របៀបប្រាំពីរ យ៉ាងដើម្បីទទួលអារម្មណ៍នៃវិញ្ញាណ បុណ្យគ្រីស្ទម៉ាស់
ការរីកចម្រើន និងកម្មវិធីបុណ្យទានគឺមានភាពរីករាយ ប៉ុន្តែការផ្តល់ការងារបម្រើដោយរីករាយគឺជាគន្លឹះ ដើម្បីមានវិញ្ញាណនៃបុណ្យគ្រីស្ទម៉ាស់ ។
រចនារូបភាពដោយ ម៉ៃឃល មូឡាន
« វាហាក់ដូចជាពុំមែនជាបុណ្យគ្រីស្ទម៉ាស់ទេ » ។
តើអ្នកធ្លាប់គិតដូច្នេះដែរឬទេ ? ប្រហែលអ្នកមានអារម្មណ៍ដូច្នេះក្នុងពេលនេះ ៖ ទោះបីអ្នកចាក់បទចម្រៀងបុណ្យគ្រីស្ទម៉ាស់លាន់រំពងប៉ុណ្ណា ឬអ្នកបរិភោគនំបុណ្យគ្រីស្ទម៉ាស់ច្រើនប៉ុណ្ណានោះទេ អ្នកពុំទទួលអារម្មណ៍នៃវិញ្ញាណបុណ្យគ្រីស្ទម៉ាស់ឡើយ ។
ប្រសិនបើអ្នកមានអារម្មណ៍បែបនេះ ឬប្រសិនបើអ្នកគ្រាន់តែស្វែងរកថាអារម្មណ៍នៃបុណ្យគ្រីស្ទម៉ាស់នឹងមានច្រើនបន្តិចនាឆ្នាំនេះ សូមបន្តអានទៅមុខទៀត !
ប្រធាន ដាវីឌ អូ ម៉ាកខេ ( ១៨៧៣–១៩៧០ ) បានថ្លែងយ៉ាងសាមញ្ញថា ៖ « វិញ្ញាណនៃបុណ្យគ្រីស្ទម៉ាស់ជាវិញ្ញាណនៃព្រះគ្រីស្ទ ដែលធ្វើឲ្យចិត្តយើងរីករាយក្នុងក្ដីស្រឡាញ់និងមិត្តភាពជាបងប្អូន ហើយវាបំផុសយើងឲ្យធ្វើការបម្រើដោយសប្បុរស » ។១ បូនី អិល. អូស្ការសុន អតីតប្រធានយុវនារីទូទៅថ្លែងថា ៖ « របៀបដើម្បីពង្រឹងស្មារតីនៃបុណ្យគ្រីស្ទម៉ាស់ គឺត្រូវជួយដល់អ្នកជុំវិញខ្លួនយើងដោយចិត្តសប្បុរស ហើយលះបង់ខ្លួន » ។២
ការតុបតែងដើមគ្រីស្ទម៉ាស់ និងការផ្តល់អំណោយគឺជារបៀបដើម្បីសាទរបុណ្យគ្រីស្ទម៉ាស់ ប៉ុន្តែគន្លឹះដើម្បីទទួលអារម្មណ៍នៃវិញ្ញាណបុណ្យគ្រីស្ទម៉ាស់គឺផ្តល់ការងារបម្រើដល់អ្នកដទៃ ។ ( សូមមើលអត្ថបទមុនដែលមានចំណងជើងថា « ការផ្តល់ការងារបម្រើដូចព្រះអង្គសង្គ្រោះបានធ្វើ » ដើម្បីរៀនបន្ថែមទៀតអំពីការផ្តល់ការងារបម្រើ ) ។
ហើយនេះជាព័ត៌មានល្អ ! មានមធ្យោបាយអស្ចារ្យជាច្រើនដើម្បីផ្តល់ការងារបម្រើដល់អ្នកដទៃនៅរដូវកាលបុណ្យគ្រីស្ទម៉ាស់ ។ សូមសាកល្បងមធ្យោបាយមួយចំនួននេះ ហើយមិនយូរឡើយអ្នកនឹងទទួលអារម្មណ៍កក់ក្តៅពីព្រះវិញ្ញាណ ហើយទទួលអារម្មណ៍កាន់តែស្និទស្នាលជាមួយព្រះអង្គសង្គ្រោះ—វិញ្ញាណពិតប្រាកដនៃបុណ្យគ្រីស្ទម៉ាស់ !
