Hōhepa Mete—Matiu

1. A e mea atu ana ahau ki a koutou, e kore koutou e kite i a au a muri ake nei me te mohio ko ahau ano tera i tuhituhia e nga poropiti, kia mea ra ano koutou: Kia whakapaingia ia e haere mai ana i runga i te ingoa o te Ariki, i runga i nga kapua o te rangi, me nga anahera tapu katoa i a ia. A ka mohio ana akonga tera ano ia e hoki mai ki runga i te whenua, i muri iho o tona whakakororiatanga me tona karaunatanga i te ringa matau o te Atua.

2. Na, ka puta atu a Ihu, ka haere atu i te temepara; a ka haere mai ana akonga ki a ia, kia rongo ai ki a ia, me te mea atu: E te Kai-whakaako, whakaaturia mai ki a matou mo te hanganga o te temepara, tau i mea ai—Ka whakahoroa ki raro, a ka waihotia ki a koutou kia takoto noa.

3. A ka mea atu a Ihu ki a ratou: Kahore ianei koutou i te kite i enei mea, a kahore ianei koutou i te mohio ki enei mea ? He pono taku e mea atu nei ki a koutou, e kore rawa e mahue i konei i runga i tenei temepara tetahi kohatu i runga i tetahi, engari ka whakahoroa ki raro.

4. A ka mahue ratou i a Ihu, a haere ana ki runga ki Maunga Oriwa. A i a ia e noho ana i runga i Maunga Oriwa, ka haere puku mai nga akonga ki a ia, ka mea: Korerotia mai ki a matou ko ahea enei mea kua korerotia e koe, mo te whakahoronga i te temepara me nga Hurai; a he aha te tohu o tou haerenga mai, me te mutunga o te ao, ara te whakangaromanga o te hunga kino, koia nei te mutunga o te ao ?

5. A ka whakahoki a Ihu, a ka mea ki a ratou: Kia tupato kei mamingatia koutou e te tangata.

6. No te mea he tokomaha e haere mai i runga i toku ingoa, e mea—Ko ahau te Karaiti—a he tokomaha e mamingatia;

7. Ko reira koutou tukua ai kia tukinotia, a e whakamatea koutou; e whakakinongia e nga iwi katoa; hei whakaaro hoki ki toku ingoa;

8. A ko reira ano he tokomaha e he, a ka tuku etahi i etahi;

9. He tokomaha ano hoki nga poropiti teka e whakatika, a he tokomaha e mamingatia e ratou;

10. A i te kino ka hua, ka matoke haere te aroha o te tokomaha;

11. A ko ia e u ana taea noatia te mutunga ka whakaorangia nga pera;

12. No reira, ina kite koutou i te mea whakarihariha, i te whakangaromanga i korerotia e Raniera te poropiti, mo te whakangaromanga o Hiruharama, ko reira koutou tu ai i te wahi tapu; ko ia e korero pukapuka ana kia matau ia.

13. Ko reira kia rere te hunga i Huria ki nga maunga;

14. Te tangata i runga i te whare, kia rere ia, aua e hoki ki te tiki i ona mea i roto i te whare;

15. Kauaka ano hoki te tangata i te maara e hoki ki te tiki i ona kakahu;

16. Aue te mate mo te hunga e hapu ana, me te hunga e whangai ana ki te u i aua ra;

17. No reira, inoi atu koutou ki te Ariki, kei rokohanga koutou e te whati i te hotoke, i te Hapati ranei;

18. A, i aua ra he nui nga whakapawera ki nga Hurai, me te hunga katoa e noho ana i Hiruharama, he mea kahore ano ona rite i tukua iho e te Atua ki runga i a Iharaira, mai ano o te timatanga o to ratou kingitanga taea noatia tenei ra; kahore, e kore ano hoki e tukua atu ano ki runga ki a Iharaira.

19. A ko nga mea katoa kua pa nei ki a ratou, he timatanga noa tera o nga whakapouritanga tera e puta mai ai ki runga i a ratou.

20. A ki te kahore e poroa aua ra, e kore e ora tetahi kikokiko o ratou; otira ka whakaaroa te hunga whiriwhiri, kia rite ki ta te kawenata, ka poroa aua ra.

21. Nana, ko enei mea kua korerotia atu nei e ahau ki a koutou, mo nga Hurai; a tenei ano, i muri i nga whakapawera i aua ra e puta mai ai ki Hiruharama ki te mea mai tetahi tangata ki a koutou, Na, tenei a te Karaiti, Na tera, aua e whakapono ki a ia;

22. No te mea i roto i aua ra, tera e ara ake nga Karaiti teka, me nga poropiti teka, a ka hoatu e ratou nga tohu me nga mea whakamiharo, me e taea, ka mamingatia e ratou te hunga e whiriwhiria, ko ratou te hunga whiriwhiri i runga i ta te kawenata.

23. Nana, e korero atu ana ahau ki a koutou hei whakaaro ki te hunga whiriwhiri; a e rongo ana hoki koutou i nga pakanga me nga rongo pakanga; nana kei ohorere koutou, no te mea ka tutuki nga mea katoa kua korerotia e ahau ki a koutou; engari, taihoa ia te mutunga.

24. Nana, kua korerotia e ahau ki a koutou i mua.

25. No reira, ki te mea mai ratou ki a koutou: Nana, kei te koraha ia; aua e haere atu; nana, kei nga ruma o roto rawa ia aua e whakapono;

26. No te mea ka rite ki te maramatanga o te ata e puta mai ana i te rawhiti, a marama tonu atu ki te hauauru, a kei runga i te whenua katoa, ka pera ano hoki te haerenga mai o te Tama a te Tangata.

