1 Ia na yabaki kece ni bula nei Inoki e va na drau tolusagavulu.

2 Ka sa yaco ni a sega ni kau cake ko Mecusela na luvei Inoki, me vakayacori kina na nona veiyalayalati na Turaga, ka a cakava vei Inoki; ni a veiyalayalati dina kei Inoki ni na tubu mai na vua ni tolona ko Noa.

3 Ka sa yaco ni sa parofisaitaka ko Mecusela ni ra na tubu mai na vua ni tolona (ena vukui Noa), na veimatanitu kecega e vuravura; a sa vakalagilagi koya kina vakataki koya.

4 Ka sa yaco e dua na dausiga levu ena vanua, sa cudruva na Turaga na qele ena dua na cudru mosimosi, raica era sa mate kina e vuqa na lewena.

5 Ka sa yaco ni sa bula ko Mecusela me dua na drau walusagavulu ka vitu na yabaki, sa qai sucu ko Lemeki;

6 Ia ni sa sucu ko Lemeki, sa bula tiko ko Mecusela me yabaki vitu na drau walusagavulu karua, a sa sucu eso tale na luvena tagane kei na yalewa;

7 Ia na yabaki kecega sa bula kina ko Mecusela, sa ciwa na drau onosagavulu kaciwa na yabaki, sa qai mate.

8 A sa bula ko Lemeki ka yabaki dua na drau walusagavulu karua sa qai sucu e dua na luvena tagane.

9 A sa vakayacani koya ko Noa, ni sa kaya: Na luvequ tagane oqo ena vakacegui keda mai na noda cakacaka kei na ogaoga ni ligada, me baleta na qele sa cudruva tu na Turaga.

10 Ia ni sa sucu ko Noa, sa bula tiko ko Lemeki ka lima na drau ciwasagavulu kalima na yabaki, ka sa sucu eso tale na luvena tagane kei na yalewa.

11 Ia na yabaki kecega sa bula kina ko Lemeki, e vitu na drau vitusagavulu kavitu na yabaki, sa qai mate.

12 A sa va na drau limasagavulu na yabaki i Noa, sa qai sucu ko Jefeca; a sa oti tale e vasagavulu karua na yabaki sa qai sucu ko Semi mai vei koya na tinai Jefeca, ia ni sa yabaki limanadrau sa qai sucu ko Ame.

13 Raica sa talairawarawa ko Noa kei iratou na luvena vua na Turaga; ka ra dau vakarorogo, ka ratou sa vakatokai kina me luve ni Kalou.

14 Ia ni ra sa tubu na tamata me ra lewe vuqa mai e delai vuravura, ka ra sa sucu na luvedra yalewa, a ra sa raica na luve ni tamata ni ra sa matavinaka na gone yalewa ko ya, a ra sa tauri ira me watidra, na yalewa cava ga era vinakata.

15 A sa kaya vei Noa na Turaga: Raica era sa volitaki ira ko ira na luvedra goneyalewa na luvemudou; ia raica na noqu cudru sa waqa cake tiko vei ira na luve ni tamata, ni ra sa sega ni via rogoca na domoqu.

16 Ka sa yaco ni sa parofisai ko Noa, ka vakavuvulitaka na veika ni Kalou, io me vaka ga a dau caka ena ivakatekivu.

17 A sa kaya vei Noa na Turaga: A noqu Yalo Tabu ena sega ni dau veivakauqeti tikoga vei ira na tamata, ni sa kila ni na mate na tamata kecega; ia na nona gauna ena dua tale na drau ka ruasagavulu na yabaki; ia kevaka era sa sega ni veivutuni, au na tala yani vei ira na waluvu.

18 A sa tiko e vuravura ena gauna ko ya eso na tuwawa, era sa vakasaqarai Noa me ra kauta laivi na nona bula; ia sa tiko vata kei Noa na Turaga, ka sa vakarurugi koya na nona kaukauwa.

19 A sa lesi Noa na Turaga ena nona ivakarau ni matabete, ka vakaroti koya me lako yani ka vunautaka na Kosipeli vei ira na luve ni tamata, me vaka ga a lesi kina ko Inoki.

20 A sa yaco me vunauci ira na luve ni tamata ko Noa me ra veivutuni; ia era sa sega ni muria na nona vosa;

21 A sa yaco tale ga ni ra sa rogoca oti na nona vosa, era sa lako mai vua, ka kaya: Raica, koi keimami oqo na luve ni Kalou; keimami sa sega li ni vakawatitaki ira na luve ni tamata? Ia keimami sa sega li ni kana ka gunu ka ia na vakawati kei na veimusumusuki me vakawati? Era sa vakasucuma vei keimami na wati keimami na gone, ia era sa tamata kaukauwa ko ira oqo, ka ra sa tamata rogo me vakataki ira na qase e liu. Ka ra sa sega ni muria na vosa i Noa.

22 Ka sa raica na Kalou ni sa yaco me tubu vakalevu sara na caka ca ni tamata e vuravura; ka sa laveti cake na tamata ena vakanananu ni lomana, ia sa ca kecega

23 Ka sa yaco ni sa tomana tikoga ko Noa na nona vunau vei ira na tamata, ka kaya: Dou vakatudaliga, ka rogoca na noqu vosa;

24 Dou vakabauta ka veivutunitaka na nomudou ivalavala ca ka papitaisotaki ena yacai Jisu Karisito, na Luve ni Kalou, io me vakataki ira na noda qase; ka na qai soli vei kemudou na Yalo Tabu, me vakatakilai kina vei kemudou na ka kecega; ia kevaka dou sega ni kitaka na veika oqo, ena yaco yani vei kemudou na waluvu; ia era a sega ga ni vakarorogo.

25 A sa veivutuni ko Noa, ka mosi na yalona ni sa bulia na tamata e vuravura na Turaga, io sa rarawa sara kina na lomana.

26 A sa kaya na Turaga: Au na vakarusa mai na delai vuravura na tamata ka’u sa bulia, io na tamata kei na manumanu yavaiva, kei na ka sa qasi voli, kei na manumanu vuka; ni sa veivutunitaka ko Noa na noqu a buli ira, ka vakabulai ira; ia sa masuti au kina; ni ra sa segata me ra vakamatei koya.

27 O koya oqo sa kune loloma soli wale kina ena mata ni Turaga ko Noa; ni sa tamata yalododonu ko Noa, ka sega ni cala ena nona itabatamata; a rau sa dau lako vata kei na Kalou, sa vakatale ga kina ko iratou na luvena tagane e tolu, ko Semi, ko Ame kei Jefeca.

28 A sa vakasisila ko vuravura ena mata ni Kalou, ka sa sinai ena ivalavala kaukauwa.

29 A sa raici vuravura na Kalou, ka, kunea, ni sa vakasisila, raica sa cakava na tamata kecega na nona sala e vuravura me vakasisila.

30 A sa kaya vei Noa na Kalou: Sa rairai mai vei au na nodra ivakataotioti na tamata kecega, ni sa sinai ko vuravura ena ivalavala kaukauwa, ia raica au na vakarusa na tamata kecega mai na delai vuravura.