Usa ka Personal nga Relasyon uban sa Atong Langitnong Amahan pinaagi sa Pag-ampo
Gikan sa usa ka pakigpulong sa Brigham Young University–Idaho nga debosyonal, “Usa ka Personal nga Relasyon uban sa Atong Langitnong Amahan sumala sa Gitudlo ni Ginoong Jesukristo,” nga gihatag niadtong Nobyembre 28, 2017.
Kanus-a man ang katapusang higayon nga aduna kay gibati samtang nag-ampo ka?
Background gikan sa Getty Images
Kon mogamit ko og mobile phone aron tawgan ang akong mama ug papa sa New Jersey, USA, klaro nakong madungog ang ilang mga tingog. Wala ko masayud kon sa unsang paagi nga posible kini, nga walay bisan unsang kable o makita nga mga koneksyon, nga makahimo ko sa pakigsulti kanila nga layo kaayo. Apan nasayud ko nga mahimo kini!
Karon, palihug ayaw ko og pangutan-a kon sa unsang paagi nga ang minilyon ka mga tawo makahimo sa pag-ampo sa samang higayon, ug sa managlahing pinulongan, ug ang atong Amahan sa Langit andam nga maminaw ug motubag sa samang higayon. Dili ko makasabot kon sa unsang paagi kana nahitabo. Apan nasayud ko nga mahimo kini!
Sama sa mobile phone, mosalir ang pag-ampo, bisan tuod wala kita tukma nga nakasabut kon sa unsang paagi. Apan adunay pipila ka butang mahitungod sa pag-ampo nga atong nasabtan.
Pag-ampo nga Kinasingkasing
Atong mabasa sa mga kasulatan, “Ug sa nabautismohan na ang tanang tawo, ug sa diha nga si Jesus usab nabautismohan na ug nag-ampo, ang langit nabukas” (Lucas 3:21). Si Jesus nagtudlo kanato nga ang usa ka pag-ampo nga kinasingkasing makaabli sa langit. Miingon Siya, “Pangayo, ug kamo pagahatagan; pangita, ug kamo makakaplag; pagtuktok, ug kamo pagaablihan” (Mateo 7:7).
Karon, kasagaran natong gamiton ang pulong nga pangayo sa paghangyo og usa ka butang. Apan sa orihinal nga Gresyanhon, ang pulong mao ang aiteo, nga nagpasabut dili lamang sa pagpangayo apan usab sa pagpakilooy, pangamuyo, o pangaliyupo. Ang kalangitan dili maabli kon mosulti lamang kita og mga pag-ampo. Maabli kini kon kita magpakilooy, kon kita mangamuyo, kon kita mangaliyupo, kon kita mag-ampo gikan sa kasingkasing.
Kon mag-ampo ka, gibati ba nimo nga daw abli ang kalangitan? Kanus-a man ang katapusang higayon, samtang nag-ampo ka, nga ikaw adunay gibati?
Pangandam sa Pag-ampo
Aron makalikay sa pag-ampo nga walay paghunahuna gamit ang pabalik-balik nga mga pulong nga walay kapuslanan (tan-awa sa Mateo 6:7; 3 Nephi 13:7), kinahanglang mangandam kita sa atong kaugalingon sa pag-ampo. Mosugyot ko nga mobasa og kasulatan o mamalandong kadiyot sa atong mga panalangin. Ang matag usa kanato makakaplag og mga paagi aron mangandam alang sa personal nga pag-ampo.
Pag-ampo Bisan Kon Kini Lisud
Matag karon ug unya, magdali-dali kita sa pag-ampo o mag-ampo tungod kay naandan na kining buhaton. Usahay dili kita mag-ampo uban sa hugot nga pagtuo diha ni Jesukristo, ug usahay dili na lang gayud kita mag-ampo. Apan niadto nga mga higayuna nga kulang ang atong pagtuo o dili ganahang mag-ampo nga kita mas angay nga mag-ampo.
Si Presidente Brigham Young (1801–77) miingon: “Atol sa labing lisud nga mga higayon, sa dihang walay bisan gamay nga pagbati sa akong kasingkasing aron mag-ampo, moingon ba ko, dili ko mag-ampo? Dili, apan [ako moingon] … mga tuhod, iluhod ang inyong kaugalingon diha sa salog, ug ba-ba, bukas; dila, pamulong; ug atong makita kon unsa ang moabut, ug isimba ninyo ang Ginoong Dios sa Israel, bisan kon dili kamo makasulti og usa ka pulong pabor Kaniya. Kana ang kadaugan nga kinahanglan natong maangkon. … Anaa kana tali sa espiritu ug lawas; dili gayud sila magkabulag” (sa Journal of Discourses, 3:207).
