Ang Atong Hinungdan sa Pagsunod sa Ebanghelyo
Kanunay nga aduna gayuy “lisud nga mga sulti.” Apan anaa kanunay ang opsyon nga mopili sa pagtuo kay sa bisan unsa nga pagduhaduha o kawalay kasiguroan.
Ang dalan sa pagkadisipulo puno sa mga panalangin—kadtong “makita ug dili makita.”1 Apan adunay mga higayon diin kana nga dalan, bisan pa sa mga panalangin niini, dili sayon o hayahay. Ang pagkahimong usa ka disipulo ni Jesukristo nagkinahanglan og paningkamot ug sakripisyo, ug usahay lisud ang pagpangita og hinungdan sa pagsunod sa mga sugo ug sa paghimo niadto nga mga sakripisyo.
Isip usa ka young adult, tingali nagkapuliki ka usab sa pagdumala og bag-o nga mga responsibilidad, sa paghimo og mga desisyon nga dakog epekto sa kinabuhi, ug sa pagtino kon unsay maglangkob sa imong dalan sa pagkadisipulo sa tibuok nimong kinabuhi. Dugang pa niana, basin dunay mga butang diha sa mga polisiya o kasaysayan sa Simbahan o sa doktrina sa ebanghelyo nga wala kaayo nimo masabti ug mga tintasyon nga imong gipanglimbasugan, ingon man sa mga panalangin nga imo pang gihulat ug mga pangutana mahitungod sa plano sa Dios alang kanimo.
Ang uban kanato tingali maghunahuna usahay kon ang pagsunod sa ebanghelyo takus ba sa mga panalangin nga gisaad kanato. Tingali morason kita nga wala kita mobati nga nahilakip, nga daghan ra kaayo og buluhaton, o nga mas daghan ang mga pangutana kay sa mga tubag. Apan mag-agad gayud kini sa hinungdan. Nganong gibuhat man nimo ang unsay imong gibuhat ug nagpuyo sa paagi sa imong pagpuyo? Nganong nagpadayon ka sa pagsunod sa mga sugo, bisan kon walay tawo nga makakita sa imong gibuhat?
Bisan kinsa ka pa ug sa unsa na nga panahon sa imong kinabuhi, ang pagpili nga mangita sa imong hinungdan pinaagi sa pag-ugmad sa imong pagtuo diha sa Manluluwas ug sa Iyang ebanghelyo anaa ra kanimo.
Kang Kinsa Man Kami Moadto?
Ang pagpangita ug pagpadayon sa hinungdan sa pagsunod sa ebanghelyo dili lang talagsaon sa atong panahon. Bisan niadtong anaa pa sa yuta ang Manluluwas, ang mga tawo naglisud gihapon sa pagsabut ug sa ingon sa pagsunod sa mga baruganan nga Iyang gitudlo. Pipila sa Iyang mga disipulo naminaw samtang mipasabut Siya og konsepto nga daw nakapaluya kanila—ang Iyang tahas isip ang “tinapay nga nagahatag og kinabuhi” (tan-awa sa Juan 6:35–58). Mitubag sila nga madudahon, nag-ingon, “Lisud kining sultiha; kinsa may makapatalinghug niini?” (Juan 6:60).
Si Kristo, nakakita nga naglisud sila sa pagtuo o pagdawat niini nga doktrina, nangutana, “Nakapaluya ba kini kaninyo?” (Juan 6:61). Imbis nga mosalig sa ilang pagtuo kay sa ilang mga pagduhaduha, daghan sa Iyang mga disipulo “mitalikod, ug wala na managpanglakaw uban kaniya” (Juan 6:66).
Apan sa dihang gipangutana ni Kristo ang nahabilin sa Iyang mga disipulo kon sila ba usab “mobiya,” si Pedro mihatag sa bugtong tubag nga mao lamang ang mahatag: “Kang kinsa man kami moadto? ikaw mao ang may mga pulong mahitungod sa kinabuhing dayon” (Juan 6:67–68).
