem laet blong hem long Kokob tru long Kae-i-vanras, we i bigfala Ki, o, long narafala toktok, paoa we i stap rul, we i stap rul ova long fiftin nara wol o sta we oli stap nomo, mo tu, i stap rul ova long Flo-is, o Mun, Wol mo San long saed blong muv blong olgeta. Wol ia, i kasem paoa blong hem tru long Kli-flo-si-ses, o Hakokabim, mo ol sta we ol namba 22 mo 23 i ripresentem olgeta, we oli stap kasem laet blong olgeta long Kokob we i stap muv raon long hemwan.

Pkj. 6. I ripresentem ol fo pat blong wol ia.

Pkj. 7. I ripresentem God we i stap sidaon antap long jea blong hem, we i stap talemaot long revelesen tru long ol heven, ol bigfala Ki toktok blong Prishud; mo tu, hem i saen blong Tabu Spirit we God i givim long Ebraham; Tabu Spirit ia i tekem sep blong wan dav.

Pkj. 8. I karem ol toktok we oli raetem we oli no save talemaot long wol; be oli save kasem insaed long Tabu Tempol blong God.

Pkj. 9. I no blong talemaot long taem naoia.

Pkj. 10. Semmak.

Pkj. 11. Semmak. Sapos wol i save faenemaot ol namba ia, bae i mas olsem. Amen.