Si Satanas dili gusto nga mag-ampo ka tungod kay siya nasayud nga sa higayon nga magsugod ka sa pag-ampo gikan sa kasingkasing, makaangkon ka og espirituhanong gahum ug mawad-an siya og impluwensya diha kanimo. Ang usa ka mainiton nga pag-ampo makahimo kanimo sa pag-atubang sa mga hagit sama sa mga kabalaka, depresyon, ug mga pagduha-duha mahitungod sa imong kaugalingong pagtuo.
Kon dili ka makahinumdom sa katapusang higayon nga ikaw dunay gibati samtang nag-ampo ka, nan lihoka kana. Pinaagi sa pag-ampo, makaestablisar ka ug makamentinar og personal nga relasyon ngadto sa imong Amahan sa Langit.
Paggahin og Tipik sa Panahon diha sa Langit
Kon nanginahanglan ka pag-ayo og tabang gikan sa langit, ang pag-ampo makahatag kanimo og gahum sa paghimo sa husto nga mga desisyon. Ang usa ka pag-ampo nga kinasingkasing usa gayud ka tipik sa panahon diha sa langit, ug bisan og ang mga tubag dili kanunay nga moabut dayon, ang usa ka tipik sa panahon diha sa langit makatabang nimo aron maplano ang imong dalan sa mortal nga kinabuhi.
Sa kalibutan diin ang katawhan “nagangalan sa dautan nga maayo, ug sa maayo nga dautan; nga nagabutang sa kangitngit nga ilis sa kahayag, ug sa kahayag nga ilis sa kangitngit; nga nagabutang sa mapait nga ilis sa matam-is, ug sa matam-is nga ilis sa mapait” (Isaiah 5:20), kinahanglan nimong masayran nga ang kalangitan bukas alang kanimo.
Ang mga pag-ampo nga gihalad gikan sa kasingkasing, mainiton nga mga pag-ampo, makahatag kanimo og espirituhanong gahum sa pag-atubang sa ingon nga mga butang. Kon ang kalangitan bukas, mahimo kitang mobati og kalinaw, kahupayan, kalipay, ug gugma, bisan tuod dili dayon kita makaangkon og hingpit nga pagsabut.
Sunda ang Ehemplo sa Manluluwas
Daghan kita og makat-unan pinaagi sa pagtuon kon sa unsang paagi nag-ampo ang Manluluwas.
“Ug unya sayo sa kaadlawon, sa dugay pa ang kabuntagon, siya mibangon ug miadto sa usa ka dapit nga awaaw, ug didto nag-ampo siya” (Marcos 1:35).
Ang unang buhaton ni Jesus sa buntag mao ang pag-ampo ug mangita og mingaw nga dapit aron mag-ampo. Mag-ampo ka ba dayon sa pagmata nimo sa buntag? Likayan ba nimo ang mga makabalda? Wagtangon ba nimo ang kalibutanon nga mga hunahuna ug maningkamot sa pag-establisar og koneksyon sa kalangitan?
Si Lucas mirekord usab nga si Jesus “mipahilit ngadto sa mga awaaw ug nag-ampo” (Lucas 5:16). Aduna ka bay usa ka dapit sa pag-ampo diin moadto ka kon gusto nimong mangamuyo sa imong Amahan sa Langit?
Pagpabilin nga Mapainubsanon
Misulti si Mateo kanato nga ang Manunubos, samtang nag-ampo Siya, mipakita og kamapainubsanon. “Ug sa nakalakaw siya sa unahan og diyutay, siya mihapa ug nag-ampo nga nag-ingon, Amahan ko, kon mahimo man, isaylo lang kanako kining kopa; gani, dili sumala sa akong pagbuot kon dili sa imo” (Mateo 26:39).
Unsay buot ipasabut sa “mihapa”? Ang pulong nga “mihapa” sa orihinal nga Gresyanhon mao ang pipto, usa ka berbo nga nagpasabut nga “mous-us gikan sa nagbarug ngadto sa naghigda nga posisyon.” Kon moabut ang panahon alang sa personal nga pag-ampo, hinumdumi nga mamulong ka ngadto sa labing intelehente ug gamhanan nga nilalang sa tibuok kalibutan, “ang Amahan sa mga kalooy, ug Dios sa tanang kalipay” (2 Mga Taga-Corinto 1:3). Sa atubangan sa ingon nga nilalang, dili mahimong magpasayon ko. Mibati ko nga kinahanglang moluhod.
