1 Ma sa oo ina ua mavae ona tutuli ese o i laua e A’u, o le Alii le Atua, sa amata ona galueaiina e Atamu le eleele, ma pule i manu vaefa uma o le fanua, ma ’ai ana meaai ma le afu o lona muaulu, e pei ona poloaiina ai o ia e A’u o le Alii. Ma sa galue foi Eva, lana ava, faatasi ma ia.

2 Ma sa iloa e Atamu lana ava, ma sa fanau e ia ia te ia o atalii ma afafine, ma sa amata ona latou fanafanau ma uluuluola i le lalolagi.

3 Ma e mai lena taimi ma agai atu i le lumanai, sa amata ona vaevae taitoalua o atalii ma afafine o Atamu i le laueleele, ma e galueaiina le laueleele, ma tausi lafu manu, ma sa latou fananauina foi atalii ma afafine.

4 Ma o Atamu ma Eva, lana ava, sa valaau atu i le suafa o le Alii, ma sa laua faalogoina le siufofoga o le Alii mai le ala agai i le Faatoaga o Etena, ua fetalai mai ia i laua, ae sa laua lē vaai atu ia te ia; aua sa punitia i laua mai ona luma.

5 Ma sa tuu mai e ia ia i laua poloaiga, ia la tapuai atu i le Alii lo laua Atua, ma ofoina atu uluai manu o a laua lafu, mo se taulaga i le Alii. Ma sa usiusitai Atamu i poloaiga a le Alii.

6 Ma ina ua mavae aso e tele, sa oo mai se agelu a le Alii ia Atamu, ua fetalai mai: Aisea ua e osi atu ai taulaga i le Alii? Ma sa fai atu Atamu ia te ia: Ou te lē iloa, ae na poloaiina ai a’u e le Alii.

7 Ma ona fetalai mai lea o le agelu, e faapea mai: O lenei mea o se faatusa lea o le taulaga a le Toatasi na Fanaua e le Tamā, o lē ua tumu i le alofa tunoa ma le upumoni.

8 O le mea lea, ia e faia mea uma e te faia i le suafa o le Alo, ma ia e salamo ma valaau atu i le Atua i le suafa o le Alo e faavavau.

9 Ma i lena aso na afio ifo ai le Agaga Paia i luga o Atamu, o lē e molimau i le Tamā ma le Alo, ua fetalai mai: O A’u o le Toatasi na Fanaua e le Tamā mai le amataga, mai le taimi nei ma le agai i luma ma le faavavau, aua talu ai ona ua e pa’ū ia mafai ona laveaiina oe, ma tagata uma, le toatele lava e mananao i ai.

10 Ma i lena aso na viia ai e Atamu le Atua ma sa faatumuina, ma sa amata ona vavalo e uiga i aiga uma o le lalolagi, ua fai mai: Ia viia lava le suafa o le Atua, aua ona o la’u solitulafono ua pupula ai o’u mata, ma o le a ou maua i le olaga lenei le olioli, ma o le a ou toe vaai i le Atua i le tino.

11 Ma o Eva, lana ava, sa faalogo atu i nei mea uma ma sa fiafia, ua fai mai: Ana lē seanoa la ta solitulafono po ua lē maua e i taua ni fanau, ma po ua lē mafai ona ta iloa le lelei ma le leaga, ma le olioli o le togiolaina o i ta’ua, ma le ola e faavavau ua tuu mai e le Atua ia i latou uma o e e usiusitai.

12 Ma sa viia e Atamu ma Eva le suafa o le Atua, ma sa la faailoa atu mea uma i o laua atalii ma afafine.

13 Ona sau ai lea o Satani i totonu o i latou, ua fai mai: O a’u foi o se atalii o le Atua; ma sa ia faatonu mai ia te i latou, ua fai mai: Aua tou te talitonu i ia mea; ma sa latou lē talitonu i ai, ma sa sili atu lo latou alolofa ia Satani nai lo le Atua. Ma e sa amata mai i lena taimi ma agai atu i le lumanai ona faaletino, faalelagona, ma faatiapolo tagata.

14 Ma sa valaau atu le Alii le Atua i tagata uma i soo se mea e ala i le Agaga Paia ma poloaiina i latou e ao ina latou salamo;

15 Ma o le toatele sa talitonu i le Alo, ma salamo i a latou agasala, o le a faaolaina; ma o le toatele sa lē talitonu ma lē salamo, o le a tausalaina; ma sa tulei atu afioga mai le fofoga o le Atua i se poloaiga mau; o le mea lea, o le a faataunuuina lava i latou.

16 Ma o Atamu ma Eva, lana ava, sa lē tu’ua le valaau atu i le Atua. Ma sa iloa e Atamu lana ava o Eva, ma sa to o ia ma fanauina Kaino, ma sa fai mai: Ua ou maua se tama tane mai le Alii; o le mea lea o le a lē mafai ai e ia ona teena ana afioga. Ae faauta, sa lē faalogo Kaino, ua fai mai: O ai le Alii e tatau ai ona ou iloa o ia?

