4 ka Leksyon gikan sa Pagpatungha ni Joseph Smith sa Basahon ni Mormon

Ni Mckenna Clarke

Mga Magasin sa Simbahan

Sa 24 anyos pa lamang, misagubang si Joseph Smith og mga hagit samtang naningkamot siya sa pagtuman sa mga sugo sa Dios. Apan nabuntog niya uban sa tabang sa Dios, ug makahimo usab kita.

Isip mga young adult, tingali hangyoon kita sa pagbuhat og mga butang nga daw imposible kon wala ang tabang sa Dios. Sa samang paagi, si Joseph Smith, sa 24 anyos pa lamang, nag-atubang og mga hagit ug mibati nga dili sarang samtang naningkamot siya sa pagtuman og importante nga sugo—pagmantala sa hubad sa Basahon ni Mormon. Apan uban sa tabang sa Dios, iyang natuman ang tanan nga gipabuhat kaniya, ug ang iyang ehemplo nagpakita og daghang mga paagi nga mahimo natong posible ang imposible kon ang Dios anaa sa atong habig.

1. Dili kinahanglang maayo kaayo kita aron ang Dios mohimo og mga milagro pinaagi kanato. Sa dihang nangandam si Joseph sa pagmantala sa Basahon ni Mormon, usa siya ka young adult nga walay daghang kwarta o pormal nga edukasyon—ug ilabi nang walay kahibalo kon unsaon sa paghubad ug pagmantala sa ingon ka importante nga rekord. Bisan pa, mipadayon siya uban sa hugot nga pagtuo ug sa gasa ug gahum sa Dios aron makompleto ang trabaho nga gipabuhat kaniya. Kon mosalig kita sa Langitnong Amahan, tabangan kita Niya sa paghimo sa Iyang buluhaton.

2. Kon ang Dios mohatag kanato og usa ka buluhaton, moandam Siya og paagi aron kita magmalampuson. Alang kang Joseph Smith, ang pag-imprinta og 5,000 ka kopya sa 590 ka pahina nga basahon morag imposible gayud kaayo. Apan, sa dihang panahon na sa pagmantala sa manuskrito, ang Ginoo midasig ni Martin Harris sa pagprenda sa iyang malampusong umahan, nga mihatag og $3,000 (ang katugbang sa mga $76,000 karon) aron sa pagtabang ni Joseph nga matuman ang iyang misyon. Sama sa gitudlo ni Nephi, “[ang Ginoo] moandam og paagi alang kanila nga sila unta makatuman sa butang diin siya misugo kanila” (1 Nephi 3:7). Gihimo sa Langitnong Amahan nga daling makuha ni Joseph ang gikinahanglan nga mga kapanguhaan aron mahuman ang proyekto. Ug buhaton usab Niya kini kanato.

3. Ang Dios mohatag og ikaduha nga mga higayon. Si Joseph Smith nakahimo og mga sayop nga miresulta sa pagkawala sa 116 ka mga pahina sa manuskrito sa Basahon ni Mormon. Tungod sa pagkawala sa 116 ka mga pahina, nawad-an usab si Joseph sa abilidad sa paghubad sulod sa usa ka panahon. Apan tungod kay mipili siya sa paghinulsol, gipasaylo siya sa kadugayan og gihatagan og ikaduhang higayon sa pagtuman sa iyang misyon. Miingon ang Ginoo, “Apan hinumdumi, ang Dios maloloy-on; busa, paghinulsol niana nga imong nabuhat nga supak ngadto sa sugo diin Ako mihatag kanimo, ug ikaw sa gihapon pinili, ug ikaw gitawag pag-usab ngadto sa buhat” (D&P 3:10). Ang atong mga kinabuhi mahimong puno sa mga sayop niining kinabuhia, apan kon maghinulsol kita ug magbaton og matarung nga mga tinguha, ang Ginoo kanunayng mohatag kanato og laing higayon.

4. Ang paghunahuna sa gisaad nga kalipay makatabang kanato sa paglahutay sa mga hagit. Bisan pa sa tanang mga hagit nga giatubang ni Joseph, nakadawat siya og daghang panalangin ug nakasinati og tinuod nga kalipay sa tibuok niyang paningkamot sa pagpatungha sa Basahon ni Mormon. Human namantala ang Basahon ni Mormon, ang Simbahan giorganisar ug ang mga ginikanan ni Joseph gibunyagan. Nianang adlawa, miadto sa kakahoyan si Joseph nga nag-inusara ug misugod sa paghilak tungod sa kalipay. Kon mopadayon kita tadlas sa atong mga pagsulay nga mapagarbuhon, hingpit nga mosalig sa Dios, makakaplag usab kita og kalipay ug kalinaw.

Pagdiskubre pa og Dugang

Aron makat-on pa og dugang mahitungod sa pag-imprinta sa Basahon ni Mormon ug sa pag-organisar sa Simbahan, basaha ang “Ang Pagsugod sa Simbahan ni Kristo” diha sa Oktubre 2018 nga Liahona.

Pagdiskubre pa og dugang mahitungod niini nga panahon sa kasaysayan sa Simbahan diha sa “Pagtukod sa mga Katukuran sa Simbahan” sa Ang Atong Panulundon: Usa ka Mubong Kasaysayan sa Ang Simbahan ni Jesukristo sa mga Santos sa Ulahing mga Adlaw.