Ang Labing Bati Nako nga Pakigbulag sa Tinud-anay Maoy Usa sa Akong Labing Dako nga mga Panalangin
Usahay makasabut kita sa mga rason alang sa mga pag-aghat ug usahay dili. Sa bisan hain niini, kinahanglang molihok kita uban sa hugot nga pagtuo.
Nakigbulag ko sa akong unang uyab sa usa ka kalma nga gabii sa ting-init.
Sayo nianang adlawa, si Carter (ang ngalan giusab) ug ako nag-away—nga dili talagsaon sa among tulo ka tuig nga nagputol-putol nga relasyon. Awayan namo ang tanan—gikan sa unsay among kaonon ngadto sa among mga plano sa umaabut. Sa sinugdanan, gibalewala nako ang among kalahian tungod sa panultihon nga “ang magkalahi magkabagay.” Apan ang among panagsa nga sungog-sungog sa katapusan nahimong makaluya nga kutay sa panaglalis.
Nianang gabhiuna sa ting-init, nagdala kami og teleskopyo ngadto sa desyerto aron manan-aw sa mga planeta. Apan among nakita ang kahayag sa bulan diha sa ngitngit nga kalangitan nga nakabalda sa among panan-aw. Nahigawad, nagsugod mi sa paglalis—pag-usab.
Isip resulta, mipalayo ko aron mapakalma ang akong kaugalingon. “Dili kini ako,” nakahunahuna ko. Nailhan ko nga maoy tigpakalma sa akong mga igsoon, ug hinay ug kalma ko nga mamulong ngadto sa uban nakong mga higala. Ngano man nga nagsinggit ko sa lalaki nga giangkon nako nga gimahal?
Mihangad ko sa ngitngit nga kalangitan ug nag-ampo aron masayud unsaon nako sa pagpalambo sa akong relasyon kang Carter. Sa kalit, ang masanapon nga kalinaw mipuli sa akong kasuko, ug gibati nako nga ang labing maayo nakong mahimo alang kanamong duha mao ang pagtapos sa among relasyon.
Ang pagpaayo nagkinahanglan og panahon. Dunay mga higayon nga natintal ko sa pagbalewala sa aghat nga bulagan si Carter tungod kay naanad na ko sa among relasyon. Usahay mobati ko og kahigawad sa Dios, nagtuo nga kalit Niyang giwagtang kini nga oportunidad nga wala pulihi og lain. Bisan pa man, misalig ko sa tambag ni Elder Jeffrey R. Holland sa Korum sa Napulog Duha ka mga Apostoles: “Sa mga higayon sa kahadlok o pagduhaduha o sa malisud nga mga panahon … panggunit og hugot sa unsay inyo nang nahibaloan ug barug nga malig-on hangtud moabut ang dugang nga kahibalo” (“Nagatuo Ako,” Liahona, Mayo 2013, 94).
Wala nako madawat kana nga “dugang nga kahibalo” sulod sa daghang mga bulan, ug misugod ko sa paghunahuna kon makadawat pa ba kaha ko. Human sa usa ka kinasingkasing nga pag-ampo mahitungod sa panagbulag, ang Espiritu mitandog kanako, misulti kanako nga ang mga aghat sa Langitnong Amahan gihatag alang sa kaayohan sa Iyang mga anak. Ang mga detalye sa Iyang rason dili sama ka importante sa akong pagtuo diha Kaniya.
Ang pagkasayud nga adunay plano ang Langitnong Amahan alang kanako mihatag nako og paglaum alang sa akong umaabut ug mitabang nako nga mosugod na usab sa pagpakig-date. Usa ka buntag, gibasa nako ang Doktrina ug mga Pakigsaad 88:40, diin nagtudlo ang Ginoo nga “ang kahayag mounong ngadto sa kahayag.” Kalit nakong naamguhan nga kini nga baruganan magamit usab sa pagpakig-date. Nasayud ko nga mas magmalipayon ko sa usa ka tawo nga susama nako og mga hiyas ug kahayag.
Sa katapusan nahimamat nako si Austin. Dali kaming nagkasabut, gikan sa among gana sa mga taco ngadto sa among tagsa-tagsa ka mga misyon sa Estados Unidos. Ang iyang malumo nga espiritu mabati nga pamilyar ug nahiangay kanako, ug sa katapusan nakigminyo ako kaniya. Ang among relasyon dili puno sa kahinam ug kamaukyabon nga maoy imong gipaabut sa usa ka sikat nga salida sa gugma. Maanindot ug makanunayon kini—usa ka butang nga gituohan nako nga molungtad sa kahangturan.
Daghan kanato ang nagtinguha og pagpasabut kon makadawat kita og lisud nga mga pag-aghat. Gikan sa akong kasinatian, akong nakat-unan nga ang hugot nga pagtuo sa Ginoo makatabang kanato nga magpabiling masulundon bisan kon wala masayud sa ngano. Samtang mosalig kita sa usa ka Dios nga nahibalo sa tanan, mobati kita og kalinaw sa atong mga desisyon sa pagsunod sa mga aghat hangtud nga atong madawat ang “dugang nga kahibalo” nga Iyang gisaad sa matinud-anon.