17 Ma sa toe to Eva ma fanauina lona uso o Apelu. Ma sa faalogo Apelu i le siufofoga o le Alii. Ma o Apelu sa leoleo mamoe, ae o Kaino sa galueaiina le fanua.

18 Ma sa sili atu le alofa o Kaino ia Satani nai lo le Atua. Ma sa faatonu o ia e Satani, ua fai atu: Fai se taulaga i le Alii.

19 Ma i le gasologa o taimi, sa oo ina aumai e Kaino mai fua o le eleele se taulaga i le Alii.

20 Ma o Apelu, sa aumai foi e ia mai ulua’i manu o lana lafu, ma le ga’o o i ai. Ma sa aloaia e le Alii Apelu, ma lana taulaga;

21 Ae o Kaino, ma lana taulaga, sa lē aloaia e le Alii. O lenei sa iloa e Satani lenei mea, ma sa fiafia i ai o ia. Ma sa ita tele Kaino, ma sa faa’ū’ū o ia.

22 Ma sa fetalai mai le Alii ia Kaino: Aisea ua e ita ai? Aisea ua e faa’ū’ū ai?

23 Afai e te faia mea lelei, e talia oe. Ma afai e te lē faia mea lelei, ua taoto mai le agasala i le faitotoa, ma ua manao Satani ia maua oe; ma vagana ua e faalogo mai i a’u poloaiga, o le a Ou tuu atu oe, ma o le a faia ia te oe e tusa ma lona manao. Ma o le a e pule ia te ia;

24 Aua e mai le taimi nei i luma o le a avea oe ma tamā o ana pepelo; o le a ta’ua oe o le Malaia; aua sa e faapea foi ae le’i i ai le lalolagi.

25 Ma o le a faapea ane i taimi e oo mai—E faapea o nei mea inosia na mai ia Kaino; ona sa teena e ia le fautuaga sili na mai le Atua; ma o se fetuu lenei o le a Ou tuu i luga o oe, vagana ai ua e salamo.

26 Ma sa ita Kaino, ma sa lē toe faalogo i le siufofoga o le Alii, po o Apelu, lona uso, o lē na savali i le paia i luma o le Alii.

27 Ma sa faanoanoa Atamu ma lana ava i luma o le Alii, ona o Kaino ma ona uso.

28 Ma sa oo ina ave e Kaino se tasi o afafine o ona uso ma ana ava, ma sa sili atu lo laua alolofa ia Satani nai lo le Atua.

29 Ma sa fai atu Satani ia Kaino: Tauto mai ia te a’u i lou fa’aī, ma afai e te ta’ua o le a e oti; ma ia faatauto ou uso i o latou ulu, ma i le Atua soifua, ia latou le ta’ua; ona afai latou te ta’ua, o le a latou feoti lava; ma o lenei ina ia lē iloa e lou tamā; ma o le aso nei o le a ou tuu atu ai lou uso o Apelu i ou lima.

30 Ma sa tauto Satani ia Kaino o le a faia e ia e tusa ma ana poloaiga. Ma o nei mea uma sa faia faalilolilo.

31 Ma sa fai mai Kaino: E moni lava o a’u o Mahana, o le pule o lenei mealilo tele, ina ia mafai ona ou fasioti ma maua mea. O le mea lea na ta’ua ai Kaino o Mahana Pule, ma sa mitamita o ia i lana amioleaga.

32 Ma sa alu atu Kaino i le fanua, ma sa talanoa Kaino ma Apelu, lona uso. Ma sa oo a’o i ai i laua i le fanua, sa tulai atu Kaino e faasaga ia Apelu, lona uso, ma fasioti ia te ia.

33 Ma sa mitamita Kaino i le mea ua ia faia, ua fai mai: Ua ou saoloto; e moni lava o lafu a lo’u uso ua i o’u lima.

34 Ma sa fetalai mai le Alii ia Kaino: O fea Apelu, lou uso? Ma sa fai atu o ia: Ou te lē iloa. O a’u ea o se leoleo o lo’u uso?

35 Ma sa fetalai mai le Alii: O le a le mea ua e faia? Ua tagi mai ia te a’u le leo o le toto o lou uso mai le eleele.

36 Ma o lenei o le a fetuuina oe mai le eleele ua faamaga mai lona gutu e tali le toto o lou uso mai lou lima.

37 A e galueaiina le eleele o le a lē tuu mai e ia ia te oe lona malosi mai le taimi nei ma le agai i luma. O le a avea oe o se tagata solasola ma maumausolo i le lalolagi.

38 Ma sa fai atu Kaino i le Alii: Sa faaosoosoina a’u e Satani ona o lafu a lo’u uso. Ma sa ou ita foi; ona sa e talia lana taulaga ae lē o la’u; ua tele atu lo’u faasalaga nai lo le mea ou te lavatia.

39 Faauta ua e tuli ese a’u i le aso nei mai luma o fofoga o le Alii, ma o le a natia a’u mai i ou fofoga; ma o le a avea a’u ma tagata solasola ma maumausolo i le lalolagi; ma o le a oo mai foi o ia o lē e mauaina a’u o le a fasioti ia te a’u, ona o a’u amioletonu, ona o ia mea ua lē natia mai le Alii.

