1 Sa faapea ona mae’a o le lagi ma le lalolagi, ma ’au uma o i latou.

2 Ma o le aso fitu na faagata ai e A’u, o le Atua, la’u galuega, ma mea uma na Ou faia; ma sa Ou malolo i le aso lona fitu mai la’u galuega atoa, ma o mea uma sa Ou faia ua mae’a, ma o A’u, o le Atua, sa Ou vaai atu ua lelei i latou;

3 Ma o A’u, o le Atua, sa Ou faamanuiaina le aso fitu, ma faapaiaina; aua o le aso lea na Ou malolo ai mai a’u galuega uma lea na foafoa ma faia e A’u, o le Atua.

4 Ma o lenei, faauta, Ou te fai atu ia te oe, o vaevaega ia o le lagi ma le lalolagi, ina ua foafoaina i latou, i le aso na faia ai, e A’u, o le Alii le Atua, le lagi ma le lalolagi,

5 Ma laau taitasi o le fanua ae lei i ai i le lalolagi, ma laau afu taitasi o le fanua ae lei tupu mai. Aua o A’u, o le Alii le Atua, na foafoaina faaleagaga mea uma, ia ua Ou fai atu ai, ae lei i ai faaletino i latou i luga o le fogaeleele. Aua e lei faia e A’u, o le Alii le Atua, ia timu i luga o le fogaeleele. Ma o A’u, o le Alii le Atua, na foafoaina le fanauga uma a tagata; ma sa lei i ai se tagata e galueaiina le eleele; aua sa Ou foafoaina i latou i le lagi; ma sa lei i ai se tino aano i le lalolagi, po o le vai, po o le ea;

6 Peitai o A’u, o le Alii le Atua, sa Ou fai atu, ona alu a’e ai lea se puao mai le lalolagi, ma faasūsū ai le eleele atoa.

7 Ma o A’u, o le Alii le Atua, na faia le tagata mai le efuefu o le eleele, ma mānava i ona pogaiisu le mānava o le ola; ma sa avea ai le tagata o se tagata ola, o le tino aano muamua lea i luga o le lalolagi, o le tagata muamua foi; ae ui i lea, o mea uma sa foafoaina muamua; ae sa foafoaina faaleagaga i latou ma faia e tusa ma la’u upu.

8 Ma o A’u, o le Alii le Atua, na totoina se faatoaga i sasa’e i Etena, ma o iina na Ou tuuina ai le tagata na Ou faia.

9 Ma o A’u, o le Alii le Atua, na faia ia tutupu mai, faaletino, mai le eleele, laau uma e matagofie i le vaai a le tagata; ma sa mafai ona vaai i ai le tagata. Ma sa avea foi o se tagata ola. Ona sa faaleagaga i le aso na Ou foafoaina ai; aua ua tumau i le siosiomaga na foafoa ai e A’u, o le Atua, ioe, e oo i mea uma lava na Ou saunia mo le faaaogaina e le tagata; ma sa iloa e le tagata ua lelei mo meaai. Ma o A’u, o le Alii le Atua, sa totoina foi le laau o le ola i le totonugalemu o le faatoaga, ma le laau foi e iloa ai le lelei ma le leaga.

10 Ma o A’u, o le Alii le Atua, na faia se vaitafe ia tafe atu i fafo mai Etena e faasūsū ai le faatoaga; ma sa vavaeina mai ai iina, ma avea ma ni vaitafe autu e fa.

11 Ma o A’u, o le Alii le Atua, na faaigoaina le igoa o le muamua o Pisona, ma sa tafe taamilo atu i le laueleele atoa o Havila, i lea mea, na foafoa ai e A’u, o le Alii le Atua, auro e tele;

12 Ma sa lelei le auro o lena laueleele, ma sa i ai le petala ma maa soama.

13 Ma o le igoa o le vaitafe lona lua sa ta’ua o Kaiona; o lea lava ua taamilo i le laueleele atoa o Aitiope.

14 Ma o le igoa o le vaitafe lona tolu o Hitekelu; o lena lea na alu atu agai i sasa’e o Asuria. Ma o le vaitafe lona fa o le Eufirate.

15 Ma sa ave e A’u, o le Alii le Atua, le tagata, ma tuu o ia i le Faatoaga o Etena, e galueaiina, ma ia tausia.

16 Ma o A’u, o le Alii le Atua, na poloaiina le tagata, ua fai atu: O laau uma o le faatoaga e mafai ona e ’ai saoloto ai,

17 Ae o le laau e iloa ai le lelei ma le leaga, aua e te ’ai ai; ae ui i lea, e mafai ona e filifili mo oe lava, ona ua tuuina atu ia te oe; peitai, ia manatua ua Ou faasaina, aua o le aso e te ’aia ai e te oti moni ai lava.

18 Ma o A’u, o le Alii le Atua, na faapea atu i la’u Toatasi na Fanaua, e lē lelei ona nofo toatasi o le tagata; o le mea lea, o le a Ou faia ai se fesoasoani e talafeagai mo ia.

19 Ma na faia e A’u, o le Alii le Atua, mai le eleele, manu vaefa uma o le fanua, ma manufelelei uma o le ea; ma poloaiina ia latou o mai ia Atamu, e vaai po o a igoa o le a ia faaigoa ai i latou; sa o ni mea ola foi i latou; aua sa mānava atu e A’u, o le Atua, ia te i latou le mānava o le ola, ma poloaiina o soo se mea e faaigoa ai e Atamu mea ola taitasi, o lona igoa lava lena.

20 Ma sa tuu atu e Atamu igoa i lafu manu uma, ma manufelelei o le ea, ma manu vaefa uma o le fanua; ae o Atamu, sa lei maua se fesoasoani e talafeagai mo ia.

21 Ma o A’u, o le Alii le Atua, na faia ia oo mai se moe gase i luga o Atamu; ma sa moe o ia, ma sa Ou to mai se tasi o ona ivi ’aso’aso ma faasoo le aano i lona tulaga;

22 Ma o le ivi ’aso’aso na to mai e A’u, o le Alii le Atua, mai le tane, na Ou faia ai se fafine, ma aumai o ia i le tane.

23 Ma sa fai mai Atamu: Ua ou iloa nei o le ivi lenei o o’u ivi, ma le aano o o’u aano; o le a ta’ua o ia o le Fafine, aua sa to mai fafo o ia mai le tane.

24 O lea e tu’ua ai e se tane lona tamā ma lona tinā, ma o le a pipii atu i lana ava; ma o le a avea i laua ma tino e tasi.

25 Ma sa lē lavalavā i laua uma, o le tane ma lana ava, sa lē maasiasi foi i laua.