Ang Tinubdan sa Atong Hinungdan
Nasayud si Pedro sa tinubdan sa iyang hinungdan. Mag-agad kini sa nag-unang rason nganong nagbuhat kita sa unsay atong gibuhat diha sa ebanghelyo: ang atong pagpamatuod ug pagtuo diha ni Jesuskristo. “Kami nagatuo ug among nasinati,” mideklarar si Pedro, “nga ikaw mao ang [Kristo, ang Anak sa buhi nga Dios]” (Juan 6:69). Pinaagi sa pag-angkon sa samang lig-on nga kombiksyon kabahin ni Jesukristo, sa Iyang kabalaan, ug sa Iyang buhat, makakaplag usab kita sa hinungdan sa pagpadayon sa pagsunod sa ebanghelyo—bisan kon daw lisud kini, bisan kon walay tawo nga makabantay, ug bisan kon dili kita sigurado nga gusto nato.
Kanunay nga aduna gayuy “lisud nga mga sulti.” Apan anaa kanunay ang opsyon nga mopili sa pagtuo kay sa bisan unsa nga pagduhaduha o kawalay kasiguroan. Sama sa gisulti ni Elder L. Whitney Clayton sa Kapangulohan sa Seventy, “Ang desisyon nga motuo mao ang pinakaimportanting pagpili nga atong himoon.”2
Busa unsa man ang atong buhaton kon kita ang gisultihan sa usa niadto nga “lisud nga mga sulti”?
1. Sunda ang ehemplo ni Pedro ug sa ubang mga disipulo kinsa nagpabilin nga matinud-anon bisan kon sayon ra unta nga “mobiya.” Paminaw sa tambag sa mga propeta, mga apostoles, ug ubang mga lider:
“Sa mga higayon sa kahadlok o pagduhaduha o sa malisud nga mga panahon, gamita ang hugot nga pagtuo nga napalambo na ninyo. … Panggunit og hugot sa unsay inyo nang nahibaloan ug barug nga malig-on hangtud moabut ang dugang nga kahibalo.”3
“[Paghimo] og usa ka yanong lakang paingon sa hugot nga pagtuo—ug dayon lain nga lakang. … Tutok sa mga kamatuoran nga [imong] gituohan ug himoon kadtong mga kamatuoran nga motuhop sa [imong] hunahuna ug kasingkasing. …
“… Sugod sa sukaranang mga kamatuoran sa ebanghelyo.”4
2. Basaha kanunay ang mga kasulatan ug sunda ang mga pagtulun-an niini:
“Mainampoong magtuon ug mamalandong sa Basahon ni Mormon kada adlaw.”5
“Kon tuyuon ni bisan kinsa ang pagbuhat sa kabubut-on sa Dios, nan, iyang mahibaloan kon ang akong gitudlo gikan ba sa Dios, o nagsulti ba lamang ako sa kinaugalingon kong pagbulut-an” (Juan 7:17).
“Hinoon tumana ninyo ang pulong, ug dili kay magpaminaw ra kamo niini” (Santiago 1:22).
3. Padayon sa pagsunod sa mga sugo.
“Ang mga tubag sa sinsero natong mga pangutana moabut kon sa tinuoray kita maningkamot ug kon kita mosunod sa mga sugo. … Ang atong hugot nga pagtuo makatabang lapas pa sa dili nato masabtan.”6
“Samtang kamo magpadayon nga magmasulundon, … pagatagaan kamo sa kahibalo ug pagsabut nga inyong gipangita.”7
Sa katapusan, ang atong hinungdan mag-agad lamang sa unsay gisulti ni Pedro. Nagtuo ba kita nga si Jesus mao ang Kristo, nga Siya ang nangulo sa Iyang Simbahan ug aduna sa mga pulong sa kinabuhing dayon? Mas labaw ba ang atong pagtuo Kaniya kay sa “lisud nga mga sulti” nga tingali wala nato masabti niining higayuna?