40 Ma o A’u o le Alii na fai atu ia te ia: Ai se e faaoo le oti ia te oe, o le a faafitu ona tauimasui ia te ia. Ma o A’u o le Alii sa tuuina se faailoga i luga o Kaino, ne’i faaoo le oti ia te ia e se e maua o ia.

41 Ma sa tapunia ese Kaino mai luma o le Alii, ma sa mau faatasi ma lana ava ma le toatele o ona uso i le laueleele o Nota, i le itu i sasa’e o Etena.

42 Ma sa iloa e Kaino lana ava, ma sa to o ia ma fanauina Enoka, ma sa fanauina foi e ia atalii ma afafine e toatele. Ma sa fausia e ia se aai, ma sa ta’u e ia le igoa o le aai i le igoa o lona atalii, o Enoka.

43 Ma sa fanauina Irata ia Enoka, ma isi atalii ma afafine. Ma sa fanaua e Irata Mekuala, ma isi atalii ma afafine. Ma sa fanaua Metusaeli e Mekuala, ma isi atalii ma afafine. Ma sa fanaua e Metusaeli o Lameko.

44 Ma sa ave e Lameko ia te ia ni ava e toalua; o le igoa o le tasi o Ata, ma o le igoa o le isi, o Sela.

45 Ma sa fanaua Iapalu e Ata; o ia o le tamā o e e mau i faleie, ma sa avea i latou ma tagata tausi lafu manu; ma o le igoa o lona uso o Iupalu, o lē o le tamā o i latou uma o e ta kitara ma okeni.

46 Ma o Sela, sa fanauina foi e ia Tupalu Kaino, o se tufuga o mea uma e fai i apamemea ma le u’amea. Ma o le tuafafine o Tupalu Kaino o Naama.

47 Ma sa fai atu Lameko i ana ava, o Ata ma Sela: Faalogo mai i lo’u leo, oulua ava a Lameko, faalogo mai i la’u tautala atu; ona ua ou fasiotia se tagata i lo’u manu’a, ma o se taule’ale’a i lo’u tiga.

48 Afai e faafitu ona tauimasui o Kaino, e moni o Lameko o le a faafitugafulu ma le fitu;

49 Ona sa ulu atu Lameko i se feagaiga ma Satani, e pei ona faia e Kaino, lea na avea ai o ia ma Mahana Pule, o le pule o lena mealilo tele na tuuina mai e Satani ia Kaino; ma o Irata, le atalii o Enoka, ina ua iloa e ia la latou mealilo, sa amata ona faaali atu e ia i atalii o Atamu;

50 O le mea lea, ona o le ita, na fasioti ai e Lameko o ia, e lē pei ona faia e Kaino, i lona uso o Apelu, ina ia maua ai mea; ae sa fasiotia Irata e Lameko ona o le tautoga.

51 Ona, mai i aso o Kaino, sa i ai se pulega faalilolilo, ma o a latou galuega sa faia i le pouliuli, ma sa latou iloa tagata taitoatasi o o latou uso.

52 O le mea lea na fetuu ai Lameko e le Alii, ma lona aiga, ma i latou uma o e na osifeagaiga ma Satani; ona sa latou lē tausia poloaiga a le Atua, ma sa lē fiafia ai le Atua, ma sa lē auauna mai o ia ia te i latou, ma o a latou galuega sa o ni mea inosia ia, ma sa amata ona salalau atu i totonu o atalii uma o tagata. Ma sa i ai ia mea i totonu o atalii o tagata.

53 Ma o ia mea sa lē tautalagia i totonu o afafine o tagata, ona sa ta’u e Lameko le mealilo i ana ava, ma sa la’ua fouvale e faasaga ia te ia, ma sa ta’u atu ia mea faalauaitele, ma sa lē i ai le agaalofa;

54 O le mea lea na inosia ai Lameko, ma tuli ese i fafo, ma lē sau ai i totonu o atalii o tagata, ne’i oti o ia.

55 Ma sa faapea ona amata ona salalau galuega o le pouliuli i totonu o atalii uma o tagata.

56 Ma sa fetuu e le Atua le lalolagi i se fetuu tiga, ma sa toatama’i i e amioleaga, atoa ma atalii uma o tagata o e na faia e ia;

57 Aua sa latou lē faalogo i lona siufofoga, pe talitonu i lona Atalii Pele e Toatasi, o ia lava na ia folafola mai o le a afio mai i le vaeluaga o taimi, o lē na saunia a o le i faavaeina le lalolagi.

58 Ma sa faapea ona amata ona talai atu o le Talalelei, mai le amataga, ua folafola atu e agelu paia ua auina atu mai luma o le Atua, ma i lona lava siufofoga, ma i le meaalofa o le Agaga Paia.

59 Ma sa faapea ona faamautuina o mea uma ia Atamu, i se sauniga paia, ma talai atu ai le Talalelei, ma auina atu se poloaiga, e tatau ona i ai i le lalolagi, seia oo i lona iuga; ma sa faapea lava. Amene.