១. សួរសុខទុក្ខអ្នកឯកោ
សូមគិតពីបុគ្គលដែលអ្នកស្គាល់ ដែលពុំមានគ្រួសារ និងមិត្តភក្តិចំណាយពេលជាមួយពួកគេក្នុងរដូវបុណ្យនេះ ។ សូមគិតពីការទៅសួរសុខទុក្ខនរណាម្នាក់ដែលចាស់ជរា ឬនរណាម្នាក់ដែលប្តូរទៅរស់នៅក្បែរអ្នក ។ ការឈោងទៅជួយបុគ្គលម្នាក់ដែលឯកោអាចជារឿងមួយដ៏មានឥទ្ធិពល ។ អែលឌើរ ដេវីឌ អេ បែដណា ក្នុងកូរ៉ុមនៃពួកសាវកដប់ពីរនាក់បានចង្អុលបង្ហាញថា ព្រះគ្រីស្ទ « បានផ្តល់ការងារបម្រើដល់ ‹ បុគ្គលម្នាក់ៗ › » តាមរយៈការជួយមនុស្សម្តងម្នាក់ៗ ។៣ យើងអាចធ្វើដូច្នោះបានផងដែរ ។
២. ទៅច្រៀងចម្រៀងបុណ្យគ្រីស្ទម៉ាស់ ។
តើអ្នកដឹងទេថា ព្យាការីរបស់យើងចូលចិត្តចម្រៀងបុណ្យគ្រីស្ទម៉ាស់ ? ទោះបីការច្រៀង« ឃ្លាឃ្លោងខ្លីប្លែកៗអំពីតាណូអែល » ឬច្រៀងដោយគារវភាពនូវទំនុកតម្កើងដែលអ្នកចូលចិត្តអំពីព្រះអង្គសង្គ្រោះក្តី ប្រធាន រ័សុល អិម ណិលសុន ជឿថា ការចែកចាយតន្ត្រីជាមួយអ្នកដទៃគឺជារបៀបដ៏អស្ចារ្យមួយដើម្បី « ទទួលអារម្មណ៍ពិតនៃវិញ្ញាណដ៏ពិតប្រាកដនៃបុណ្យគ្រីស្ទម៉ាស់ » ។៤
៣. សូមក្រឡេកមើលជុំវិញអ្នក ពីមុនអ្នកមើលទូរសព្ទរបស់អ្នក ។
អ្នកពុំចាំបាច់ដាក់ទូរសព្ទអ្នកនៅក្នុងហោប៉ៅរបស់អ្នកពេញមួយថ្ងៃឡើយ ប៉ុន្តែការមានវត្តមាន និងផ្តោតចិត្តលើមនុស្សដែលនៅជុំវិញយើង គឺជាមធ្យោបាយមួយដ៏អស្ចារ្យដើម្បីទទួលអារម្មណ៍ម្តងទៀតនៃវិញ្ញាណបុណ្យគ្រីស្ទម៉ាស់ ។
ស៊ីស្ទើរអូស្ការសុនបានថ្លែងថា « ជំនួសឲ្យការលើកទូរសព្ទអ្នកមកមើលថា តើមិត្តភក្ដិអ្នកកំពុងធ្វើអ្វី ចូរឈប់ ហើយមើលជុំវិញខ្លួនអ្នក រួចសួរខ្លួនឯងថា ‹ តើនរណាត្រូវការខ្ញុំនៅថ្ងៃនេះ ? › អ្នកអាចជាមនុស្សសំខាន់ដើម្បីឈោងទៅជួយ ហើយមានឥទ្ធិពលលើជីវិតរបស់មិត្តម្នាក់ ឬផ្ដល់ការលើកទឹកចិត្តដល់មិត្តម្នាក់ដែលកំពុងមានបញ្ហាស្ងាត់ៗនោះ » ។៥
៤. ធ្វើកិច្ចការមួយចំនួនថែមទៀត ។
តើការសម្អាតផ្ទះ ការអង្គុយមើលក្មេងៗ ឬធ្វើការងារផ្ទះបន្ថែមផ្សេងទៀតពិតជាអាចជួយអ្នកឲ្យទទួលវិញ្ញាណបុណ្យគ្រីស្ទម៉ាស់មែនឬ ? ប្រសិនបើអ្នកធ្វើវាដោយឥរិយាបថត្រឹមត្រូវ នោះអ្នកនឹងទទួលអារម្មណ៍នោះពិតប្រាកដ ! នៅពេលអ្នកសម្អាត ឬរៀបចំឲ្យមានសណ្តាប់ធ្នាប់ សូមគិតអំពីបុគ្គលដែលអ្នកកំពុងបម្រើ ។ សូមគិតថា តើគ្រួសារ ឬមិត្តរបស់អ្នកនឹងចូលចិត្តអំណាយនៃការខិតខំធ្វើការរបស់អ្នកខ្លាំងប៉ុណ្ណា !
៥. ចែកនំបុណ្យគ្រីស្ទម៉ាស់មួយចំនួន !
