1 Ao n aron aei ti na katiai karawa ma te aonaba, ao ni kabane bwaai ake iai.

2 Ao tenaan Atua a taku i marenaia: N te kaitiua n tai ti na katoka ara mwakuri, are ti a tia ni marooroakinna; ao ti na motirawa n te kaitiua n tai man ara mwakuri ni kabane ake ti a tia ni marooroakinna.

3 Ao tenaan Atua a toki n te kaitiua n tai, ibukina bwa n te kaitiua n tai a na motirawa man aia mwakuri ni kabane ake ngaiia (tenaan Atua) a marooro i marenaia bwa a na karaoi; ao a katabua. Ao aikai bon aia babaire n te tai are a marooro imarenaia bwa a na karaoa karawa ao te aonaba.

4 Ao tenaan Atua a ruo ao a karaoi baikai ake karinanin taian karawa ao te aonaba, ngke a karaoaki n te bong are tenaan Atua a karaoa te aonaba ma karawa.

5 N aron bwaai nako ake a tia n taekinni ni kaineti ma aroka ni kabane n te tawaana i mwaain ae a roko n te aonaba, ao aroka ni kabane n te tawaana i mwaain ae a riki, bwa tenaan Atua a tuai ni kabwaka te karau i aon te aonaba ngke a marooro bwa a na karaoi, ao a tuai ni karika te aomata bwa e na ribanaa aontano.

6 Ma e waerake te mabubu man te aonaba, ao e kamwaimwa aontano ni kabuta.

7 Ao tenaan Atua a karika te mwaane man bubun aontano, ao a ana tamneina (are, tamnein te aomata), ao a karinna i nanona; ao a uka nako nanon bwairina ikeiken te maiu, ao te mwaane e riki bwa te aomata ae maiu.

8 Ao tenaan Atua a unika te nne n aroka, mai mainiku i Eten, ao a katuka te mwaane ikekei, are tamneina a karinna i nanon te rabwata are a tia ni karikia.

9 Ao mai aontano tenaan Atua a karaoi kaai bwa a na riki n aekaia nako aika a kakukureia te taratara ao a tamaroa ibukin te amwarake; te kai ni kamaiu naba, i nukan te nne n aroka, ao te kai n ataa ae raoiroi ao ae buakaka.

10 Bon iai te karaanga are biri mai Eten, n teboka te nne n aroka, ao mai ikekei e bwenaua ao n riki bwa karaanga aika aua.

11 Ao tenaan Atua a ana te mwaane ao a katukua i nanon te Nne n Aroka i Eten, bwa e na ribanaia ao ni kawakinna.

12 Ao tenaan Atua a tuanga te mwaane, ni kangai: Man kaai nako n te nne n aroka ko kona n amwarake n akea tukam,

13 Ma man te kai n ataa ae raoiroi ao ae buakaka, ko na tai amwarake iai; bwa n te tai are ko kanna, ko na boni mate. Ngkai ngai, Aberaam, I nooria bwa e kaineti ma ana tai te Uea, are bon tain Korobo; bwa ni karokoa te tai aei tenaan Atua a tuai n anga nakon Atam aron bairean ana tai.

14 Ao tenaan Atua a taku: Ti riai ni karika te tia ibuobuoki ibukin te mwaane, bwa e aki raoiroi bwa te mwaane e na tiku n ti ngaia, ngaia are ti na karaoa te tia ibuobuoki ibukina.

15 Ao tenaan Atua a karokoa te matu ae korakora bwa e na taona Atam; ao e matu, ao a anaa teaina riin kaokaona, ao a kaina te iriko ni bonota mwiina;

16 Ao man te rinikaokao are a anaia tenaan Atua mai iroun te mwaane, a karaoa te aine, ao a kairia nakon te mwaane.

17 Ao Atam e taku: Aio bon riin riu, ao irikon irikou; ngkai e na aranaki bwa te Aine, ibukina bwa e anaaki mai i nanon te mwaane.

18 Ngaia are te mwaane e na kitana tamana ao tinana, ao e na nim ma buuna, ao a na riki n ti te irikona.

19 Ao a uaia n akea karabaia, te mwaane ao buuna, ao a bon aki maama.

20 Ao man aontano tenaan Atua a karikii manin te tawana n aekaia nako, ao mannikiba i annang n aekaia nako, ao a uotiia nakon Atam bwa a na nooria bwa tera ae e na araniia iai; ao te ara nako are e araniia iai bwaai aika maiu Atam, a na riki bwa araia nako.

21 Ao Atam e anganiia maan aika manana ni kabane araia, nakoia mannikiba i annang, nakoia manin te tawana; ao ibukin Atam, e boni karekeaki te tia ibuobuoki ibukina.