1 Ao ana bong Enoka ni kabane bon abubua ao tenibwi ririki.

2 Ao e koro bukina bwa Metutera, are natin Enoka, e aki anaaki, bwa a aonga a na berita aika tabu te Uea ni kakoroaki nanoia, are e karaoi nakon Enoka; bwa e berita raoi ma Enoka bwa Noa e riai n riki man kanoana.

3 Ao e koro bukina bwa Metutera e taetae ni burabeti bwa man kanoana a na riki ni kabane uean te aonaba (rinanon Noa), ao e kamimitongnga i bon irouna.

4 Ao e roko te rongo ae korakora nakon te aba, ao te Uea e kamaraia te aonaba ma te maraia ae rawawata, ao a mwaiti kaaina aika mate.

5 Ao e koro bukina bwa Metutera e maiu tebubua ao wanibwi ma itiua te ririki, ao e karika Rameka;

6 Ao Metutera e maiu, i mwin ae karika Rameka, itibubua ao wanibwi ma uoua te ririki, ao e karikiia natina mwaane ao aine;

7 Ao ana bong ni kabane Metutera bon ruabubua ao onobwi ma ruaiwa te ririki, ao e mate.

8 Ao Rameka e maiu tebubua ao wanibwi ma uoua te ririki, ao e karika natina te mwane,

9 Ao e aranna bwa Noa, ni kangai; Te nati te mwaane aei e na karaua nanora ni kaineti ma ara mwakuri ao mwakurin baira, ibukina bwa aontano e a tia ni kamaraia te Uea.

10 Ao Rameka e maiu, i mwin ae karika Noa, nimabubua ao ruabwi ma nimaua te ririki, ao e karikiia natina mwaane ao aine;

11 Ao ana bong ni kabane Rameka bon itibubua ao itibwi ma itiua te ririki, ao e mate.

12 Ao Noa bon abubua ao nimabwi ana ririki, ao e karika Iabeta; ao abwi ma uoua te ririki i mwina e karika Tem iroun neiere bon tinan Iabeta, ao ngke bon nimabubua ana ririki e karika Am.

13 Ao Noa ao natina mwaane a ongeaba iroun te Uea, man tabeakinna, ao aranaki bwa natin te Atua aika mwaane.

14 Ao ngke mwaane aikai a moanna ni kariki i aon te aonaba, ao natiia aine a karikaki nakoia, ao natiia aomata aika mwaane a nooriia naati aine akekei bwa a tikiraoi, ao a anaia bwa buiia, n aron are a rineia.

15 Ao te Uea e taku nakon Noa: Natiia natim mwaane aika aine a tia ni kabonakoia i bon irouia; bwa noria uniu e ura ni kaitaraia natia aomata aika mwaane, bwa a rawa n ongo ni bwanaau.

16 Ao e koro bukina bwa Noa e taetae ni burabeti, ao e anga reirei n ana bwai nako te Atua, n ai aron are n te moan tai.

17 Ao e te Uea e taku nakon Noa: Tamneiu e na aki mwamwakuri n taai nako ma te aomata, bwa e na ataia bwa ni kabane iriko a na mate; ma ana bong bon tebubua ao uabwi te ririki; ao ngkana aomata a aki raira nanoia, N na kanakoa te ieka nako aoia.

18 Ao ni boong akekei bon iai aintoa i aon te aonaba, ao a ukoukora Noa bwa a na anaa maiuna; ma te Uea bon raon Noa, ao mwaakan te Uea e mena i aona.

19 Ao te Uea e katabua Noa ni kaineti ma oin ana karinan n te nakoanibonga, ao e tuangnga bwa e riai ni waaki nako ao n tataekina ana Euangkerio nakoia natiia aomata, n aron are e anganaki Enoka.

20 Ao e koro bukina bwa Noa e weteia natiia aomata bwa a na riai n raira nanoia; ma a bon aki ongo n ana taeka;

21 Ao riki, i mwin are a bon ongo irouna, a nako matana, ni kangai: Nooria, ngaira natin te Atua; tiaki tia n anaia ibukira natiia aomata aika aine? Ao tiaki tia n amwarake ao ni moi, ao ni mare ao n anga nako n te mare? Ao kaainabara a bungiia natira, ao naakai bon mwaane aika korakora, n ai aroia mwaane ngkoa, aomata aika rangi n ataaki. Ao aki ongo n ana taeka Noa.

22 Ao te Atua e nooria bwa buakakaia aomata e rikirake ni korakora n te aonaba; ao aomata ni kabane a mwaninga nako n aia iango are a tangiria i nanoia, ake a reitinako n ti te buakaka.

23 Ao e koro bukina bwa Noa e reita nako ana kabwarabwara nakoia aomata, ni kangai: Kakauongo, ao mwannanoa raoi au taeka;

24 Kakoauaa ao raira nanomi man ami bure ao bwabetitoaki n aran Iesu Kristo, ae Natin te Atua, n aroia tamara, ao kam na karekea te Tamnei ae Raoiroi, bwa kam aonga ni karekei bwaai ni kabane ake a kaotaki; ao ngkana kam aki karaoa aei, te ieka e na roko nako aomi; e ngae n anne a aki ongo.

25 Ao e nanokaawaki Noa, ao nanona e korakai ngkai te Uea e karika te aomata i aon te aonaba, ao e karawawataki iai i nanona.

26 Ao te Uea e taku: N na kamauna te aomata are I a tia ni karikia, mai aon te aonaba, te aomata ma te man naba, ao bwaai aika kawakawa, ao mannikiba i annang; bwa e nanokaawaki Noa ngkai I tia ni karikiia, ao ngkai I a tia ni karaoi; ao e tia ni weteai; bwa a tia ni ukoukora maiuna.

27 Ao Noa e karekea te akoaki imatan te Uea; bwa Noa bon te aomata ae raoiroi, ao e kororaoi n ana roro; ao e nakonako ma te Atua, n ai aroia naba teniman natina mwaane, Teem, Am ao Iabeta.

28 Te aonaba e buakaka imatan te Atua, ao e onrake n te iowawa.

29 Ao te Atua e tara aon te aonaba, ao, nooria, e bon buakaka, bwa a bane aomata n tia ni kabuakakai kawaia i aon te aonaba.

30 Ao te Atua e taku nakon Noa: Tokin te iriko e a bon roko imatau, bwa te aonaba e a kaonaki n te iowawa, ao nooria N na kamaunai iriko ni kabaneia mai i aon te aonaba.