Si Jesukristo mipakita usab og ehemplo sa dihang Siya miingon ngadto sa Iyang Amahan: “Dili sumala sa akong pagbuot kon dili sa imo.” Kon moingon ka nga, “Dili sumala sa akong pagbuot kon dili sa imo,” mao ba gayud kana ang imong gipasabut? Unsa nga mga kausaban ang kinahanglan nimong buhaton sa imong hunahuna, kasingkasing, ug mga lihok aron tinud-anay nga mahimong sinsero?
Pagtinguha nga Matinud-anon
Samtang maningkamot ka nga mahimong mapainubsanon, matinuoron, ug sinsero sa imong mga pag-ampo, imong makita nga mas sayon ang pagdawat sa kabubut-on sa Langitnong Amahan, bisan kon wala kini motakdo sa unsay anaa sa imong hunahuna. Usab, modangup kita sa ehemplo ni Jesukristo: “Ug sa nag-antus siya sa hilabihan nga kasakit, siya nag-ampo sa labi pa ka mainiton gayud” (Lucas 22:44).
Kon mag-atubang og kalisdanan, mogahin ka ba og panahon sa pagpangutana sa imong kaugalingon, “Nganong ako man?”? O mag-ampo ka ba sa labi pa ka mainiton? Ang ekspresyon nga “labi pa ka mainiton” nagagikan sa Gresyanhon nga mga pulong nga nagpasabut og “walay paghunong, matinguhaon.” Busa si Jesus nagtudlo kanato nga sa mga panahon sa pagsulay, kinahanglan kitang mag-ampo nga matinguhaon, sa walay paghunong. Dapiton nako kadtong nagsagubang og mga panahon sa kalisud sa pagdangup ngadto sa buhi nga Dios.
Ang mga panahon sa kalisud makahatag og dakong oportunidad nga matudloan kita sa atong Langitnong Amahan. Mahumok ang atong mga kasingkasing ug ang atong mga hunahuna magtinguha og mga tubag. Kon magtinguha kita Kaniya, anaa Siya.
Tuohi Nga Maminaw Siya
Ang Manluluwas misulti ngadto sa punoan sa sinagoga, “Ayaw kahadlok, sumalig ka lamang” (Marcos 5:36). Tuohi nga ang Dios nga Amahan maminaw kanimo. Tuohi nga Siya “mosulti kanimo diha sa imong hunahuna ug sa imong kasingkasing, pinaagi sa Espiritu Santo, nga moabut diha kanimo ug nga mopuyo diha sa imong kasingkasing” (Doktrina ug mga Pakigsaad 8:2). Tuohi nga ikaw—oo, ikaw—mahimong mobati og kalinaw ug kahupayan. Tuohi nga makadawat ka og espirituhanong gahum sa pagbuntog.
Ang mainiton nga mga pag-ampo moabut gayud sa kalangitan. Sa basahon sa Mga Salmo, si Haring David miingon, “Kahapunon, ug kabuntagon, ug sa kaudtohon, ako magamahay ug magaagulo; ug mabati niya ang akong tingog” (Salmo 55:17). Usa sa mga kahulugan sa pulong nga mag-ampo diha sa Hebreohanon mao ang “pagsulti.” Ug mao kana ang atong ginabuhat kon mag-ampo kita sa atong Langitnong Amahan: makigsulti kita Kaniya.
Kon kita mohalad og mainiton nga pag-ampo, maangkon nato ang atensyon sa labing gamhanan, maloloy-on, ug mahigugmaong nilalang sa uniberso. Mogahin kita og tipik sa panahon diha sa kalangitan. Ug kitang tanan nagkinahanglan og tipik sa panahon diha sa kalangitan, ilabi na kon nagsinati kita og lisud nga mga panahon.
Nasayud ako sa walay pagduha-duha nga adunay Dios sa langit. Siya imong Amahan ug akong Amahan. Siya buhi. Ang Iyang ngalan mao ang Gugma. Ang Iyang ngalan mao ang Kalooy. Bisan og baliwala ako ikumpara Kaniya, mahimo akong moluhod atubangan sa akong Magbubuhat, ug mahimo akong makigsulti Kaniya. Ug Siya, sa Iyang walay kinutuban nga kalooy, motubag, ug pabalik-balik nga motubag.