Ang Unang Lakang Padulong sa Paghinulsol
Ang tagsulat nagpuyo sa Ouest, Haiti.
Mibati ko og kangitngit nga miabut sa akong kinabuhi. Ug dayon akong naamguhan nga kinahanglan kong makigsulti sa akong bishop.
Paghulagway pinaagi ni Joshua Dennis
Nakahinumdom ko nga mitakda sa petsa sa akong bunyag uban sa mga misyonaryo. Nangutana sila nako kon andam ba ko nga mohimo niini nga pakigsaad ngadto sa atong Langitnong Amahan. Wala gani maghunahuna niini ug uban sa kasingkasing nga puno sa kalipay, miingon ko, “Oo!” Gusto nakong dawaton ang espesyal nga gasa nga gihatag kanako sa akong mahigugmaong Amahan, ug nasayud ko nga dili gayud ako ingon ka malipayon kon wala ang Manluluwas sa akong kinabuhi. Apan sa tinuod dili ko sigurado kon unsa ang akong kaugmaon.
Sa katapusan, miabut ang importanting adlaw. Dili gayud kadto makalimtan, ug malipayon kaayo ko.
Ngitngit nga mga Adlaw
Human sa akong bunyag ug kumpirmasyon, ang mga adlaw kalit lang nga daw mingitngit. Nag-atubang ko og mga problema sa pamilya, ug naglisud ko sa pagsunod sa tanang mga balaod sa Dios. Wala ko masayud unsay buhaton, ug gusto ko nga mohunong na sa pagpaningkamot. Daw walay nakasabut kanako.
Kanunay akong ganahan nga magbasa sa Basahon ni Mormon, apan nianang panahuna ako kining gipadaplin. Usa ka adlaw, samtang nag-inusara ko sa balay, gibati nako ang katam-is sa Espiritu nga nag-aghat kanako sa pagbasa sa Basahon ni Mormon. Nag-ampo usa ko, gustong makakita og tubag nga makadala og kahupayan sa akong pag-antus. Direkta ko nga mipakli ngadto sa Alma kapitulo 5. Ang bersikulo 27 mabasa nga: “Naglakaw ba kamo, nga nag-amping sa inyong mga kaugalingon nga dili mabasol sa atubangan sa Dios? Kamo makaingon ba, nga kon kamo tawgon aron mamatay niini nga takna, diha sa inyong mga kaugalingon, nga kamo dihay igo nga pagpaubos? Nga ang inyong mga saput nalimpyo ug nahimo nga puti pinaagi sa dugo ni Kristo, kinsa moanhi aron sa pagtubos sa iyang mga katawhan gikan sa ilang mga sala?”
Sa katapusan, gibati nako nga natandog niini nga mga pulong. Nasayud ko nga kinahanglan nako nga maghinulsol, mao nga nakigsabut ko nga makigkita sa akong bishop. Dili matago nga nahadlok ko, apan gipugos nako ang akong kaugalingon sa pag-adto ug pakig-istorya kaniya.
Pagsabut sa Saad sa Dios
Dihang miabut ko sa opisina sa bishop, hilabihan ang akong pagbati nga sad-an nga gusto nakong dili na lang mopadayon. Apan nag-ampo ko nga makabaton og kaisug sa pagsulti sa tanang butang nga kinahanglan nakong isulti. Gipasulod ko sa bishop sa iyang opisina, ug dayon nag-ampo siya nga makadawat sa tabang sa Dios. Nakigsulti siya kanako sama nga iya ko nga anak ug mipakita sa iyang gugma alang nako pinaagi sa iyang mga pulong. Mihatag siya kanako og tambag ug mihangyo nako sa pagbuhat og piho nga mga butang aron makadawat sa pagpasaylo sa Dios ug dayon mobalik aron sa pakig-istorya kaniya.
Malipayon kaayo ko alang niini nga oportunidad. Gisunod nako ang iyang tambag ug sa katapusan nakasabut sa saad sa Dios sa kapasayloan ngadto ni Alma: “Kon siya mokumpisal sa iyang mga sala sa atubangan kanimo ug kanako, ug maghinulsol diha sa katim-os sa iyang kasingkasing, kaniya ikaw mopasaylo, ug Ako mopasaylo usab” (Mosiah 26:29). Human sa sinsero nga paghinulsol, nasayud ko nga gipasaylo ko sa Dios. Sa katapusan nabati nako ang gugma sa Langitnong Amahan diha sa akong kasingkasing, ug ang kangitngit nawala. Malipayon kaayo ko ug mapagarbuhon sa akong kaugalingon.
Ang Bishop Anaa Aron sa Pagtabang
Ang bishop mao ang representante sa Ginoo alang sa ward. Hibaloi nga anaa siya aron sa pagtabang kanimo sa pagpangita sa tinuod nga kalipay nga giandam sa Dios alang kanimo. Salig kaniya. Kon ikaw adunay mga problema o kinahanglan nga maghinulsol, lakaw ug pangitaa siya. Motabang siya kanimo.
Nasayud ko nga dili sayon ang pakigkita kaniya usahay. Apan sama sa gipasabut ni Presidente Lorenzo Snow (1814–1901) mahitungod sa mahangturong plano sa Langitnong Amahan: “Nangahas ako sa pag-ingon nga didto sa [premortal] nga kalibutan sa mga espiritu, sa dihang kini gitanyag kanato nga … mosinati sa kasinatian nga karon atong nadawat, dili kadto tanan nindot ug makapahimuot. … Apan walay pagduhaduha nga atong nakita ug nasabtan og klaro kana didto nga, aron matuman ang atong kahimayaan ug himaya, kini usa ka kinahanglanon nga kasinatian.” Mipadayon siya sa pagsulti, “Kita andam sa pag-uyon sa kabubut-on sa Dios, ug mao nga kita ania dinhi” (Mga Pagtulun-an sa mga Presidente sa Simbahan: Lorenzo Snow [2012], 129).
Ang paghinulsol usa ka parte sa pagtuman sa kabubut-on sa Dios. Busa imbis nga mahadlok sa bishop, himoa siya nga imong higala. Gipili siya sa Dios, ug makatabang siya nimo sa paghinulsol ug pag-ayo sa imong kalag pinaagi sa pagdangup ngadto ni Jesukristo. Ang Ginoo gusto nga motabang kanato, apan kinahanglan kitang mohimo nianang unang lakang padulong sa paghinulsol. Nianang paagiha atong makita nga ang saad diha sa Isaias 1:18 matuman: “Bisan pa ang inyong mga sala mapula, sila pagapution ingon sa nieve.” Ug alang niana, ang bishop anaa aron sa pagtabang.
Mopamatuod ko nga buhi ang Dios ug nga si Jesukristo mao ang atong Manluluwas. Pareho Sila nga nahigugma kanato pag-ayo!