Pagpangalagad sa Ginagmayng Paagi
Usahay ang usa ka gamay nga butang makahimo og dakong kalainan.
“Kumusta na ka?”
Sigurado ko nga ang tawo nga naa sa cash register nakapangutana na og daghang tawo niining pangutanaha nianang adlawa. Gamay ra kadto nga gasolinahan, ug nagdali lang ko ug mopalit og usa ka botelyang tubig ug mobalik sa akong sakyanan. Apan kining pabalik-balik nga pangutana—niining higayuna—lahi. Siguro wala siya mahibalo sa dako nakong panginahanglan nga makabati niadtong yano nga mga pulong.
Siguro wala siya masayud nga mihunong ko niini nga gasolinahan tungod kay dili nako makita ang dalan tungod sa akong mga luha.
Siguro wala siya masayud unsa kadako ang anaa nakong kasakit ug unsa ka lisud aron makakita kog kalig-on nga mosulod.
Siguro wala siya masayud unsa kasakit dihang ang matag usa sa gasolinahan dili motan-aw kanako ug sa puno sa luha nakong nawong.
“Kumusta ka?” gipangutana ko niya uban ang tinuoray nga pagbati sa iyang mga mata ug tingog. Naningkamot kong makahimo og mapasalamatong pahiyom samtang gipugngan nako ang bag-ong mga luha nga miumol sa akong mga mata—niining mga gutloa, mga luha sa pasalamat.
“OK ra ko,” mitubag ko, sa matinuorong paagi. Tungod kay karon dunay tawo nga nagmabination aron mamatikdan ako ug ang akong panglimbasug, OK na ang akong gibati.
Mahinungdanon lang Gayud
Ang paghisgot mahitungod sa pagserbisyo dako kaayo nga butang. Nakadungog kog mga istorya bahin sa impresibong makatawhanong mga proyekto sa tibuok kalibutan ug mga istorya bahin sa katawhan kinsa mipahinungod sa ilang kinabuhi sa importanting mga katuyoan. Ug bisan nagmapasalamaton ako sa ilang mga sakripisyo, kadto nga mga istorya sa kasagaran giubanan og kangutngot sa pagbati nga nakasala. Nasayud ko kon unsa kaimportante ang pagpangalagad. Ug labaw pa niana—nahibalo ko kon unsa ako kamalipayon kon magserbisyo ko sa uban. Kon mao man kana nganong dili man kini maoy kanunay nakong buhaton?
Sa kanunay masagmuyo ako sa paghunahuna sa tanang butang nga unta akong mahimo, ug makalimtan nako ang mga butang nga akong gihimo. Si Jean B. Bingham, Kinatibuk-ang Presidente sa Relief Society, namulong mahitungod sa dako kaayong mga epekto sa yanong mga buhat sa pagserbisyo. Mipasabut siya nga si Jesukristo usa ka hingpit nga ehemplo sa pagpangalagad pinaagi sa Iyang “[pag]pahiyom ni, [pag]pakigsulti ni, [pa]kiglakaw kauban ni, [pag]paminaw ngadto ni, [pag]hatag og oras alang ni, [pag-]awhag, [pag]tudlo, [pag]pakaon, ug [pag]pasaylo.” (“Pagpangalagad sama sa Gibuhat sa Manluluwas,” Liahona, Mayo 2018, 104).
Kon maghunahuna ko bahin sa makahuluganong pagserbisyo nga akong nadawat, lagmit kong mahinumdom sa gagmayng butang: Sa pagkadawat og makabayaw nga text gikan sa akong kauban sa kwarto, kinsa nakabantay nga dili maayo ang akong adlaw. O sa akong igsoong babaye nga nagdapit kanako sa pagdagan kuyog niya, wala mahibalo nga nagkinahanglan diay ko og tawo nga ikaistorya. O sa akong bishop nga mibira kanako aron makig-istorya kay para niya morag dili ako malipayon. O sa pagkahibalag og karaang kaila diha sa mga dalan kinsa wala lang mahinumdom sa akong ngalan apan mabalak-ong mihunong kon kumusta ang akong kinabuhi. Kining mga tawhana nangalagad pinaagi sa pagkamatikod kanako ug pagpakita nga sila nagpangga. Sa tinuod naghimo kini og kalainan.
Dihang nahinumdom ako niadtong ginagmay apan makahuluganong mga buhat sa pagserbisyo, akong nahinumduman nga ako pud diay pweding makahimo og kalainan sa kinabuhi sa ubang tawo. Ug dili lang kay pwede kong mohimo—naghimo diay ako niini. Sa hinay-hinay, usa ka adlaw sa usa ka panahon.
Tingali ugma damlag mahimo akong kabahin sa usa ka dakong tawhanon nga proyekto nga magtugot nga ako makaalagad sa katawhan sa tibuok kalibutan. Apan karon, imbis mobati nga sad-an nga wala makahimo sa pagmatikud sa tanan, akong gipili ang pagmatikud og usa ka tawo. Wala gayud ikaw masayud sa epekto nga imong mahimo pinaagi sa ginagmayng pagpangalagad.