Makahimo Gayud Kamo og Dakong Kalainan
Ni Elder Eduardo Gavarret
Sa Seventy
Gikan sa usa ka pakigpulong sa debosyonal, “… But As for Me and My House, We Will Serve the Lord,” gihatag diha sa Brigham Young University–Idaho niadtong Mayo 16, 2017.
Gusto kong mosulti kaninyo nga ang mga bayani karon nga panahon ania dinhi. Ug sila mao kamo. Sigurado ko nga ang mga abilidad, ang kadasig nga gikinahanglan aron makahimo og kalainan ug makamugna sa unsay gitawag nga gahum sa usa ka tawo, ang gahum sa paglihok, ang gahum sa pagsulti, nga gibase sa kahibalo sa ebanghelyo, ug sa ingon makamugna og kausaban, ania dinhi; anaa kini sulod kaninyo.
Dil ba mga bayani kitang tanan sa atong premortal nga kinabuhi? Kitang tanan misupak kang Lucifer ug sa iyang plano. Gipakatawo kita nga mga mananaog, ug anaa kita sa team nga modaug sa gubat. Karon, uban sa atong kahibalo, kinahanglan kitang mohimo og desisyon sa pagbuntog sa atong mga kahuyang ug mopadayon nga nakatutok sa Usa nga miluwas kanato.
Ayaw pilia ang dalan sa pagka-ordinaryo, nga kauban sa kawalay paningkamot ug kawalay pagpakabana. Pag-determinado nga mahimong lahi; gamita ang gahum nga anaa kaninyo, ug paghimo og kalainan.
Adunay daghang halangdon nga mga kawsa nga pakigbisogan. Apil niadtong nag-una sa paglihok ug naghimo og kalainan. Hinumdumi, mga mananaog kamo, gipakatawo nga usa ka mananaog. Makahimo gayud kamo og dakong kalainan.
Pagpili og halangdon nga kawsa alang sa Ginoo nga inyong paningkamutan, ug gamita ang inyong kusog. Adunay mga tawo nga angay tabangan, mga kamot nga ibayaw, huyang nga mga tuhod nga lig-unon, mga binilanggo nga bisitahan ug luwason, mga gigutom nga pakaunon, mga hubo nga sininaan, ug mga masakiton nga ayuhon. Ipataas ang inyong tingog. Pagmatinuoron sa inyong kaugalingon ug pagmatinud-anon sa inyong misyon.
“Kamo ang ‘paglaum sa Israel.’ Ang kalangitan nagtan-aw kaninyo, ug ang kalibutan naghulat kaninyo.”1
I-establisar ang inyong personal nga pakigsaad uban Kaniya, ang atong Manluluwas, ug isulti, “Alang kanako ug sa akong balay, kami magaalagad sa Ginoo” (Josue 24:15). Ug sa pagbuhat niini, ang uban usab mapanalanginan.