27. Na, ka korero kupu whakarite ahau ki a koutou. Nana, ko te wahi i te tupapaku, ko reira huihui ai nga kahu; ka pera ano hoki aku i whiriwhiri ai, ka kohia mai i nga pito e wha o te ao.

28. A ka rongo ratou i nga pakanga me nga rongo pakanga.

29. Nana, e korero ana ahau mo aku i whiriwhiri ai; no te mea ka whakatika tetahi iwi ki tetahi iwi; tetahi kingitanga ki tetahi kingitanga; a ka ai he hemo kai, me nga mate paraite, me nga ru whenua ki te tini o nga wahi.

30. A tenei ano, i te kino ka hua, ka matoke haere te aroha o te tokomaha; a ko ia e u ana ka whakaorangia.

31. A tenei ano, e kauwhautia tenei Rongo-pai o te kingitanga puta noa i te ao katoa, he mea whakaatu ki nga iwi katoa, a ko reira puta mai ai te mutunga, ara, te whakangaromanga o te hunga kino;

32. A tera ano e tutuki te whakarihariha me te whakangaromanga i korerotia e Raniera te poropiti.

33. A i muri tonu iho i nga whakapaweratanga o aua ra, e whakapouritia te ra, e kore ano hoki e titi te atarau, a ka taka iho nga whetu i te rangi, a ka ngaueue nga mea kaha o te rangi.

34. He pono taku e mea atu nei ki a koutou, ko tenei whakatupuranga e puta mai ai enei mea e kore e pahemo atu, a kia tutuki ra ano nga mea i korerotia e ahau ki a koutou.

35. Ahakoa, tera e puta mai nga ra e pahemo atu ai te rangi me te whenua; a ko aku kupu e kore e pahemo, otira ka tutuki katoa.

36. A me taku i ki ai i te tuatahi, muri iho i nga whakapawera o aua ra, me te whakangaueuetanga o nga mea kaha o te rangi; a ko reira ano hoki puta mai ai te tohu o te Tama a te Tangata i te rangi, a ko reira nga iwi katoa o te whenua tangi ai; a e kite ratou i te Tama a te Tangata e haere mai ana i runga i nga kapua o te rangi me te kaha me te kororia nui;

37. A ko ia e puranga ana i taku kupu e kore e mamingatia, no te mea ka haere mai te Tama a te Tangata, a ka tonoa e ia ana anahera i mua i a ia, me te tetere tangi nui, a ka huihuia e ratou te toenga o ana i whiriwhiri ai, i nga hau e wha, i tetahi pito o te rangi, puta noa i tetahi.

38. Na, kia akona koutou e te piki ki tetahi kupu whakarite:—I ona manga e ngawari ana, e timata ana te pihi o nga rau, ka mohio koutou kua tata te raumati;

39. Ka pera ano hoki ana i whiriwhiri ai, ina kite ratou i enei katoa, ka mohio ratou, e tata ana ia; ara kei nga tatou;

40. Otira, ko taua ra me te haora, kahore he tangata e mohio ana; kaore nga anahera o te Atua i te rangi, engari ko toku Matua anake.

41. Heoi ka rite ki nga ra i a Noa, ka pera ano hoki i te haerenga mai o te Tama a te Tangata;

42. Ka rite hoki ki ta ratou i nga ra i mua atu o te waipuke; no te mea tae noa ki te ra i tomo ai a Noa ki roto i te aka, e kai ana ratou, e inu ana e marena ana, e hoatu ana kia marenatia;

43. A kihai i mohiotia, taea noatia te putanga mai o te waipuke, a kahakina atu ana ratou katoa; he pera ano hoki te haerenga mai o te Tama a te Tangata.

44. No reira ano hoki tutuki ai te mea i tuhia nei, ara i roto i nga ra whakamutunga tokorua i roto i te maara, kotahi e tangohia, kotahi e waiho;

45. Tokorua e huri ana i te miira, kotahi e tangohia, kotahi e waiho;

46. A ko taku i korero ai ki tetahi, ko taku ano tena e mea ai ki nga tangata katoa; no reira, kia mataara, e kore hoki koutou e mohio ki te haora e puta mai ai to koutou Ariki.

47. Otira, me mohio ki tenei, me i matau te tangata pai o te whare ki te wa e puta mai ai te tahae, kua mataara ia, a kua kore e tukua tona whare kia pokaia, engari, kua noho rite.

48. No reira, kia noho rite koutou, no te mea ko te haora e kore ai koutou e whakaaro, ka puta mai ai te Tama a te Tangata.

49. Ko wai koia te pononga pono, te pononga mahara, i whakaritea nei ia e te ariki hei rangatira mo tona whare, hei hoatu i nga kai i te wa e tika ai ?

50. Ka koa taua pononga e rokohanga e tona ariki, ina haere mai ia e pera ana; he pono taku e mea atu nei ki a koutou, ka meinga ia e ia hei rangatira mo ana rawa katoa.

51. Engari ki te mea taua pononga kino i roto i tona ngakau—Ka whakaroa toku ariki i tona haerenga mai,

52. A ka anga ka patu i ona hoa pononga, me te kai, me te inu tahi me te haurangi,

53. E tae mai te Ariki o taua pononga i te ra e kore ai ia e mahara, i te haora e kore ai ia e mohio,

54. A ka tapahia putia ia i waenga, a ka whakaritea he wahi mona i roto i te hunga tinihanga; ko te wahi tera o te tangihanga, me te teteatanga o nga niho.

55. A ka pera te putanga mai o te mutunga o te hunga kino, ka rite ki te poropititanga a Mohi, i mea ai: Ka tapahia atu ratou ki waho o te iwi; otira kahore ano te mutunga o te whenua, engari taihoa.