Ang mga Ganti sa Pagsunod sa Ebanghelyo
Kon mohukom kita nga mohigugma ug mosunod sa Dios ug ni Jesukristo ug mosunod sa mga sugo bisan kon wala kita makasabut niini sa hingpit, ang mga ganti dili masukod. Ang kinaiyanhon nga tawo mangutana, “Unsa may naa ana para nako?” Ang mga pagtulun-an sa ebanghelyo motubag: “Kalinaw niini nga kalibutan, ug kinabuhi nga dayon diha sa kalibutan nga umaabut”; usa ka dapit alang kanimo diha sa mga mansyon sa Dios; tanan nga anaa sa Langitnong Amahan; “walay katapusan [nga] kalipay” (tan-awa sa D&P 59:23; Ether 12:34; D&P 84:38; Mosiah 2:41); ug, sama sa gipamahayag ni Elder Dieter F. Uchtdorf sa Korum sa Napulog Duha ka mga Apostoles: “Dinhi [sa Simbahan] inyong makaplagan ang usa ka butang nga bililhon. … Dinhi inyong makita ang mga pulong sa kinabuhing dayon, ang saad sa bulahang katubsanan, ug ang dalan sa kalinaw ug kalipay.”8 Sa paghingalan lang og pipila.
Kon atong ipahinungod ang atong kaugalingon sa pagsunod kang Kristo ug pagsunod sa Iyang mga sugo, gisaaran kita niining mga butanga ug sobra pa. Wala kana magpasabut nga ang dalan kanunay nga sayon o masabtan, apan ang mga panalangin nga gisaad kanato gumikan sa pagpabiling lig-on padayon nga mapadayag sa tibuok natong kinabuhi ug bisan sa sunod.
Hinoon, bisan unsa pa ka talagsaon niini nga mga panalangin, kinahanglang dili kini ang nag-una natong hinungdan sa pagsunod sa ebanghelyo. Bisan unsa pa ang imong mga pangutana, bisan unsa pa nga doktrina ang wala nimo masabti, ang imong pagtuo kang Jesukristo ug sa Iyang Pag-ula mao ang labing importante nimong hinungdan sa pagsunod sa Iyang ebanghelyo, sama nga mao kini sa kang Pedro ug sa uban.
“Ang atong mga tinguha ug mga hunahuna sa katapusan makaimpluwensya sa atong mga lihok,” miingon si Elder Uchtdorf. “Ang pagpamatuod sa katinuod sa gipahiuli nga ebanghelyo ni Jesukristo mao ang labing kusganong makapadasig nga pwersa sa atong mga kinabuhi. Si Jesus mibalik og hatag og gibug-aton sa gahum sa maayong mga hunahuna ug hustong mga tinguha: ‘Paghunahuna ngari kanako sa matag hunahuna; ayaw pagduha-duha, ayaw kahadlok’ (D&P 6:36).
“Ang pagpamatuod kang Jesukristo ug sa gipahiuli nga ebanghelyo makatabang kanato diha sa atong mga kinabuhi sa pagkat-on sa pihong plano sa Dios alang kanato ug dayon sa paglihok sa tukmang paagi. Naghatag kini kanato og kasiguroan sa katinuod, kamatuoran, ug sa kamaayo sa Dios, sa mga pagtulun-an ug Pag-ula ni Jesukristo, ug sa balaanong tawag sa mga propeta sa ulahing mga adlaw.”9
Alang kanako, magpadayon ko sa pagpaningkamot, bisan kon mabati kini nga lisud. Magpadayon ko sa akong mga pag-ampo ug sa pagtuon sa akong mga kasulatan. Maningkamot ko sa pagpalig-on sa akong pagpamatuod mahitungod sa Manluluwas matag adlaw. Ug magpadayon ko sa pagpaningkamot nga magpakabuhi sama sa gusto Niya nga ako magpakabuhi ug mosalig sa Iyang mga pulong ug sa Iyang buhi nga mga propeta ug mga apostoles sa pagtudlo kanako kon unsaon, mosalig sa hinungdan nga naggikan dili lamang sa akong pagtuo ug gugma alang Kaniya apan usab gikan sa Iyang mahangturong sakripisyo ug gugma alang kanako.