និយាយអំពីនំបុណ្យគ្រីស្ទម៉ាស់ទាំងនោះដែលអ្នកបានបរិភោគកាលពីដំបូង ហេតុអ្វីអ្នកមិនធ្វើនំបុណ្យគ្រីស្ទម៉ាស់ដែលអ្នកចូលចិត្តមួយចំនួន ? អ្នកគួរតែភ្លក់វាពីរបី ( ឬច្រើន ) ប៉ុន្តែគន្លឹះដើម្បីទទួលអារម្មណ៍នៃវិញ្ញាណបុណ្យគ្រីស្ទម៉ាស់នៅត្រង់នេះ គឺត្រូវចែកវាឲ្យអ្នកដទៃ ។
៦. ចែកចាយវីដេអូបុណ្យគ្រីស្ទម៉ាស់ ។
សូមចែកចាយសារលិខិតបុណ្យគ្រីស្ទម៉ាស់នៅលើប្រព័ន្ធផ្សព្វផ្សាយសង្គម ។ សូមមើលសារលិខិតពួកមរមនស្តីពីបុណ្យគ្រីស្ទម៉ាស់សម្រាប់យោបល់មួយចំនួន ។ អ្នកអាចធ្វើឲ្យអ្នកដទៃទៀតរីករាយ តាមរយៈការចែកចាយវីដេអូបុណ្យគ្រីស្ទម៉ាស់របស់សាសនាចក្រនៅលើគេហទំព័រ Mormon.org ។ អ្នកអាចផ្ញើវាទៅមិត្តភក្តិ ឬចែកចាយវានៅលើទំព័ររបស់អ្នកផ្ទាល់ ។
៧. ចូរមានការច្នៃប្រឌិតអំពីវា ។
តើមានការបម្រើសម្ងាត់អ្វីខ្លះដែលអ្នកអាចធ្វើ ដែលមនុស្សដទៃពុំដឹងនោះ ? អ្នកអាចទុកគ្រឿងទេស ឬអំណោយនៅទ្វារមុខផ្ទះរបស់នរណាម្នាក់ ដាក់ការសរសេរដ៏ផ្អែមល្ហែមមួយនៅក្នុងហៅប៉ៅអាវ ចូកព្រិល ឬបោសសម្អាតស្លឹកឈើដែលជ្រុះ—ប៉ុន្តែសូមប្រាកដថា គ្មាននរណាម្នាក់ដឹងថា អ្នកធ្វើកិច្ចការនោះឡើយ ! សូមចាំថា ៖ ចូរឲ្យអំពើទានរបស់អ្នកបានស្ងាត់កំបាំង ( សូមមើល ម៉ាថាយ ៦:៤ ) ។
ការផ្តល់ការងារបម្រើនៅបុណ្យគ្រីស្ទម៉ាស់
ពន្លឺភ្លើងនៃបុណ្យគ្រីស្ទម៉ាស់ និងការតាំងបង្ហាញជាសាធារណៈយ៉ាងអឹកធឹកអាចនាំមកនូវភាពអស្ចារ្យ និងរីករាយដល់ថ្ងៃបុណ្យរបស់អ្នក ប៉ុន្តែដើម្បីទទួលអារម្មណ៍ពិតប្រាកដនៃវិញ្ញាណបុណ្យគ្រីស្ទម៉ាស់ នោះការផ្តល់ការងារបម្រើដោយរីករាយគឺជាគន្លឹះ ។
អែលឌើរ ឌៀថើរ អេហ្វ អុជដូហ្វ ក្នុងកូរ៉ុមនៃពួកសាវកដប់ពីរនាក់បានមានប្រសាសន៍ថា « ដើម្បីផ្ដល់កិត្តិយសពិតចំពោះការយាងមកក្នុងពិភពលោកនេះ [ របស់ព្រះអម្ចាស់ ] យើងត្រូវធ្វើដូចជាទ្រង់បានធ្វើ ហើយឈោងទៅជួយដោយសេចក្ដីមេត្តាករុណាដល់បងប្អូនយើង ។ ការណ៍នេះយើងអាចធ្វើរាល់ថ្ងៃ ដោយពាក្យសម្ដី និងទង្វើ ។ ចូរឲ្យកិច្ចការនេះក្លាយជាទំនៀមទម្លាប់បុណ្យគ្រីស្ទម៉ាស់របស់យើង មិនថាយើងនៅទីណាទេ—ចូរយើងមានចិត្តល្អថែមបន្តិចទៀត អភ័យទោសឲ្យបានច្រើនជាងមុន កុំសូវកាត់សេចក្ដីគេ មានអំណរគុណច្រើនជាងមុន និងមានសេចក្ដីសប្បុរសកាន់តែច្រើនក្នុងការចែកចាយភាពសម្បូរណ៌របស់យើងជាមួយនឹងជនខ្វះខាត » ។៦